Read Mayangna Levítico 24 Bible Online

Levítico 24 - Mayangna bible

Levítico 24

¹Papang yaklauwi Moses yakat kiwi kalyulna:

²“Israel balna yakat paktangkat olib sani kidika duaiwi mamawang, kaput laih awas balna kidika ban dahlwa bangkarang,

³Aarón yaklauwi kidika barangni yamwarang, bahang kaput laih pukta yakat dahlwa ban karang Papang muhnit yakat, kalpaknin ūni labanni yakat pramis baksni yaihnitkau asna daklana kidika kaupak ahni yakat. Adika lani nining ban kaput karang, Papangnina kaupak walaninabis kat bayakwi kiuna karang.

⁴Awaskat kidika panina gol kau manah yamna kidika barangni yamna karang, kaput laih Papang muhni yakat dahlwa bang-atnin.

⁵“Plawar tanit yamni kidika duta, dawak kuruhta bustah 12, bahang kidika aslah tikini paun tiaskauarungka karang,

⁶dawak Papang muhnitkau gol tinibil pakkidika yakat iltah parna bu dawak parna as kidika, plawar kuruhwi busna tiaskauas lakna karang.

⁷Parna bangkidika bitik yakat walapni busnin as lakta, dawak plawar busna kidika laih minitdis kalanin as karang dinitkahwas ban isningkatwa atnin yulni, dawak kidika laih Papang risnipik kau busna karang.

⁸Adika dini laih ar kaput ilwa atnin karang Papang muhni yakat, yak-urupdinin mani balna kaiwa bitik yakat, adika laih pramis as ban kaput karang, Israel balna praninamis.

⁹Kidika pīsni laih Aarón dini karang ban kaput atnin, dawak sulani balna bik dinina karang, dawak kidika planiwar busna kidik laih holi pāni kat kakasna karang, kidika laih minit dis kalanin dini as Papang yakat bubuswa dini bahang, adika dini laih tanit holi bahang.”

¹⁰Israel balna pasyakat al as likdai, witing nanangni kidika laih Israel dai, dawak papangni laih Egipto kaupak dai. Nanangni ayangni laih Selomit, Dibri walanibis yal, witing laih Dan sulani dai. Adika alni dawak, Israel muihni as karak kalbibilna, dawak Papang yakat dutni yulna. Kaput laih Moses yakat duwi uina dai,

¹²dawak witingna kidika alni maintatalna, dawak bik tahahana Papang yaklauwi ais yamnin diyulwarangpa.

¹³Dawak Papang yaklauwi Moses yakat aput kalyulna:

¹⁴“Yang kau dutni yayulna kidika ū labanni balna paskaupak yaktanauh; dawak dutni yayulwak dakana balna bitik kidika tingnina tunanina yakat ihilwang, dawak muih balna bitik yaklauwi kipala kau barhwi ihiwang.

¹⁵Israel balna yamninna kidika laih, diyultah aput: Papangnina ayangni dutni yayamwarangkat, witingna silp dutnina kidika trukninna karang, dawak muih balna bitik yaklauwi kipala kau barhwi ihina karang. Pa ūk kaupak karangpa kidika awaskat adika pāni kaupak karang bik, Papang ayangni dutni yulwarang laih, īnin karang.

¹⁷“Muih as sangnika dakwarang kat, kidika muihni laih īnin karang.

¹⁸“Turuh as iwarang kat, witing kaput watwi kalana karang: tinglau bahang tinglau kau minit launa karang.

¹⁹“Witing tawanni pasyakat muih as kau dutni kalyamwarang kat, ampus dutni kalyamna kat biriwi kaput kalyamna karang:

²⁰bahna kat, biriwi bahna karang, minikpa kau talwak, biri bik minikpa kau kaltalwarang, biri anani, biri anani; ampus dutni kalyamna kat biriwi kaput witing muihni yakat kalyamna karang.

²¹“Tinglau as iwarangkat pāni yakat tinglau ūk kalawarang. Muih as īna karang kat, witing laih daunin karangki.

²²“Adika lāni laih pa ukkaupak muihni minit yakat sihm parasni duwarang, adika sauni muihni kapat. Yang kuduh manna Papangmana yang.”

²³Kaput laih Moses witing Israel balna karak yulbauna dawak, witingna al dai kidika yakwi duwi uina Papang kau dutni kalyulna dai kidika, dawak kipala kau barhwi ihina. Papang yaklauwi Moses yakat kalyulna dai kaput, Israel balna yayamna dai.