Read Mayangna Levítico 21 Bible Online

Levítico 21 - Mayangna bible

Levítico 21

¹Papang yaklauwi Moses yakat kalyulna: “Aarón sulani sumalyang balna kidika karak yulbautah, dawak diyultah witingna kidika maisihni kalnin awaski, witingna wanaihnina balna dadauwak muihni nuhni kidika laihwi,

²kaunah adika manah yulni laih sipman maisihni kalnam, papangma, nanangma, walamabis al, yal, wirahma al,

³wirahma yal as baisa al duwasdai kat, dawak baisa witing karak ū aslah dai kat, kidika balna bitik yulni laih sipki maisihni kalnam.

⁴Kaunah wanaihma as uman al duna kidika awaskat yal duna dai kat[15] kidika yulni laih sip-awaski maisihni kalna atnam.

⁵“Tunanina kahrnin-awaski, dawak kungninabas bik kahrnin-awaski, dawak muihnina yakat bik daknin awaski,

⁶nawatkauh laih muihni bitik palni Papang dini kalnin karang, dawak Papangni ayangni daukalnin-awas yulni, kat witingna kuduh minitdis busnin duwi uiwa kidika, dawak plawar busna bik duwi uiwa kidika Papang yakat; kaput bahang witingna kidika laih Papang dini palni kalna atnin ki.

⁷“Yal as ahal manas karak kalangwa kidika karak kaldunin awaski, dawak yal as laihwi dutni kalyayamna kidika, awaskat duwi dapapamna kat dunin-awaski, kat Papang dini kakalna bahang witingna kidika.

⁸Kidika balna bitik kaupak naikau awanauh, kat witingna yaklauwi Papangnina kau plawar busna kidika duwi uiwa bahang. Bahang man namang yakat holi karang, kat yang, Papang yang adika holi yang bahang dawak bik yang kuduh lawik holi yamtayang kidika.

⁹“Sumalyang as walanibis yal kat witing kidika, yayal, ahal manas karak kalalangwa kapatnah kalwarang kat, papangni risnipik dis yamwi bahang kidika yal laih sangka palni busna karang.

¹⁰“Sumalyang balna taninatuna kidika, parasni aitani kalana ki, holi prakni kidika kana atnin, dia kau tunan yakat utuhwi Papang dini yakwa kidika kau kalyamna bahang. Kaput bahang witing sip basni kidika uluhwas karang, dawak prakni bik iswi biswas karang kulnin kaida kidika yulni;

¹¹kaput bik muih as dauna muihni nuhni tuskidika yakat sip-awas ki kana atnin: papangni palni dawak nanangni palni dauna karangbik sip-awas ki kawi maisihni kalnin.

¹²Witing Papangni pāni holi kidika kaupak sip-awaski dawi kalahna atnin, kidika pāni holi kidika dauh kapat kalkulnin-awaski, kat witing minit yakat dia kau utuhwi Papang dini yakwa kidika kal-utuhna bahang. Yang kuduh Papang yang.

¹³“Witing yalni kidika laih yal as baisa al karak kalpakwas kidika kat duna atnin karang.

¹⁴Sip-awas palni karang, tingmak, kidika awaskat yal as duwi dapapamna kidika duna atnin, kaput bik laihwi dutni kalyayamna yalni, kidika awaskat yal as ahal manas karak kalangwa yalni kapatnah kat; witing yalni kidika laih al karak baisa kalpakwas kapatnah kat dunin karang, dawak bik witing sulani balna paskaupak karang,

¹⁵witing sulani balna pasyakat sau yakat dikulnin-awas yulni, kat yang, Papang yang adika lawik, yang diki yaknayang bahang.”

¹⁶Papang yaklauwi Moses yakat kiwi kalyulna:

¹⁷“Aarón yakat kalyultah, waradika dawak tanit yakat ma balna kaiwarang kidika bik, witing sulani balna sakahwa as bik sip-awas karang plawar busna minitdis dini kidika Papangni yakat duwi kiuna atnin ki.

¹⁸Rahm yulni kidika laih, muih as bik sakahwa kidika witing sip kaput yamwas karang: minikpa dis karangpa, kalni sakahwa karangpa, nangnitak kidika awaskat tapani bik dutni karang kat,

¹⁹barahnimak kidika awaskat tingni balna kidika bahna karang kat,

²⁰dangni uruni karangpa, parahni bin karangpa, minikpa yakat mukus duwakarangpa, muihni yakat kalkilna karangpa, kidika awaskat unitak yakat busna karangpa, kidika awas bik suman'minik balna daukalnapa.

²¹Sumalyang Aarón sulani sakahwa balna karangkat as bik sip-awas karang Papang muhni yakat minitdis dini buswa kidika duwi kiuna atnin; sakahwa bahang, Papangni yakat sip-awas karang plawar busna minitdis dini kalawa kidika duwi kiuna atnin.

²²Kidika planiwar busna kidika sipki kasna atnin, holi dini balna kidika dawak bik tanit holi kulna dini kidika bik,

²³kaunah sip-awas karang asna rina sakkidika piningyakat bayaknin dawak sakripais buswa pāni kidika yaihnit yakat bik kiuna atnin, kidika laih yang paki maisihnidis yaktik dunayang kidika sau yakat laknin awas yulni, witing sakahniwa yulni. Yang kuduh Papang yang, yang diki yaktik dunayang kidika.”

²⁴Dawak Moses yaklauwi sihm adika yulni Aarón yakat kalyulna, dawak walanibis balna yakat bik dawak Israel muihni balna yakat bik diyulna.