Read Mayangna Levítico 22 Bible Online

Levítico 22 - Mayangna bible

Levítico 22

¹Papang yaklauwi Moses yakat kiwi kalyulna:

²“Aarón yakat kalyultah dawak sulani balna yakat bik, witingna amungtalnin ki holi dini balna Israel balna yang akat yayawa kidika, kaput laih yang ayangki daukakalwas karang. Yang kuduh Papang yang.

³“Diyultah, waradika dawak tanit yakat ma balna kaiwarang kidika yakat, witing sulani balna kidika maisihni likkauna Israel balna yang diki yayakna kidika yang yakat dukiwarang kat, yang muhki kaupak ipamna karang. Yang kuduh Papang yang.

⁴“Aarón sulani balna lipar laihna kidika, kidika awaskat witing wasni kira kidika, di balna yang diki yakwi maisihnidis yamna kidika kaupak kasna atnin. “Di maisihni as laihna karangkat, muih as dauna kat dini balna, kidika awaskat muih al as witing wasni kalahwak likkat laihwarang kat,

⁵kidika awaskat muih as bil laihwi maisihni kalahna kidika, sihm kaput bik muih al maisihni likkauna muih ūk yakat laihwak maisihni kalwa kidika,

⁶kidika laih maisihni kalkulna karang pukta kat, kaput laih witing sip-awas karang kasna atnin Papang dini yakna balna kidika, baisa witing tingni kidika was kau suhwas tanit kauh.

⁷Ma kakiwakat maisihnidis kalna karang, kidika usnit kat laih sipkarang Papang dini yayakna balna kaupak kasna atnin, kat kidika laih witing kasnin bahang.

⁸Tinglau karangpa, kidik awaskat asangpas dini karangpa, dauna kat kasnin awaski, nawah īna kidika bik kasnin awaski, kidika yulni maisihni kalnin-awas yulni. Yang kuduh Papang yang.

⁹“Diyultang kat yang lāki kat yayamwang, kidika yakat yamwas dawi dutnina truknin laih awaski, dawak kaput laih dadauwas karang. Yang kuduh Papang yang, diki yaknayang balna kidika.

¹⁰“Muih, taldas as sip-awas karang holi dini kidika kasna atnin. “Sumalyang ūni yakat payahwa muihni kidika dawak wark kalahwa muihni kidika bik sip kaswas karang holi dini balna kidika.

¹¹“Sumalyang kidika witing lalahni kau witing dini yamnin yulni muih as bakanwarang kat, sip karang kasna atnin holi dini kidika. Dawak sumalyang ūni kau batanh dana kidika bik sipkarang kasna atnin.

¹²“Sumalyang walanibis yal kidika muih taldas muihni as karak kal duduna karang kat, sip-awas karang kasna atnin minitdis dini kalawa kidika kaupak.

¹³Kaunah tingmak kidika awaskat, duwi dapapamna karang kat, dawak walanibis bik diskarang kat, dawak witing Papangni ūni yakat kiwarang kat al dis karang papangni kaswa kidika kasnin. Muih pini ūk laih sip-awas karang kasnin.

¹⁴“Muih as isning aiwas Papang dini yakna balna kidika kaswarang kat, Sumalyang yakat kalana karang dini kasna kidika sahyakna singka as minit yakat lakwi kalana karang;

¹⁵kaunah Sumalyang balna kidika dadawak Israel balna kidika Papang dini yayakna balna Papang yakat uiwi kalalawa kidika ayangni daukalnin-awaski,

¹⁶witingna dutnina balna truknin awaski Papang dini yayakna balna kidika kaswi. Yang kuduh Papang yang, yang lawik diki yakna yang kidika.”

¹⁷Papang yaklauwi Moses yakat kiwi kalyulna:

¹⁸“Aarón dawak walanibis balna karak yulbautah, dawak Israel balna bitik karak, bahang adika yulni diyultah: Israel balna as, kidika awaskat pa ūk muihni balna witingna pasyakat yalalahwa karang kat, bahang witingna kidika sakripais bubuswarang kat tinglau karauni kauna, pramis yamna kidika kat yamnin yulni, kidika awaskat, witing silp kulnin lani minitdis dini as kalawakat,

¹⁹tinglau kidika almuk atnin ki, dawak bik sakahwa awas atnin, kaput laih sip karang duna atnin. Sipkarang turuh almuk as atnin, Sīp as atnin, kidika awaskat kuts almuk as atnin,

²⁰kaunah tinglau as sakahwa atnin laih awaski, kaput karang kat duwas karang bahang.

²¹“Wais karang bik Papang yakat sakripais as yamwarang kat, Dawan karak watwi yamni kalahnin yulni, kidika awaskat pramis as yamna kidika kat yamnin yulni, kidika awaskat witing silp kulnin lani minitdis kalanin dini as kalawarangpa kat, duwi kiuna atnin turuh almuk as kidika, sīp as duwi kiunin karang, sakahwa awas kat, kaput laih duna karang.

²²Papang yakat tinglau miniknapa bahna balna kidika duwi uiwinih, kidika awasbik tinglau as dalani duna kidika bik duwi uiwinih, dawak tingni dakna balna kidika bik, kidika awaskat tutuhna duwa kidika muihni yakat, dawak unitak minit yakat kilna kidika balna kidika minit dis kalanin dini as bubuswinih Papang kau sakripais buswa pāni yakat ilwi busnin awaski.

²³Man silp kulnam lani minitdis dini as kalataman kat sipki kalana atnam turuh almuk as, kidika awaskat kuts almuk as kalni balna kidika papatni awas karangbik, kaunah pramis as yamnamna kat, kidika yulni duyawaman laih sip duwas karang ki.

²⁴Kaput bik laih Papang yakat tinglau as duyawanama kidika, suman'minik yakat di kalina karang, kat kidika awaskat wiwisna karangpa, kidika awaskat dakmumukna kat dukiunin awaski. Adika dini manna saumana yakat yayamwinih.

²⁵Kaput bik laih pa ūk muihni balna kaupak tinglau as kapat dutni kat duduwinih, manna Papangma kasnin, kat tinglau as sakahwa bahang sip duwas karang.”

²⁶Papang yaklauwi kiwi Moses yakat kalyulna:

²⁷“Turuh bin, sīp bin kidika awaskat kuts bin as batanh dawarangkat nanangni yaihnit yakat ma tiaskaubu sak-atnin ki, kaunah ma tiaskaubās laihwa yakat laih sip karang minitdis kalanin dini as busna atnin Papang yakat.

²⁸“Sihm mani yakat turuh yal as pa kidika awaskat sīp yal as pa iwinih walanbis karak libitta.

²⁹“Papang yakat tingkih kalyulta, minitdis kalanin dini as kalama kat, yamni yamtah, witing duna karang.

³⁰Kidika mani, bitik kasmuktah yahan kau dini dawinih. Yang kuduh Papang yang.

³¹“Yang lāki yakat yamtah. Yang kuduh Papang yang.

³²“Yang ayangki holi kidika daukakalwinih, kaput laih Israel balna pasyakat holi yamna karang. Yang kuduh Papang yang kidi manayaknayang kidika manna

³³dawak Egipto kaupak mana yaknayang kidika, yang manna Papangmana atnik yulni yang kuduh Papang yang.”