Read Mayangna Levítico 4 Bible Online

Levítico 4 - Mayangna bible

Levítico 4

¹Papang yaklauwi Moses yakat kiwi kalyulna:

²“Israel balna yakat diyultah, muih as isning aiwas dutni yamwarang kat, Papang lani balna as niningkauh, dawak yamnin dini awas dai kidika yamwarang kat, aput yamna atnin karang:

³“Dutni yamna kidika sumalyang tatuna kidika yamna kat, kaput yamwi tawan kidika pat yakat āwarang kat, Papang yakat sakripais as yamna karang turuh almuk as yamni sakahwa awaskat kat, dutni yamna kidika yulni.

⁴Papang muhni yakat dukiwarang, kalpaknin ūni labanni kiwikawa yakat; kidika yakat witing tingni dulauwarang tunan yakat, usnit kat Papang muhni tani yakat dinimak dakwarang.

⁵Usnit kat witing silp turuh āni kidika apis duwi kiwarang kalpaknin ūni labanni yakat;

⁶kidika yakat witing tingni bikis kidika kau suihwi dawi raswarang wat tiaskaubu Papang muhni tani yakat, dawakat maisihnidis pāni dūrni kau asnina rina kidika niningyakat.

⁷Sakripais busnin pāni kau tamni balna yakat bik apis ā kahna karang, buswak walapni yamni purnin kidika dini kaupak —kidika laih Papang muhni yakat sakki, kalpaknin ūni labanni yakat—, āni kidika bitik laih sakripais buswarang pāni sar yakat utuhna karang, kalpaknin ūni labanni kiwikawa kau sakyakat.

⁸Usnit kat turuh almuk sakripais yamna kidika, muih dutni yamna kidika yulni, bāni paskau salani duwa kidika bitik laih yakna karang

⁹kihnimak bupak, yaihnitkau salani balna duwa kidika, dawak dangni salani bik, kaput bik laih isning kau salani duwa kidika bik, kidika balna bitik kihnimak balna karak libitwi yakna karang,

¹⁰sihm, turuh almuk kau yakwa kapat, Papang karak watwi yamni kalahnin yulni sakripaisni buswi. Kidika usnit kat sumalyang kidika yaklauwi sakripais busnin pāni yakat ilwi busna karang.

¹¹Kaunah turuh unitak, dawak muihni, tunan kidika karak libitwi, barahnimak, bāni, dawak yusyamnin di awaskat ruhmwa balna kidika

¹²—yuldarang kat, turuh kidika bitik—, ū labanni kaupak ahni yayakna karang pa as maisihni dis klin kat, wan uhuhwa yak, dawak wan uhuhwa minit yakat kuh buiwi kuh ulwi dahlwi bibiwarang.

¹³“Israel muihni balna bitik isningna aiwas dutni yayamwarang kat, duwak witingna as bik isningna aiwas karang kat, Papang lani niningkauh yayamwa kidika, dawak kaput laih witingna dutni yamyang kakalna kat,

¹⁴kaput kaunah witingna amanglalawa minitni yak, witingna kalpakwi turuh as duwi uiwi sakripais yayamna karang dutni yayamna kidika yulni. Bahang duwi uiwarang kalpaknin ūni labanni muhni niningyakat,

¹⁵dawak tawan muihnibararak balna kidika turuh tunan minit yakat tingnina dulalauwarang, Papang muhni tani yakat dinimak dadakwarang.

¹⁶Usnit kat sumalyang kidika yaklauwi turuh alni kidika apis duwi kiwarang kalpaknin ūni labanni yakat,

¹⁷tingni bik kidika al yakat suihwi wat tiaskaubu raswi bayakwarang Papang muhni tani yakat, maisihni dis pāni kau asna rina kidika nining yakat.

¹⁸ā kidika apis kahna karang sakripais busnin pāni kau tamni duwa kidika yakat Papang muhni tani kau kidika, kalpaknin ūni labanni yakat. Dawak ā sutni bayakna kidika bitik laih sakripais busnin pāni kidika sar yakat utuhna karang, bahang kidika laih kalpaknin ūni labanni kiwikawa akat sakki.

¹⁹Dawak turuh salani kidika bitik laih dakwi yakna karang, dawak sakripais busnin pāni minit yakat ilwi busna karang;

²⁰yuldarang kat, adika tuniruh almuk laih, sihm turuh almuk sakripais buswa kidika, muih dutni yamna yulni, sihm kaput yamnakarang, kaput laih sumalyang kidika dutni dawak disnin kidika duna karang kidika balna dutni yayamna dai kidika, dawak dutni yayamna dai kidika dawak disna karang.

²¹Usnit kat turuh almuk kidika ū labanni kaupak ahni yakat yakwi busna karang, tatuna turuh almuk as dai kidika amput yamna dai kaput yamna karang, kat kidika laih tawan dutni yamna yulni sakripais yamwa bahang.

²²“Tunan muihni, dutni yamwarang kat, Papang lani nining kauh, witing laih dutni yamna muihni as karang, witing isning aiwas dutni yamna karang bik.

²³Witing dutni yamna kidika amanglawarang kat, minitdis kalanin dini as dukiwarang kuts almuk as sakahwa awas yamni kat.

²⁴Witing tingni kidika kuts almuk tunan minit yakat dulauwarang, dawak papang muhni tani yakat, tunan dakwarang, tinglau balna bubuswarang pāni yakat, kat dutni yamna yulni sakripais yamwa bahang.

²⁵Usnit kat sumalyang kidika yaklauwi, witing tingni kau ā kidika apis duwarang dutni yamna yulni tinglau sakripais yamwa kidika kaupak, dawak sakripais buswa pāni kau tamni balna yakat kahna karang, usnit kat ā sutni bayakna kidika, sakripais buswa pāni yakat utuhwarang.

²⁶dawak salani balna kidika sakripais buswa pāni minit yakat ilwi buswarang, sihm, watwi Dawan karak yamni kalahnin yulnikat, sulani balna buswa kaput yamna karang. Kaput laih sumalyang kidika tunan muihni dutni dawak disnin lani kidika duna karang, dawak dutni yamna kidika dawak disna karang.

²⁷“Muih minikunni as isning-aiwas dutni yamna kat, kaunah yamna balna kidika papang lani niningkauh kat,

²⁸witing dutni yamna kidika amanglawarang kat, kuts yal as duwi kiwarang kaunah sakahwa awaskat minitdis kalanin dini as, dutni yamna kidika yulni.

²⁹Witing dutni yamna kidika yulni tinglau as duaiwa kidika tunani minit yakat tingni dulauwarang, dawak usnit kat sakripais buswa pāni yakat dinimak dakwarang.

³⁰Kaput laih sumalyang kidika yaklauwi, lā kidika apis duwi sakripais busnin kau tamni balna yakat kahna, dawak ā sutni bayakna kidika laih sakripais busnin pāni sar yakat utuhna karang.

³¹Dawak salani duwa balna kidika bik dakwi yakna karang, sihm Dawan karak watwi yamni kalahnin yulni kat sakripais buswi yamwa kapat yamna karang, dawak busna karang walapni yamni as papang yakat, Kaput laih sumalyang kidika witing munah dutni dawak disnin lani kidika duna karang, dutni yamna muihni kidika.

³²“Kidika muihni sip as duaiwarang kat dutni yamna kidika yulni sakripais busnin, sip yal kat duainin sakahwa awas yamni kat.

³³Sip kidika tunani minit yakat tingni dulauwarang, dawak usnit kat dinimak dakna karang, dutni yamni yulni sakripais yamwa bahang, tinglau iwi bubuswa pāni yakat dukiwi.

³⁴Kaput laih sumalyang kidika, witing tingni kau ā apis duwarang, tinglau sakripais yamnin yulni īna kidika kaupak, dawak sakripais busnin pāni kau tamni balna yakat kahna karang, dawak ā sutni watna kidika laih sakripais busnin pāni sar yakat utuhna karang.

³⁵Usnit kat salani balna bitik dakwi yakwarang sihm, watwi Dawan karak yamnin kalahnin yulni kat sip iwi sakripais yamwa kaput yamna karang, dawak salani kidika sakripais busnin pāni yakat ilwi busna karang, minitdis kalanin dini Papang ayangni kau buswa kidika karak libitna karang. Kaput laih sumalyang kidika dutni dawak disnin lani kidika duna karang, dutni yamna kidika dutni dawak disna karang.