Read Mayangna Levítico 14 Bible Online

Levítico 14 - Mayangna bible

Levítico 14

¹Papang yaklauwi Moses yakat kiwi kalyulna:

²“Adika lani balna kuduh lipar laihna kaupak amput maisihni disyamnin kidika: siknis muihni kidika sumalyang yakat duwi kiuna karang,

³Kidika laih ū labanni balna kaupak ahni naikau kalahwi kiwak laihwi talna karang. sumalyang kidika laihwi talwak siknis muihni kidika lipar kal laihna kidika kaupak kalyamna karang kat,

⁴maisihni dis kalahnin yamwa muihni yaklawi uhu binina sangka bu laihwi dukiwarang, dawak kidika uhuni binina kidika maisihni dis atninki, dawak suhun panan duwi kiunin karang, asna pauni dakna as, dawak pan basni walapni kidika bik.

⁵Pakna karang uhu binina kidika as īna atnin, sau suba kau wastuna wasni utuhna sakkidika minit yakat,

⁶dawak uhu bin ūk sangka kidika duwi, suhun panan kidika duwi, asna pauni pis apis duwi, dawak pan basni walapni kidika bik duwarang, dawak kidika di balna kidika suihwarang uhu bin sangka kidika, uhu bin dauna āni kidika karak.

⁷Usnit kat, kidika āni kau wat tiaskaubu raswi bayakwarang lipar laihna muihni yakat, dawak witing kidika maisihni dis kalkulnakarang. Uhu bin sangka kidika laih dapamwak kiwarang.

⁸“Maisihni dis kalahwa muihni kidika asnina suhninkarang, dawak witing muihni bik suhninkarang, kungnibas bik kuswarang. Usnit kat sip karang ū lababanni balna pasyakat kiwi kanin, kaput kaunah ma tiaskaubu laih ahni yakat karang.

⁹Ma tiaskaubu laihwak basni bitik kahrmukwarang, dawak kungnibas bik kahrwarang, miniktangbas balna kaput laih butuni bitik kahrwarang, asnina balna suhwarang dawak witing bik kalsuhwarang, kaput dawak witing laih maisihni dis kalwarang.

¹⁰Ma tiaskaubās yakat sīp ahalmuk bu duwarang sakahwa awaskat; dawak plawar tanit yamni kidika paun salap minitkau bās duwarang, kidika laih minit dis kalanin dini as, diminik balna, disala karak awi laihna kidika, dawak litro as kaupak sahyakna bās kidika as duwi kiwarang.

¹¹Sumalyang witing maisihni dis yamwarang kidika, maisihni dis kalwarang muihni dawak di balna dukiuna kidika kalpaknin ūni labanni dūrni kiwikawa yakat lakwarang, Papang muhni tani yakat;

¹²usnit kat sīp almuk kidika as dawak disala litro as kaupak bās sahyakna kidika as karak libitwi Papang muhni yak duwi kiwarang witing pātni kidika yulni sakripais yamwa kidika, kidika laih Papang muhni yakat yamna karang.

¹³Sīp almuk kidika īna karang, muih dutni yamna kat sakripais yamwi tinglau ihiwa pāni maisihnidis yakat. Pātni yulni sakripais yamwa kidika laih sumalyang dini karang, dutni yamna yulni sakripais buswa kidika bik sumalyang dini karang, kat kidika laih maisihni dis palni bahang.

¹⁴“Usnit kat Sumalyang kidika muih pātni yulni sakripais yamna āni kidika apis duwi maisihni dis kalahwa muihni yakat kahna karang, tapani tingnipal niningkauh yakat dawak tingnipal tingninuh yakat dawak kalninuh tingnipal niningkau yakat bik.

¹⁵Usnit kat tingnipas wadahni kau disala apis duwarang;

¹⁶tingnipal bikikisni kau, wadahni kau disala duwasak yakat suihwi Papang muhni tani yakat wattiaskaubu raswarang.

¹⁷Tingni kau baisa disala duwasak kidika yakau duwi maisihni dis kalahwa muihni yakat kahwarang tingnipal niningkauh tapani yakat, tingnipal niningkauh tingni bikis nuhni yakat, kaput bik kalnituna tingnipal niningkauh yakat, muih pātni yulni sakripais yamwa āni minit yakat,

¹⁸dawa kat disala sutni watna kidika maisihni dis kalahwa muihni tunan yakat kahwarang. Kaput laih kidika muihni dutni dawak disna karang.

¹⁹Usnit kat sumalyang kidika yaklauwi dutni yamna yulni sakripais buswa kidika dukiwarang, kaput yamwi maisihni muihni kidika maisihni dis yaknakarang; usnit kat karauni kauna sakripaisni kidika yamwarang,

²⁰sakripais buswa pāni minityak ilwarang di minik balna minitdis kalanin yakarak libitwarang. Kaput laih dutni yamna muihni kidika maisihni dis kalnakarang.

²¹“Siknis muihni kidika minikunni di dis kat, witing pātni yulni sīp almuk as duwarang sakripais yamnin yulni, dawak kidika laih minit dis kalanin tanit yamni as karang witing dutni dawak disnin yulni, dawak plawar tanit yamni kidika paun arungka minitkau apis duwarang dawi disala karak bahawi laihna karang kidika laih minit dis kalanin as di minik kau, dawak disala litro as kaupak bās sahyakna kidika as

²²dawak buhtuku bikisni bu, dawak buhtuku walanibis bu, witing ampus sip yakat, as kidika laih sakripais yamna karang dutni yamna kidika yulni dawak ūk kidika laih karauni kauna sakripais yamnakarang.

²³Ma tiaskaubās yakat adika dini balna bitik Sumalyang yak duwi kiuna karang, witing maisihni dis kalahnin yulni; Papang muhni tani kat uiwi kalana karang kalpaknin ūni dūrni kung yakat.

²⁴Sumalyang kidik yaklauwi pātni yulni sakripais yamwa sīpni kidika duwarang, dawak disala litro as kaupak bās sahyakna kidika as duwarang dawak Papang muhni yakat dukiwarang minitdis kalanin dini tanit yamni as;

²⁵pātni yulni sakripais yamwa sīpni kidika dinimak dakwarang, dawak āni kidika apis duwi maisihni dis kalahwa muihni tapani tingnipalni niningkauh yakat kahwarang, tingnipal tingni bikis nuhni yakat bik dawak kalnituna nuhni tingnipalni niningkauh yaka bik;

²⁶usnit kat tingnipas wadahni yak disala apis duwarang,

²⁷dawak tingnipal bikisni kidika kau wat tiaskaubu raswarang Papang muhni taniyak.

²⁸Kaput bik laih maisihni dis kalahwa muihni tapani tingpal niningkauh yakat kahwarang, dawak tingnipal kau tingni bikis nuhni yakat bik kahwarang kaput bik laih kalni tuna tingpal niningkauh yakat bik kahwarang, yuldarang kat pātni yulni sakripais buswa āni kau kahna pāni balna dai yakat.

²⁹Dinisala sutni watna kidika sumalyang yaklauwi maisihnidis kalwa muihni tunan yakat kahna karang, kaput laih kidika muihni dutni dawak disnin kidika Papang kaupak dunakarang.

³⁰Usnit kat sumalyang yaklauwi buhtuku bikisni kidika as kidika awaskat buhtuku walanibis kidika as duwi kiwi kalana karang, maisihni dis kalahwa muihni ais duwi kiuna kidika.

³¹Dilawani as kidika laih dutni yamna yulni sakripais yamwarang, dawak ūk laih karauni kauna sakripais busna karang, minitdis kalanin dini diminik balna duwi kiwa kidika minit yakat. Kaput laih maisihni dis kalahwa muihni kidika dutni dawak disnakarang.”

³²Adika sumalna balna laih, lipar duwa balna witingna maisihnidis kalahnin yulni minitdis kalanin dini nuhni as duainin sip-awas balna kidika tanka.

³³Papang yaklauwi Moses dawak Aarón yakat diyulna:

³⁴“Manna Canaán sauni yakat āwanama usnit yakat, kidika laih manatayang manna palni dimana, dawak yang sihnayang wah, kidika laih lipar[8] manna saumana yakat ū as minityak,

³⁵ū dawan kidika sumalyang yakat kiwi kaltalwarang, dawak kalyulwarang: ‘Yang ūki yakat siknis as sakkapatki.’

³⁶“Sumalyang kidika, witing baisa ū pasyakat kawas yakau, diyulwak bitik kalalahwarang muih balna kidika, kaput laih kidika pasyakat bangkidika bitik laih maisihni kalnin-awas yulni. Usnit kat kāwi lakwi talwarang sikninis kidika.

³⁷“Sumalyang kidika lakwi talwak sikninis kidika ū yakat sangni kidika awaskat pauni laihna kidika dakwi kana duwa kat, kidika sikninis laih laihwakat dakwi kawi,

³⁸kidika kaupak kalahwi dawi diyulwarang ū kidika putsakna atnin ma tiaskaubu kat.

³⁹Ma tiaskaubu laihwak sumalyang kidika watwi laihwi talwarang, dawak sikninis kidika ū itikna yakat laihna kidika baisa panuhwas kat,

⁴⁰dipakwarang angdika kinipala laihna balna kidika yakna atnin, dawak kinipala kidika maisihni pāni yakat ruhmna karang tawan kaupak ahni naikau yakat;

⁴¹kaput bik dipakna karang ū pas kidika bitik laih kusna atnin, dawak yayahni kalahwa kidika laih maisihni pāni yakat ruhmna karang tawan kaupak ahni naikau yakat.

⁴²Kaput laih kipala yakna balna pāni yakat kipala ūk āna karang, kaput bik laih sau ulangni wisam kau duwi kahwilana karang ū kidika.

⁴³“Siknis kidika watwi ū yakat kalahwarang kat, kipala kidik yakpamwi, ū pas kidika kuswi, dawak wasmak wisam kahwi lawak usnit kat,

⁴⁴sumalyang kidika watwi laihwi talwarang. Sikninis kidika baisa panuhni kalnakarang kat, dawak lipar dutni karang kat kidika ūni laih maisihni kulnakarang.

⁴⁵Kaput laih, ūni kidika isihpamnin karang dawak maisihni pāni yakat dukiwi ruhmna karang tawan nuhni kaupak ahni naikau yakat.

⁴⁶Wais karangbik, sumalyang yaklauwi kidika ūni yakat kanin awas atnadai kidika yakat ban kawarang kat, kidika muihni laih maisihni kalnakarang pukta kat.

⁴⁷Wais wais karangbik kidika ūni yakat dikaswarang, kidika awaskat payahwarangkat, asnina balna kidika suhnakarang maisihni dis yamna atnin yulni.

⁴⁸“Sumalyang kidika ū yakat watwi kawi lakwi talwak sikninis kidika baisa panuhwas karangkat, kidika ūni laih maisihni dis kulnakarang, kat sikninis kidika disna bahang.

⁴⁹Ūni kidik maisihni dis yamnin karang kat uhu binina bu duwarang, suhun panani, asna pauni dawak pan basni walalapni kidika.

⁵⁰Uhu bin as kidika iwarang sau suba kau was tuna wasni utuhna sak kidika minityak.

⁵¹Usnit kat suhun panan kidik duwarang, pan basni walalapni yak duwarang, asna pauni, dawak uhu bin sangka yakabik duwarang, dawak uhu bin dauna āni dawak wastuna wasni yakarak suihwi ū yakat wattiaskaubu raswi bayakwarang.

⁵²Kaput yamwi ū kidika maisihni dis yamwarang, uhu bin dauna āni kau dawak was tuna wasni kau bik, dawak uhu bin sangka kidika, suhun panani, pan basni walalapni dawak asna pauni kidi balna karak ban awi.

⁵³Usnit kat uhu bin sangka kidika tawan nuhni kaupak ahni naikau yakwi dapamwak kiwarang, ū maisihnidis yamnin kidika kaput yamnakarang.”

⁵⁴Adika balna kuduh sumalna lipar satni balna, dawak maukitak yakat kalahwa balna kidika bik,

⁵⁵asna yak lipar laihwa balna dawak ū balna yak laihwa kidika bik,

⁵⁶mamuihki bahngwa kidika, maukitak yakat kalawa kidika sani balna laihwa kidika bik,

⁵⁷kaput laih amanglana atnin maisihni dis dawak maisihni duwa yakarak. Akat kaput maisumalwi lipar tanka kidika.