Read Mayangna Levítico 26 Bible Online

Levítico 26 - Mayangna bible

Levítico 26

¹“Manna dawan dauh wayani yayamwinih; dawak manna saumana yakat kipala dawan dauh dini, dawak wayani yayamna kapatnah balna dulalauwinih; dawak kidika niningna yakat bik abubukwinih, kat yang kuduh manna Papangmayang bahang.

²Urupnin mani[19] kidika rispik kalatanauh; dawak paki maisihnidis kidika nuhni kultanauh: yang kuduh manna Papangmanayang.

³“Yang lāki balna kat yamtanama kat,

⁴yang lawik waslaunin kidika mani kat kalating waslauna karang, dawak sau kidika dawak pan balna kidika minik yayamna karang;

⁵plawar minik kidika dutanama wain minik balna kidika kalahwa kat, dawak wain kidika duta awanama di minik dahnin mani balna kaiwi kawarang kat; plawar busna kidika kastanang ismangnalak dawarang, dawak isninglak danin lani kidika dutanama manna saumana yakat.

⁶Saumana yakat yamni atnin kidika kalaki, ismangnalak awanama, kat yang lawik saumana yakat di anyang balna kaupak manalaihtik yakki, dawak wark kidika bik.

⁷Manna lawa yamtanangkat waihmanala balna kidika kikirarang, dawak witingna isparah baini kidika yakat bubukna karang manna muhmana tani yakat;

⁸manna muih singka alahwanangkat witingna kaupak muih andat yamaduwi kikirarang, dawak manna muih andat alahwanang witingna tausin salap kikirarang; manna waihmanala balna kidika muhmatna tani yakat isparah anan baini yakat bubukna karang.

⁹Manna yakat yang mikpa yamni manatalki, dawak mantingkat mahni kaltanama, dawak manna karak pramiski kidika yamki.

¹⁰Kurih bayakna balna yakat plawar minik balna punin ūni yakat puna balna kidika kastanama, dawak plawar minik wisamni kaiwi kāwa kidika yulni umamani balna kidika yakmuktanama.

¹¹“Yang manna pasmangna yakat yalahki, manaruhmtik datas awaki;

¹²manna pasmangna yakat lik-awaki, dawak manna Papangmana awaki, dawak manna kidika yang tawanki awanama.

¹³Yang kuduh manna Papangmanayang, Egipto kaupak manayakna kidika, baisa witingna warauni atnamna-awas yulni, manna mamatna yakat truknin tikini dai kidika yang lawik bahnayang, dawak manayamnayang muhmana wauhlau lapaknamna yulni.

¹⁴“Kaunah manna yulki dakas awanama kat, dawak laki balna kaput bik yamtas awanama kat,

¹⁵dawak nawatkauh laki balna kidika ruhmta datanama, dauh kultanama, dawak prakimis yulnayang yakat yamtas awanama kat,

¹⁶dawak yang bik manna yakat aput manayamki: yamadangni kidika manasihki, siknis dutni daunin dini kidika, yamah, makpa siknis, muihmana bik parasni dis dawarang, di dahtanama bik dauh manah karang, kat waihmanala balna kakaswarang bahang.

¹⁷Yang manna namangna yakat awaki, dawak waihmanala balna yaklauwi mamatna bayayakna karang, kidika balna manna yakat dutni manakukulwa balna kidika manatataihna karang, dawak manna iranama muih as bik manauiwi uiwas karang bik.

¹⁸“Kaput karang bik manna ban yulki dakas awanamakat, manna dutmana yulni wat tiaskaubu wah manaki.

¹⁹Tapamana dadasni, manna manah kapat dakamana kidika bahtik disyamki; dawak yamting kat makau kisang kidika was manawas dawarang, dawak sau bik minik manawas dawarang.

²⁰Parasmana kidika dauh distanama, kat sau kidika di minik yakwi manawas karang bahang, dawak pan balna bik minik yakwi manawas karang.

²¹“Manna ban nikingkauh awanama kat, yulki balna bik dakas, yang lawik wattik wattiaskaubu wah manaki, manna dutni yamnamana kaput praisni.

²²Manna mamatna yakat asangpas dini anyang balna kidika sihki, bahang walamanabis dis manadadawarang, tingmanalau balna bik ihiwarang, dawak manna bik bulah manadana karang, dawak ta balna yakat bik sip-awas kalna karang kidika munah lapakna atnin.

²³“Kaput kalahwak bik manna barangni alahwas awanama kat, dawak ban yang nikingkauh lawanama kat,

²⁴dawak yang bik manna namangna yakat lawaki, dawak manna dutmana yulni baisa minit yakat wat tiaskaubu wah manaki.

²⁵Yamting kat manna mamatna yakat kaina karang yang pramiski kidika biriwi mana yamna karang; manna īra yawa tawanmana nunuhni yakat awa maldanama, kaunah yang lawik siknis manasihkiki, dawak manna waihla tingni yakat buktanama.

²⁶“Yang lawik manna kasnamna balna kidika daukalmukki kat, yayal salap kidika plawar busnin pāni aslah yakat witingna, manna kasnamna kidika bubusna karang, dawak dibin manawak kastanang ismangna lakwas karang.

²⁷“Kaput dawak bik manna ban yulki dakas awanama, dawak nawatkauh laih ban nikingkauh awanama kat,

²⁸yang bik manna namangnakauh awaki, dawak kulnik daukalna kau baisa minityak wat tiaskaubu wah manaki, manna dutmana yulni.

²⁹Kaput laih manna silp walamanabis ahal dawak walamanabis yayal yakat kastanama.

³⁰Yang lawik witingna Papang kukulwas muihni balna makat yuyulwa ūni kidika daukalpamki, dawak walapni ilwi buswa pāni kidika bik papussah ki; dautanangkat muih mana sangnika dis kalna kidika manauduhki, damanawan sangnika dis kidika minit yakat ilna awaki, dawak di dauh as manatalayang kidika lāih kalahna karang;

³¹tawanmana nunuhni kidika daukalmukki, dawak makatyultamana ūni kidika, dawak di walapni kalkahtanama walapni kidika baisa yamni dakas awaki.

³²“Sau kidika daukalpamna awaki, dawak waihmanala balna aiwi kidika sauni yakat yalahwak talnama.

³³Manna laih nisan balna pasyakat manaruhmting yawanama, dawak isparah kidika ūni kaupak muryaktik manatik yawaki; dawak saumana kidika kauhmak wanilang manah kalwarang, kaput bik tawanmana muihni balna kidika daukkalmukting muihsak daunin dini kakalwarang.

³⁴Kaput laih sau kidika isninglak kalna karang daukalna kidika yulni bitik yakat, dawak manna bik waihmanala sauni yakat bangmana kidika, kaput laih wingnita puhna karang, muhnilau kau sip urupwasdai kidika.

³⁵Ma balna bitik yakat sau kidik dutni karang yakat, sau kidika witing yak-urupdinin yamni kidika dakana karang, kat manna bangmana mani dai yakat kaput dakawasdai bahang.

³⁶“Manna waismana kat sangka awanama kat waihmanala balna saunina yakat, manayamtingkat muih parasni manalaihna karang, dibasta bukwa kidika mana muihsak dauta iranama, isparah duwi manauiwi kaiwa kaput iranama, muih as bik manauiwas kaunah buktanama;

³⁷biri kaltukta buktanama sihm kalbaunin kaikawa kapat, muih as bik manauiwas karang bik; ¡manna kaupak as waihla niningyakat yaklauwas karang!

³⁸Nisan balna pasyakat mana ihina karang, dawak waihmanala balna saunina yakat dahn manayamna karang;

³⁹waihmanala sauni yakat sangka wattanama kidika; manna dutmana yulni dautanama; ¡manna Papangmana balna karak kalpakta dautanama, witingna dutnina yulni!

⁴⁰“Manna dutmana dawak Papangmana dutni kidika bik amanglatanama, dawakat yang niking kauh barangni awas dawak nikingkauh mana kidika bik,

⁴¹yang bik manna namangnakauh awaki, dawak waihmanala balna saunina yakat manaduyawaki; kidika yakat manna kulnamna Papang yakat kultasmana kidika sau yakat bukna karang, dawak manna dutmana kidika minitlautanama.

⁴²Kaput dawak laih Jacob, Isaac, dawak Abraham, kidika balna isingkatki, dawak sauni kidika bik isingkatki,

⁴³bahang kidika laih manna kaupak laihwi yakna karang bahang, dawak yak-urupdinin kidika duwarang, manna kidika yakat yalahtas awanama yakat, dawak manna dutni yamna mana kidika minitlautanama, kat manna yang lāki kidika dauh kulnamana, dawak bik dutas dana mana bahang.

⁴⁴“Adika kaput karang bik, manna waihmanala balna saunina yakat bangmana karang bik, manna manaruhmtik datas awaki, dawak dauh kapat manakultas awaki, kaput bik manadismuktas awaki, muihmanabararak balna kau pramis yamnayang kidika kat yamki, kat yang kuduh manna Papangmana yang.

⁴⁵Nawatkauh laih yang pramiski kidika isingkatki, Egipto kaupak yaknayang nisan balna muhnina tani yakat, yang kidika manna Papangmana atnik yulni. Yang kuduh Papang yang.”

⁴⁶Adika lāni balna, dawak sumalnin dini kuduh Papang yaklauwi āna Moses munah Sinaí asangni yakat, witing dawak Israel balna karak.