Read Mayangna Jeremías 1 Bible Online

Jeremías 1 - Mayangna bible

Jeremías 1

¹Jeremías yulna dawak yamna balna, Hilcías walanibis. Jeremías kidika sumalyang balna sulanina, Anatot pāni yak yalalahwa balna dai kidika kaupak, dawak Benjamín sulani balna panina yakat.

²Papang, Jeremías yak yul kalbauna Josías Amón walanibis Judá sauni yak king kawa kurih salap minitkau bās mani yakat.

³Joacim, Josías walanibis Judá kingni kana mani yak bik Papang yulkalbauna dai, dawak Sedequías, sihm Josías walanibis kurih salap minit kau as king kana mani; waiku singka sihm kidika kurihni, Jerusalén muihni balna panina kaupak yakna.

⁴Papang yang akat kaiwi aput yayulna:

⁵“Baisa sangmaka matasyang kau, mawaltik yakna yang dai; baisa batahn datasman kau, ma apakna yang dai; nisan balna yakat yang yulki yulnam mawaltik yaknayang.”

⁶Biri nangnitlanayang: “¡Papangki! ¡Yang adika baisa wahma yang dawak yulbaunik bik sip awas yang!”

⁷Kaunah Papang aput yayulna: “Baisa wahmayang yulwinih. Angkat yang masihki kidika yawama ki, dawak yang ais mayulki kidika man yulma.

⁸Muih as bik yamanina dunam awas ki, bahang yang man karak awakiki, main matalnik. Yang, Papangma lawik, yang yulki kidika matayang.”

⁹Bahang Papang tingni dulauwi tikpas yakat pakwi yayulna:

¹⁰“Yang yulki balna kidika tampas yakat ātayang. Warmani parasni bitik matayang, king balna lanina dawak nisan balna minitna yakat, iswi dutnin dawak tuklaknin bahwi disyamnin dawak tiknin bik, dawak laihta dulauwi yamnin, dawak dahnin bik.”

¹¹Papang yang akat kaiwi aput yayulna: “Jeremías, ¿ais talamanh?” Bahang kalyulnayang “Pan tingni as talayang.”

¹²“Rahm yultaman —Dawan yaklauwi yayulna—. bahang talasak-awah[1] yang yulki balna kidika rahm kalahna atnin.”

¹³Papang watbu yang akat kaiwi aput yayulna: “¿Ais as talamanh?” yatna, dawak nangnitlanayang: “Suba kau was lahwak talayang, tingpal niningkaupak kaupak wahr'ilwi utuhnin manah sak ki.”

¹⁴Bahang Papang aput yayulna: “Tingpal niningkaupak dutni kidika kaiwarang adika sauni muihni balna yalalahwa bitik minitna yakat.

¹⁵Yang Papangyang kat yultayang, tingpal niningkauh muihni balna kidika bitik yulting aiwarang. Dawak kingnina balna kidika Jerusalén kau kiwi kāwa yakat witingna trunnina kidika ahawarang, daklana balna bitik muhni tani yakat dawak Judá tawanni nunuhni balna niningna yakat bik.

¹⁶Adika wahni sihki kidika yang lani ātik dukiki, yang kaupak dakwi kalahwi dutni yamna muihni balna niningna yakat, kat dawan dauh kidika witingna yamwi kidika yakat minitna yuyulna bahang.

¹⁷Dawak, man kulnam dadasni dutah; yang ais mayultikda kidika bitik yawa diyultah. Yamanina bik duwinih, adika yamtas awama kat, muhnina tani yakat mayamting muihsakdautang mayukwarang.

¹⁸Waradika tawan nuhni parasni duwa as kapat mahatayang, dawak ū rahni nuhni ayan manah kapat, dawak itikwi lana, bras kau manah, bahang kaput Judá sauni kidika nining yakat lawana atnam; kingni balna, tanituna balna, sumalniyang nunuhni balna, dawak tawan muihni balna bitik niningna yakat.

¹⁹Witingna makalbabauwarang kauna mamat bayayakwas karang, kat yang man karak awaki namat dakna atnik. Papang yang lawik mayultayang.”