Read Mayangna Levítico 2 Bible Online

Levítico 2 - Mayangna bible

Levítico 2

¹“Muih as, Papang yakat minitdis dini as duaiwarangkat plawar minit satni balna, plawar tanit yamni kidika duaina karang, dawak kidika minit yakat disala utuhna karang, kaput bik walapni busnin dini kidika bik;

²usnit kat duwi kiuna karang Aarón walanibis balna yakat, sumalyang balna yakat, dawak as kalahwi plawar kidika tingkurus bung duwarang, disala āna dini kidika, dawak walapni busnin kidika karak libitwi, dawi sakripais busnin pāni yakat ilwi busna karang, bahang kidika laih minitdis kalanin dini as busna karang ban isningkatwa atnin yulni, dawak kidika laih walapni yamni as karang Papang nining yakat.

³Dawak minitdis kalanin dini sutni watwada kidika, bahang kidika laih minitdis Papang risnipik yakat kalanin dini balna pasyakat tanit yamni kulna kidika, Aarón dawak sulani balna dinina karang.

⁴“Minitdis kalanin dini as duyawama kat, plawar busna kapatnah kat, kaunah kidika laih busnin ūni kau āwi busna karang kat, dawak kidika laih plawar tanit yamni kidika kau yamna atnin karang disala karak banawi, kaunah pupuhnin dini laih ānin-awas ki, kidika awaskat plawar kidika laihwi baini dawi buswi minit yakat disala rasna kapatnah kat duainin.

⁵“Minitdis kalanin dini kidika, plawar minik satni balna kapatnah kau busna kat busnin pahni binina kau āwi, kidika laih plawar tanit yamni kidika kau yamna atnin ki, yamni tikna atnin disala karak, kaunah pupuhnin dini kidika laih ānin-awas ki;

⁶dakta data minit yakat disala kau rasma, kat kidika laih minitdis kalanin dini as plawar minik satni balna kau yamna bahang.

⁷“Minitdis kalanin dini duaitaman kidika plawar minit satni balna kat, dawak suba kau āwi busna kat, kidika laih plawar tanit yamni kidika kau yamna atnin ki dawak disala karak.

⁸Minitdis kalanin dini kidik, kidika dini balna yulwa kaput yamnaman kat, Papang muhni yakat duyawa sumalyang yakat kalama, dawak witing yaklauwi sakripais busnin pāni minit yakat duwi kiwarang.

⁹Kidika yakat, sumalyang yaklauwi dini kidika apis duwi sakripais busna karang, ban isningkatwa atnin kidika yulni, bahang kidika laih Papang nining yakat walapni as karang.

¹⁰Dawak minitdis kalanin dini sutni bayakwa kidika, dawak kidika laih minitdis kalanin dini as tanit yamni Papang ayangni nuhni usnit yakat kulwi yamwa kidika, kidika sutni bayakna kidika laih Aarón dawak witing sulani balna dinina karang.

¹¹“Plawar minik satni balna kau, minitdis kalanin dini duyawamana kidika Papang kau, pupuhnin dini ahawinih. Baisa minit yakat, pupuhwa dini dawak amak satni balna kidika, Papang yakat minitdis kalanin dini busnin awas ki.

¹²Sipki minitdis kalanin dini Papang yakat duainin pupuhwa dini kidika dawak amak bik, di minik tatuna kalahwa balna yakarak, kaunah walapni purwa kapat laih awaskarang.

¹³“Minitdis kalanin dini plawar minik satni kau balna kidika laih kuma ānam ki, plawar minik satni balna kau minitdis kalanin dini yamtaman kidika kuma āwas atnin laih awas ki, Papangma kuma pranimis yamna kidika. Minitdis kalanin dini yamtaman balna bitik kidika laih kuma ānamki.

¹⁴“Plawar minik satni balna kidika kau minitdis dini as kalataman kat Papang yakat di minik balna tatuna kalahwa kidika kau, kidika laih plawar minik kidika yamni barakna atnin ki dawak kuhkau bukulnin, dawak minik balna tatuna kalahwa kidika wisam palni dakwada kidik taihwi sikitnin karang.

¹⁵Minitdis kalanin dini minit yakat disala dawak walapni buswa dini kidika bik ānamki, kat minitdis kalanin dini kidika laih plawar minit satni bahang.

¹⁶Usnit kat sumalyang kidika yaklauwi, di minik sikitna balna kidika apis yakwi buswarang dawak disala kidika bik, kaput bik laih walapni busnin dini kidika bitik banawi, dawak kidika dini laih minitdis kalanin dini as isningkatwa kidika ban karang Papang risnipik usnit kau yamwa kidika.