Read Mayangna Levítico 6 Bible Online

Levítico 6 - Mayangna bible

Levítico 6

¹Papang yaklauwi Moses yakat kiwi kalyulna:

²“Muih as kat ūk niningyakat dutni kulwi alasni kalyulna karang kat Dawan muhni yakat, wanaihni yakat alas kalyulwi dini as yulwi duna kidik, kidika awasbik dini as dakyakna dai kat,

³kidika awaskat wanaihni dini as diswak yakna bik talasyang tarangkat, kidika bik pramis alas bik yamna karang kat, (kidika balna angdik yamwarang kat dutni kulna karang),

⁴kidika dutni yamna kidika laih witing pātni karang. Kaput bahang malna balna, witing parasni kau laihwi dakyakwi duna, kidika awaskat disna kat yakna balna kidika bitik laih nawatwi dini dawan yakat uiwi kalanin,

⁵dawak di ūk pramis alas yamna balna kidika bitik. Di balna bitik kidika di dawan yakat uiwi kalanin karang, dawak baisa minit yakat sahyakna singka kidika kaupak sahyakna as kidika minit lakwi kalanakarang witing pātni kidika yulni sakripais yamwarang mani yakat.

⁶Papang yakat sakripais yamnin kidika kuts as duwi kiunin ki kaunah sakahwa awaskat, kidika minit laih man lawa ānam ki, bahang kidika tingnilau witing kaupak tingnilau kaupak dunin ki, dawak sumalyang yakat dukiwak pātni yulni sakripais yamnin.

⁷Kaput laih Papang kaupak duna karang dutni dawak disnin kidika ais dutni yamna balna bitik kaupak laih dutni yamna muihni kidika dutni dawak disna karang.”

⁸Papang yaklauwi Moses yakat kiwi kalyulna:

⁹“Aarón dawak walanibis balna yakat bik sumaltah amput sakripais as karauni kauna busnin kidika: Sakripais busna dini kidika ban dawak kuh tuturni minit yakat payahwarang, kaput laih kuhpau kidika yaklauwi busna atnin.

¹⁰Sumalyang kidika witing asnina balna kawarang dawak ilpni kidika bik linin asnina kat awarang, usnit kat tinglau as sakripais busnin pāni minit kau uiwi busna wanani balna kidika bitik uduhwi sakripais buswa pāni yaihnit yakat labangwarang.

¹¹Usnit kat witing asnina balna kidika yakmukwi ū balna kidika ūni labanni paskaupak ahni nai yakat yakmukwarang, pa as maisihni dis pāni kat.

¹²“Sakripais busnin pāni kau kuh dahlwa kidika apis bik pinin awaski. Sumalyang kidika mapiris bitik yakat kuh kidika kuh pasyakat ānin ki dawak tinglau balna īna kidika minit yakat papat ilna karang busnin dini balna kidika, dawak kaput bik laih watwi Dawan karak yamni kalahnin yulni salani buswa kidika bitik ihilwak busna karang.

¹³Sakripais busnin pāni kau kuh dahlwa kidika laih apis bik pinin awaski, ban dahlwa sak atninki.

¹⁴“Adika sumalnin balna laih plawar minik kau amput minit dis kalanin kidika yulni: Sumalyang balna kidika yaklauwi sakripais busnin pāni nuhni yakat dukiwarang, dawak Papang muhni tani yakat bik.

¹⁵As yaklauwi plawar minitdis kalanin dini duaina kidika kaupak tingkurus bung duwi dawi dini sala bik duwarang, kaput laih walapni busnin kidika bitik banawi kalawak sakripais busnin pāni minit yakat dahlna karang, isningkatwa atnin yulni, minitdis kalanin dini busna walapni as karang Papang yakat.

¹⁶Dawak minit dis kalanin dini sutni bayakna balna kidika laih Aarón dawak walanibis ahal balna kidika karak kakasna karang, papangni dini dis atnin dawak pa as maisihnidis yakat kaput bik laih kalpaknin ūni labanni kaupak ahni yakat.

¹⁷Pupuhnin dini karak banawi lahnin awaski. Witingna yakat apis danayang minitdis kalanin dini busnayang kidika kaupak, dawak kidika dini laih maisihni dis palniki sihm dutni yamna dawak pātni yulni sakripais busna kapat.

¹⁸Nining kaput karang ma balna kaiwarang yakat, Aarón sulani ahal balna kalahwi aiwarang bitik kidika sipkarang, minit dis kalanin dini Papang yakat busna kidika kaupak apis duwi kasna atnin. Di ais karang bik minit dis kalanin dini busna yakat uswi bayakwarang kat, kidika dini laih Papang dini kalna karang.”

¹⁹Dawan yaklauwi Moses yakat kiwi kalyulna:

²⁰“Adika minitdis dini, Aarón dawak sulani balna bik duwi uinakarang Papang yakat, witingna kidika papang dini diyakna karang mani yakat: plawar tanit yamni kidika paun bu papus wayah kidika mapiris yakat kalanin karang, dawak papus wayah ūk kidika laih maulahu yakat, ma as bik dawak bayaknin awaski.

²¹Minitdis kalanin dini kidika ridi yamtanama, kaunah yamni bahatanama disala karak, dawak kidika usnit kat pīsni dakta duyawanama, minitdis kalanin dini walapni as dawan yakat.

²²kaput yamwi ridi yamnin ki sumalyang tatuna palni Aarón sulani kidika, witing pāni yakat Papang dini yakna atnin; kidika laih nining ban kaput Dawan dini kulna ki, bahang kaput laih bitik palni busna karang

²³Sumalyang balna minitdis dini duwi uiwa kidika laih bitik palni busna karang; muih as bik kasnin awas karang.”

²⁴Dawan yaklauwi Moses yakat kiwi kalyulna:

²⁵“Aarón dawak walanibis balna yakat sumaltah, muih dutni yamna kidika yulni amput sakripais yamnin kidika: Tinglau duaiwa kidika dutni yamna kidik yulni sakripais yamnin, kidika laih Dawan muhni kat tunan dakna karang: tinglau busnin dini balna ihiwa pāni yakat, kat kidika laih holi palni dini bahang.

²⁶Sumalyang, witing muih dutni yamna yulni sakripais buswa kidika kaupak sipkarang kasnin, kaunah kidika laih holi pāni yakat kasna karang, Kalpaknin ūni labanni watakni yakat.

²⁷Ais karang bik dimuihni yakarak libitna karangkat, dini kidika laih Papang dini kalna karang, dawak āni kidika asna yakat raswi laihna karang kat, holi pāni yakat suhnin karang.

²⁸Sau suba kau dini muihni lahna kidika, subani kidika laih sahpamnin karang, kaunah bras subani kau lahna karang laih, dauh manah suhwi yakna karang.

²⁹“Adika sakripais laih holi palni ki. Sumalyang balna manah sipkarang kasnin.

³⁰Kaunah sip-awas karang tinglau as muih dutni yamna kidika yulni iwi āni kidika Kalpaknin ūni labanni yakat duwi kiuna kidika, dutni yamna kidika dawak disnin holi pāni yakat. Kidika sakripais yamwa kidika laih kuhpau kau busna karang.