Read Mayangna Levítico 19 Bible Online

Levítico 19 - Mayangna bible

Levítico 19

¹Papang yaklauwi Moses yakat kiwi kalyulna:

²“Israel tawanni muihni balna yakat aput diyultah: “Manna holi awanauh, kat yang manna Papangmana yang adika holi yang bahang.

³“Papangmana dawak nanangmana kidika rispik kalatanauh. “Yak-urupdinin mani[12] balna kidika bik rispik kalatanauh. Yang kuduh manna Papangmana yang.

⁴“Dawan dauh balna yakat uiwinih, kaput bik di kau arta dawan dauh wayani bik yayamwinih. Yang kuduh manna Papangmana yang.

⁵“Manna Papang yakat sakripais as yamtanama kat wanaihma karak watwi yamni kalahnin yulni, yamni yamtanauh kaput laih Papangmana kidika duna karang.

⁶Tinglau duaina kidika sihm kidika mani kaspamna atnin ki, kaunah kaput bik payahwak kau bik sipki kasnin, kaunah ma bās laihwa yakat laih sutni bayakwa balna kidika bitik kuh kau busna atnin karang.

⁷Minitdis dini duaina kidika, ma bās laihwakat bik kasna karang kat; kidika laih dutni kulna karang dawak Papang bik duwas dana karang;

⁸wais muihni kat kaswarang kat, dutni kidika witing trukna karang dawak tawan paskaupak dispamna karang kat Papang dini yakna dai kidika witing yaklauwi daukalna bahang.

⁹“Di minik bahnin mani balna kiwi kawakat, bitik palni bahwi dulauwinih, dawak bik bahta bayaktang kat as watna balna kidika bik anawinih.

¹⁰Man wainma yanimak yakat wain minik balna kidika bitik palni wat walwi dakwinih, dawak sau yakat bukna balna kidika dulauwi duwinih; kidika balna datang kat muih miniknakunni dawak, pa ūk kaupak aina muihni balna duduwang. Yang kuduh Papang yang, manna Papangmana.

¹¹“Di mamalwinih. Alas yuyulwinih, dawak bik biri alas kalyuyulwinih.

¹²“Yang ayangki kau duta pramis dauh kidika yamwinih, kat Papangma ayangni kidika dutni yamtaman. Yang kuduh Papang yang.

¹³“Man yaihmatkau muih sakkidika yakat parasni kalyamwinih, dawak bik dini dakyakwinih. “Muih warkkalahna minit kidika laihwatwinih payahwak kau lauwi kalanin.

¹⁴“Tappuk yakat dutni kalyulwinih. “Dawak bik minikpa ditalwas muihni yakat kalyamtang buknin-awas ki. Papang yakat risnipik kidika kalatah. Yang kuduh Papang yang.

¹⁵“Muih lani yamtaman kat, lā kat awas kidika yamwinih: parasni dis muihni yakat ilpni bik yamwinih, kaput bik parasni nuhni duwa nining yakat bik man bukwinih. Lā kat laihta yamtah, muih lani yamtaman kat.

¹⁶“Man muihma balna pasyakat muih yulni kidika yulwinih. “Yaihmatkau muihni kidika muih ūk yaklauwi īna kidika pasyakat kawinih. Yang kuduh Papang yang.

¹⁷“Man ismang yakat āwi duwinih, man wanaihma niningyakat dutni kidika. “Man yaihmatkau muihni yakat bilnin kat, man biltah. Dutni yamna kidika yulni man bik pasyakat atnam awaski.

¹⁸“Man muihma balna niningna yakat biriwi kalyamnin, dawak dutni kalkulnin lani balna kidika duwinih. Man yaihmatkau muih sakkidika dalani laih, sihm man muihma kapat. Yang kuduh man Papangmayang.

¹⁹“Yang lāki balna kidika laihta yamtah. “Tingmalau balna kidika, tinglau satuk karak libittang ānina wirihnin awaski. “Yamamak yakat di minik sat karak wirihta dahwinih. “Asna yamnin dini sat karak ban awi asna yamna prakni kidika āwanam-awaski.

²⁰“Muih as kat dini yamyang yal kidika karak kalangwarang kat, kaunah yal kidika al ūk dini yakna dai kat, kaunah baisa bakanwi yakwasdai kat yal kidika, yal yakarak kalangna alni kidika minit launa atnin karang; kaunah īnin laih awas karang, kat yal kidika pri awasdai bahang.

²¹Al kidika, witing kuts almuk as dukiwarang Papang yakat, witing pātni yulnin sakripais yamna atnin bahang dini kidika kalpaknin ūni labanni dūrni kiwikawa yakat duwi kiuna karang.

²²Kidika kutsni almuk laih, pātni yulni sakripais yamwa kidika, bahang sumalyang kidika yaklauwi yulwarang alni dutni yamna kidika dawak disna atnin.

²³“Manna kidika sauni yakat yawa awanama kat pan minik balna kidika dahtanama, kaunah panan balna kidika daknamna awaski,[13] dawak minik balna bik dakta kasnamna awaski kurih bas kat.

²⁴Kurih arungka laihwa yakat, minik balna kidika bitik Papang dini yaknamana karang, alasna as yamta,

²⁵dawak kurih singka kāwa yakat laih sipkarang minik balna kidika kasnamna, kaput laih pan kidika minik baisa laihna karang. Yang kuduh manna Papangmana yang.

²⁶“Āni duwa balna kidika kakaswinih. “Di malni kau balna kidika yulyang atwinih, dawak bik matakit kau kaiwi kalahwa balna kidika yulnin awaski.

²⁷“Basmana tayalni dadakwinih, dawak kungmanabas sutni balna bik dadakwinih.

²⁸“Muih mana yakat dadakwinih, muih as dauna kidika yulni. Dawak umanatak minit yakat bik uhulwinih. Yang kuduh Papang yang.

²⁹“Walamabis yayal risnipik didiswinih, pini yalni yamta. Dutni yamta saumana kidika daukakalwinih.

³⁰“Urupdinin mani[14] balna kidika rispik kalatanauh. Paki maisihni dis kidika nuhni kultanauh. Yang kuduh Papang yang.

³¹“Spirit muihni dawak, malni dini balna yakwi yuyulwa muihni yakat bik uiwinih. Kidika yakat di yulta daka maisihni kakalwinih. Yang kuduh manna Papangmana yang.

³²“Kalma kau lawah, muihbararak balna muhnitna tani yakat rispik lani karuk. Papangma yakat bik rispik lani kalatah. Yang kuduh Papang yang.

³³“Pa ūk muihni manna pasmangna kau kidika yamtanangkat dalani wauhnin awaski.

³⁴Manna aslah mana kapat kalyamtanauh. Kat manna bik pa ūk muihni manna kulna dai bahang Egipto sauni yakat. Yang kuduh manna Papangmana yang.

³⁵“Alas lani kau yayamwinih lain kulna balna kidika, dawak tikini awi talwa kidika dawak mahni laihwa kidika kulwi talwa balna bik.

³⁶Manna yamni kidika kau praisni kat anamnaki. Yang kuduh manna Papangmana yang, Egipto kaupak mana yakna yang kidika.

³⁷“Kaput bahang yang laki balna yakat yamtanauh. Yang kuduh Papang yang.”