Read Mayangna Levítico 27 Bible Online

Levítico 27 - Mayangna bible

Levítico 27

¹Papang yaklauwi Moses yakat kiwi kalyulna:

²“Israel balna yakat aput diyultah: Israel balna kidika pramis as launin kukulwakat Papang yakat, dawak kidika laih muih as minit praisni karang kat,

³dawak al kidika kurih 20 kaupak 60 kat praisni duwa kidika laih minit āma lalah andat papusbah, kidika laih Papang ūni kidika lalahni praisni ki;

⁴yal karang kat, kidika minit laih lalah dadasni 30 karang.

⁵Muih kidika kurih singka kaupak muihasluih laihna karang kat, witing launin kidika laih lalah dadasni 20 karang, al karang kat, kaunah yal karang laih lalah dadasni salap karang.

⁶Muihbinina waiku singka kaupak kurih singka laihna karang kat, minitlaunin kidika laih lalah dadasni singka karang, dawak yalbin karang laih lalah dadasni bās karang.

⁷Muihbararak kurih 60 minit yakat laihna balna kidika laih, witingna launinna kidika laih lalah dadasni 15 karang al karang kat, kaunah yal karang laih lalah dadasni 10.

⁸Dawak minit lauwarang muihni kidika uba minikunni karang kat, kidika muihni laih sumalyang yakat duwi kiuna karang bahang kaput laih sumalyang kidika yaklauwi minit ūk āwi kalana karang, witing ampus launin sip prais yamwa kidika kat.

⁹“Tinglau balna kat Papang yakat kalanin kidika laih, tinglau bitik Papang yakat kalawa kidika laih maisihnidis kalna karang,

¹⁰bahang sip-awas karang tinglau ūk karak wirihna atnin, kau yamni, kidika awaskat kau dutni karang bik. Kidika tinglau wirihwarang kat, kalawa kidika bik dawak duwada kidika bik Papang dini kalna karang.

¹¹“Tinglau as maisihni kulna kidika, Papang yakat kalanin sip-awas kidika sumalyang yakat duwi kiuna karang

¹²dawak ampus launin kidika āwi kalana karang, tinglau kidika yamnipa kidika awaskat dutnipa bahang kidika yakat talwi minit āna karang. Sumalyang yaklauwi minit āwa kidika laih yakat karang,

¹³dawak tinglau kidika watwi dunin kulwarang kat, praisni āna kidika minit yakat watsingka sahyakna kidika as lakwi kalana karang.

¹⁴“Muih as kat ūni kidika Papang dini yakwarang kat, sumalyang yaklauwi uni minit kidika āwi kalawarang. Dawak sumalyang yaklauwi minit āwa kidika laih yakat karang.

¹⁵Kaunah witing ūni kidik Papang yakat kalana kidika watwi laihwi yaknin kulwarang kat, minit ampus āna dai kidika kaupak sahyakna singka kidika as minit yakat lakwi kalana karang, kaput laih ū kidika watwi witing dini kalna karang.

¹⁶“Muih as kat witing sauni kidika apis Papang yakat kalawarang kat, sauni pīsni kidika minit āna karang, diminik ampus yakwarang kidika praisni kat, lalah dadasni 50 kat, cebada kidika batal nunuhni 220 karang.

¹⁷Sauni kidika, laihwi yakwa kurihni kaupak Papang dini yakna karangkat, minit ampus āna kidika ban kaput karang;

¹⁸kaunah, laihwi yaknin kurihni usnit kat Papang dini yakna karangkat, sumalyang yaklauwi kulwi talwi dawi lalah kidika kalanin karang, praisni āna kidika apis dakpamwarang, laihwi yaknin kurihni kiwi kawarang kat baisa ampus sakkidika karak.

¹⁹“Sauni Papang yakat kalana kidika watwi dunin kulwarang kat, sauni minit ampus kulna kat baisa minit yakat sahyakna singka kidika as minit yakat lakwi kalawarang, dawak kaput laih sauni kidika witing dini ban duwarang;

²⁰kaunah laihwi yakwas karang kat, sauni kidika muih ūk yakat bakanpamwarang, kaput karang kat witing watwi laihwi yaknin sip-awas karang.

²¹Sauni kidika, laihwi yaknin kurihni kaiwikawak laihwi yakna kat, kidika laih Papang manh dini karang, dawak sumalyang kidika tingni yakat bukna karang.

²²“Muih as witing sau bakanna kidika Papang yakat kalawarang kat, kaunah witing dini pahni awas karang kat,

²³sumalyang yaklauwi, kidika muihni karak, kalpakwi sauni minit kidik ahawarang, laihwi yaknin kurihni kaiwarang kat, dawak kidika muihni, sauni minit kidika launa karang, dawak Papang yakat kalana karang.

²⁴Laihwi yaknin kurihni kidika kaiwarangkat, sauni kidika wais yaklauwi wauhwi bakanna kat didawan tingni yakat watwi kiuna karang, yuldarang kat didawan palni tingni yakat.

²⁵“Di bitik minit awi kulwa kidika laih geras[20] 20 karang, kidika laih Papang ūni lalahni kau kulna karang.

²⁶“Turuh balna walaninabis tatuna yakwa kidika laih, Papang dini, kat tatuna yakwa bahang, kaput laih sip Papang dini yakwa lani kidika yamwas karang. Turuh bin, kidika awaskat sīp bin karang bik kidika laih Papang dini.

²⁷Tinglau as maisihni kulna kidika karang kat, laihwi yakna karang minit ampus āna kidika kat, dawak minit yakat lakna karang sahyakna singka kidika as. Kaunah laihwi yakwas karang kat, sipkarang wauhwi bakanpamnin minit ampus āna yakat.

²⁸“Muih as kat witing dini balna kidika Papang yakat kalawakat, muih karangpa, tinglau karangpa, kidika awaskat kalwanaih balna saunina karangpa, Papang dini kalalana kidika, sip watwi laihwi yayakwas karang dawak wauhwi bik bakakanwas karang; Papang dini kalna balna bitik kidika laih holi palni kalna karang witing dini karang.

²⁹Dawak kaput bik, muih as īnin yayakna kidika sip awas karang laihwi yakna atnin: kidika laih daunin karangki.

³⁰“Sau diminik yakwa kidika sahyakna salap kidika, di minik sani balna, dawak pan minik balna kidika laih Papang dini, bahang witing dini yakna ki.

³¹Muih as kat kidika sahyakna salap kidika laihwi yaknin kulwarang kat, minit ampus kulna kidika launin ki, dawak minit yakat sahyakna singka kidika as lakwi launa karang.

³²“Tinglau salap kidika kaupak as yakna karang turuh karangpa kidika awaskat sīp karangpa, kidika laih Papang dini karang,

³³walwi yaknin awaski yayamni manah kidika awaskat dudutni manah, dawak ūk wirihnin awaski. Uk karak wirihnin karangkat, tinglau tatuna kidika, dawak wirihwak kalana kidika bupak Papang dini kalna karang, kaput bahang sip awas karang laihwi yakna atnin.”

³⁴Adika lani balna kuduh Papang yaklauwi Moses yakat kalana dai kidika Sinaí asangni yakat, Israel balna dinina.