Read Mayangna Levítico 5 Bible Online

Levítico 5 - Mayangna bible

Levítico 5

¹“Muih as kat kalyulwarang, witing kidika kiwi di talna, dawak dakana balna kidika yulna atnin, bahang kidika muihni yulwas malwarang kat, dutni as yamwi, bahang kidika dutni laih witing trukna karang.

²“Muih as kat, maisihni kulna dini kidika laihwarang kat, tinglau, kidika awaskat asangpas dini bik maisini kulna kidika dauna karang kat, kidika awaskat bil karangpa kat, witing laih maisihni kalna karang, kaput laih witing alas patni, isningaiwas yamna karang bik.

³“Muih as, ūk maisihni kulna muihni yakat laihwarang, kidika awaskat di ūk bik maisihni kulna kidika laihwak maisihni kal-laihwa kidika, kaunah witing isning aiwas karang kat kidika minitni yakat, kaunah usnit kat amanglawarang bik witing kidika uman dutni yamna.

⁴“Muih as sirihni palni pramis yamwarang kat, di yamni as yamnin kidika awaskat di dutni yamnin karang bik —kidika satni pramis as isning aiwas yamwa kidika yamni kulwi talwas—, kaunah witing isning aiwas kat kidika minitni yakat, kaunah usnit kat amanglawarang kat, witing kidika dutni yamna as ki, angdika dini yamna karang bik.

⁵“Dutni balna kalna manas kidika paskaupak as dutni yamna kat, witing dutni yamna kidika malwas laih yulwi yaknin ki dutni yamna kidika

⁶dawak Papang yakat duwi duna karang, tingnilau balna kaupak as yakat, sakripais yamna atnin dutni yamna kidika yulni; bahang ting lau kidika yulni; bahang ting lau kidika sipki sip, kidika awaskat kuts atnin dawak kidika sakripais kau dutni dawak dunin lani kidika duna karang sumalyang munah.

⁷“Sip almuk bin as bakannin sip-awas karang kat, Papang yakat duwi kiunin ki, buhtuku bikisni bu, kidika awaskat buhtuku walanibis bu witing dutni yamni yamna kidika yulni: as kidika laih dutni yamna kidika minit karang, dawak ūk kidika laih sakripais karauni kauna busnin dini kalawarang.

⁸Sumalyang yakat duwi kiunin karang, dawak dutni yamna yulni sakripais busnin kidika tatuna sakripais yamna karang, dininamak yakat laihwi wirna karang, kaunah tunan kidika bitik laih dakyakpamnin laih awaskarang;

⁹usnit kat āni kidika apis duwi, sakripais busnin pāni sar pirini as yakat rasna karang, dawak āni ūk kidika bik tirisna karang sakripais busnin pāni sar yakat, kat dutni yamna yulni sakripais buswa bahang.

¹⁰Dawak ūk kidika laih duwi karauni kauna sakripais busnin kidika yamna karang, amput yamnin kidika yakat, kaput laih sumalyang kidika muih dutni yamna dutni dawak disnin kidika duna karang.

¹¹“Buhtuku bikisni bu dawak buhtuku walanibis bu bik bakannin bik lalahni dis karang kat, plawar tanit yamni kidika paun arungka duwi kiuna karang minitdis kalanin dini, dutni yamna kidika yalni. Disala utuhnin awaskarang dawak walapni busnin bik minit yakat bahanin awas karang, kat dutni yamna yulni minitdis kalanin dini duwi kiwa bahang.

¹²Sumalyang yakat duwi kiunin karang, dawak tingkurus buhng duwi, Papang kau minitdis kalanin dini busna karang sakripais busnin pāni yakat bahang kidika lain isning-katnin as karang. Kidika laih minitdis kalanin dini as karang dutni yamna yulni,

¹³kaput laih sumalyang, witing muih dutni yamna dawak diswa kidika dunakarang, ais ampat dutni yamna karangbik kidika muihni. Dawak minitdis kalnin dini di minik balna duwi kiunin kidika, sutni watwa balna kidika laih sumalyang dini karang.”

¹⁴Papang, Moses yakat kiwi aput kalyulna:

¹⁵“Muih as isning-aiwas dutni yamwarang kat, dawak kidika laih Papang dini balna maisihni disnin yakat dutni yamna karang kat witing tingnilau balna paskaupak kuts as sakahwa awas kat duwi kiwi sakripais yamnin ki witing pātni kidika yulni, dawak Papang yakat duwi kiunin. Kutsni kidika minit laih lalah kau kulnin ki, maisihnidis pāni lalahni kidika karak, pātni yulni minitdis kalanin dini kidika.

¹⁶Kidika muihni laih minit launa karang, di maisihni dis balna yakat dutni yamnin kulwi yamna kidika, minit yakat sahyakna singka praisni sumalyang yakat kalana karang. Usnit kat, pātni yulni kuts sakripais yamwa kidika, sumalyang munah pātni dawak disnin lani kidika duna karang, dutni yamna muihni kidika, dawak kaput laih dutni yamna kidika dawak disna karang.

¹⁷“Muih as dutni yamwarangkat, papang lani nining kauh, isning-aiwas karang bik pātni kidika laih trukna karang ki.

¹⁸Kaput laih tingnilau balna paskaupak kuts as yakna karang sakahwa awaskat, tingnilau minit kidika man lawa kulta yaknamki, dawak sumalyang yakat duwi kiunin karang, pātni yulni sakripais busnin kaput laih muih as isning aiwas dutni yamna kidika, dutni dawak disna atnin, bahang kaput laih dutni dawak disna karang.

¹⁹Pātni yulni sakripais yamwa kat, kidika muihni laih papang nining yakat pāt duyang ki.”