Read Mayangna Levítico 3 Bible Online

Levítico 3 - Mayangna bible

Levítico 3

¹“Muih as kat witing tingnilau balna kaupak, turuh almuk karangpa, turuh yal karangpa kat duwi kulnin aslah dunin yulni sakripais buswarang kat Papang yakat, kidika tingnilau laih sakahwa kapat atnin awaski, yamni atnin ki.

²Minitdis dini duaiwa muihni kidika, witing tingni dulauwi yunin ki tinglau tunan minit yakat, dawak usnit kat, kalpapakwa ūni labanni dūrni kiwikawa yakat dinimak dakna karang. Dawak sumalyang balna kidika laih āni kidika duwi rarasna karang sakripais buswa pāni kidika minit yakat dawak yaihnit balna yakat bik.

³“Watwi Dawan karak yamni kalahnin yulni sakripais buswa tingnilau kidika, Papang muhni tani yakat duwi kiuna atnin ki, minitdis kalanin dini busna as kapat, tingnilau muihni paskau salani balna duwa kidika,

⁴kihnimak balna, dawak dangni kau salani balna duwa kidika, isning yaihnitkau salani balna duwa kidika laih kihnimak balna karak libitwi dakyaknin ki.

⁵Sumalyang balna yaklauwi yayamwak kidika dini balna kidika sakripais busnin pāni yakat dahlna karang, dimuihni balna kidika yakarak libitwi kuh dahlwa minit yakat ihilwak, minitdis kalanin dini busna walapni as kapat Papang yakat.

⁶“Muih as witing tingnilau kaupak Papang yakat dukiwarang kat, sakripais busna atnin, Dawan karak watwi yamni kalahnin yulni, kidika tingnilau laih almuk atnin ki, kidika awaskat yal atnin ki, kaunah sakahwa awas atnin ki, yamni.

⁷Sīp as duyawama kat Papang muhni yakat,

⁸tingma kidika sīp tunan yakat ilma, usnit kat kalpaknin ūni labanni muhnit yakat dinimak dakna karang. Kaput laih sumalyang kidika yaklauwi āni kidika duwi sakripais busnin pāni minit yakat dawak yaihnit yakat bik rasna karang.

⁹“Angdika muih, witing watwi Dawan karak yamni kalahnin yulni tinglau as sakripais yamwa kidika, kidika tinglau laih Papang yakat duwi kiuna atnin ki, minitdis kalanin dini as busna kapat, salani, mamahni kidika sarpuk dakna karang, dawak bāni paskau salani duwa balna kidika,

¹⁰kihnimak bupak dawak kihnimak salani kidika, dawak kaput bik dangni salani balna, kaput bik isning kau salani balna duwa kidika, bitik laih kihnimak bu kidika karak libitwi yakna karang.

¹¹Usnit kat sumalyang kidika yaklauwi kidika balna bitik busna karang sakripais busnin pāni minit yakat ilwi, minitdis kalanin dini kasnin as busna kapat Papang risnipik usnit yakat.

¹²“Tinglau as dukiwa kidika kuts karang kat, Papang muhni yakat dukiwarang kidika

¹³kuts kidika tunan yakat tingni yuwarang, dawak usnit kat kalpaknin ūni labanni muhni tani yakat dinimak dakna karang. Kaput laih sumalyang balna yaklauwi āni kidika sakripais busnin minit yakat raswarang dawak yaihnit balna yakat bik rasna karang.

¹⁴“Tinglau duaiwa muihni kidika, sīpki laihwi duwi kiuna atnin, minitdis kalanin dini as busna kapat, Papang ayangni risnipik kau, bāni paskau salani balna bitik,

¹⁵kihnimak bupak, salani balna kidika, dawak salani balna dangni kau duwa kidika, dawak isning kau salani duwa kidika bik, kihnimak kidika karak banawi yakna karang.

¹⁶Usnit kat sumalyang kidika yaklauwi kidika balna laih busna karang sakripais busnin pāni minit yakat ilwi, minitdis kalanin dini kasnin as busna kapat, walapni yamni as. Salani bitik kidika laih Papang dini.

¹⁷“Adika laih lā as ban kaput karang, papangnina kaupak walaninabis balna kat bayakna karang, angdika pāni yakat yalahtanama karang bik: salani kidika dawak ā kidika bik kasnamna awaski.”