Read Mayangna Jeremías 10 Bible Online

Jeremías 10 - Mayangna bible

Jeremías 10

¹Israel tawanni, dakah; Papang man yakat mayulwa kidika.

²Papang yulwi: “Nisan ūk balna yayamwa yakat talwi yayamwinih, datanangkat makau kisang yakat sain kalahwa kidika mana murnin awaski kidika nisan balna yayamwa kapat.

³Kidika tawanni balna lānina laih dauhki. Asangpas yak pan as dakwi duwi uiwakat, di wayani yamyang muihni kidika yaklauwi pahrwi wayani yamwi,

⁴usnit kat lalah pihni dawak gol karak libitwi yaksinh yamwi, dawak silak duwi amar kau pawi bukwas atnin yulni.

⁵Papang dauh balna kidika laih, sihm yamak yak didauh balna di kakaswak muih wayani yamwi sitwi ihilwa kapatki; yulbabauwaski dawak bik trukwi dukiunin sakki, lapapakwas bahang. Manna yamaduduwinih dutni bik mai yamwaski dawak yamni bik mai yamwas ki.”

⁶Papang, man kapat ūk diski: man laih nuhniman, ayangma laih nuhni dawak parasni bik duwi.

⁷¿Wais yamaduwas yah nisan balna kingnina? Man laih yamamadunin ki. Sau akat sins duyang balna dawak king balna bitik kau, ūk diski man kapat.

⁸Witingna bitik tapanina dadasniki, sinsnina yudutni bik awaski. ¡Pan dakni as kidika sip sumaldaski!

⁹Dawak daninawan dauh balna kidika laih lalah Tarsis kaupak duahaina dawakat gol kidika laih Ufaz kaupak; kidika dini balna laih muih yayamna dawakat asnina paisa, pauni karak ahana, adika dini balna bitik lan balna yayamna.

¹⁰Dawan kidika laih rahm Papang, Papang sangka kidika, dawak king ban kidika. Kulnin daukalwak, sau kidika isihwi; nisan balna kidika sip awas kalalahwi.

¹¹(Israel balna, manna yang akat yakukulwas muihni balna yak diyultanauh: “Dawan dauh balna, makau kisang, sau bik yayamwas dai kidika didisna karangki sau akaupak, makau kisang dinit yakat as bik watwas karangki.”)

¹²Papang parasni kau duwi, sau adika yamna; sinsni tuhni kau, di balna bitik yamna; dawak sinsni sirihni kau makau kisang kidika yamna.

¹³Dinit alwana kapat yulwak, was kidika parasni yulwi, makau kisang yakat, sau sutni kaupak kalawak mukus kidika kilwi, yamwak alwana kidika yaringni lapwi, waslauwa pasyak dawak wing kalawak kalahwi apakna sakkidika kaupak.

¹⁴Muih kidika laih tapani dadasni, dawak di amanglawaski. Dawan dauh alas diyuyulwi, yamyang muihni balna yakat: kidika balna laih wayani manah ki, dawak bik alasmanah ki.

¹⁵Kidika dini balna laih minit diski, karinin dini manahki, Dawan la yamwarang yakat bahwi disyamwarang ki.

¹⁶¡Jacob Papangni kidika ais satukyah, di balna bitik yamyang kidika! Israel kidika witing dini yakwi duna. Papang parasni nuhni bitik duwi, bahang kidika laih witing ayangni.

¹⁷—Man nimasan, ma-awaihdadakna, bahang dima balna bitik anata dutah.

¹⁸Kat Papang aput yulwi: ‘Waralaih adika muihni balna saunina kaupak naikau ruhmtik daki ki. Kulninna tikini diyamki ki, kaput laih yang talna awaki yāyayakwarang[11] pa.’

¹⁹—¡Alakaih yang laih, yadaukalna kidika! ¡Muihki yadakna kidika, yāyamnin sinika diski! ¡Dawak kulnayang, adika dalani minit bayaknik sip-awas kulnayang dai!

²⁰Yang ūki labanni dutayang dai kidika daukalpamna, wahni sitna kidika bitik dakyamna. Walakibis balna bitik yaruhmwi dadana, ¡yang karak awaski! Watwi ūki labanni balna kidika pakwi yanin muihni diski, asnina bik rapangwi yanin muihni diski.

²¹—Adika tawanni sumalniyang balna laih tapanina dadasni ki; Papang yak wawalwaski. Kidika bahang dutni yak uina, dawak sīpnina balna bitik kau pini didisna.

²²¡Yamni dakanauh! ¡Yul wisamni as kai'kawi! Tingpal niningkauh pāni kaupak, alwana parasni yulwi kaiwi, kidika laih, Judá sauni pāni kidika daukalpamwarang ki walang as kapat, dawak walang sunilu balna manah panina duduwarang ki.

²³Papang yang amanglatayang, sau muihni kidika alas sangnika duwaski, tanit yak ais kalkalahwarang kidika amanglawaski.

²⁴Man lāma kat barangni yanayaktah, dawak kulnam anna karuk laih awaski, kat kaput laih yanadaukalma bahang.

²⁵Kulnam anna kidika datang bukwang nisan balna man kau amangmalalawas balna minitna yakat. Jacob tawanni kidika kasmumukna bahang, bitik palni daukalmumukna sauni adika daukalpapamna.