Read Mayangna Jeremías 11 Bible Online

Jeremías 11 - Mayangna bible

Jeremías 11

¹Papang yang akat kaina, Jeremías, dawi aput yayulna:

²“Israel balna yamni dakakawang, adika pramis akat, yulbautah Judá muihni balna yakat, dawak Jerusalén muihni balna yakat bik,

³dawak diyultah yang, Papang Israel Papangni yang, adika lā ātayang, angdika muihni kat adika pramis bayakwi yamwarang kat dutni palni karang.

⁴Adika pramis yamna yang dai muihmana bararak balna karak, Egipto kaupak yaknayang mani dai yakat, sau as ayan buswi arnin pāni as kapat dai kidika kaupak. Diyulnayang: yulki daka yamtanauh, di bitik yang manapaktayang kidika, kaput kat manna kidika yang tawanki awanama, dawak yang kidika manna Papangmana awaki.

⁵Manna yulki dakanama kat, yang pramis yamnayang kidika muihmana bararak balna yakat sau diana atnik, bahang kidika sauni laih waradika dutamana, tāwas dawak amak karak was kapat kira kidika.” Dawakat nangnitlana yang: “Agha, Papang.”

⁶Kaput laih Papang yaklauwi yayulna: “Sarahta yulta adika yulni, Judá tawanni nunuhni yakat, dawak Jerusalén tawanni pasyakat bik. Di yulta muih balna yakat: ‘Dakanauh angdikayah pramis yamnin balna kidika, dawak yulna kaput yamtanauh.

⁷Yang Egipto kaupak yaknayang kat, muihmana bararak balna, kamanah diyulna yang dai, yang akat manah yulki dakanin, kaput laih kidika kaupak warmani yultayang ban ki.

⁸Kaunah yulki dakakawas dai, dawak bik, dakawi yayamwas dai, kaunah nawatkauh laih kulninna dutni yakauh di duwi kiuna. Yang lawik yamnin paknayang kaput yamnin yulwas dadana, dawak kaput laih pramis diyamtik dutni kaiwarangki atnayang dai kidika, sihting kaina dai.’ ”

⁹Papang baisa yang akat yayulna: “Judá muihni balna, dawak Jerusalén muihni balna laih yang niking kauh yaklalauwi.

¹⁰Watwi nawatwi uiwi, sihm muihnina bararak balna dutni yayamna dai yakat, kidika balna laih yul dakawas dadana dai, dawak, dawan dauh balna yakat uiwi minitna yuyulna. Israel yamna kapat Judá bik yamna, muihnina bararak balna kau pramis yamnayang dai kidika babahna.

¹¹Kaput bahang dutni as sihki kidika kaupak muih as bik kiri yaklawas karang. Baisa sarahta ilp yultanama bik, manadakas awaki. Yang Papangyang kat yultayang.

¹²Kaput dawak Judá muihni balna, dawak Jerusalén muihni balna, witingna uiwi ilp yuyulwarang dawan dauh balna kau walapni bubuswa yakat, kaunah witingna sip dilaihwi yakwas karang yuhlakwarang kat.

¹³Judá laih dawan dauh mahni duwi tawan nunuhni mahni kapat, dawak Jerusalén muihni balna laih pa manas yayamna Jerusalén tawanni nuhni paskau ta manas kapat yayamna dai walapni busna atnin.

¹⁴Kaput bahang Jeremías man mamatyulwinih adika muihni balna yulnina, witingna yulnina mamatyulwinih dawak kalki dinit yakat bik bukwi yulwinih, kat yuh lakwak yang akat yuyulwak dakas awaki bahang.

¹⁵“¿Israel dalani matalayang kidika ais waltaman yang ūki yakat, di dutni manas yamna man usnit kat? ¿Kultaman disala[12] dawak dimuihni sakripais yang akat yatang yuh kidika diswarang kultamanh, dawak man kaupak kalahwi kiwarang[13] kultamanh?

¹⁶Ma ūk balna yakat yang Papangyang kat yulnayang dai, witingna laih Olib panan nuhni yamni as kat minik yayamni yakwa kapat; kaunah waralaih alwana parasni yulwa kau basni balna kidika buski ki, dawak tingni bik kalating kalahwi buswarang.

¹⁷“Yang, Papang paraski nuhni dutayang, dahnayang, dawak yang lawik paknayang, witing nining yakat dutni kalahnin, Israel dawi Judá karak dutni yayamna kidika yulni, yang akat yauhusna, Baal yakat walapni buswi.”

¹⁸Papang yaklauwi nikingkana, waihkila balna nikingkauh dutni yayamwa kidika. Witing yaklauwi mikpa uluhna, yang amanglana atnik.

¹⁹Yang laih kulnik di as dis yamni sakyang dai, sīp as inin pāni kau duwi uiwa kapat, amanglatas yang dai nikingkauh dutni yamnin, yamwabang kidika. Yayulwadai: “Dakpamdang pan nuhni waradika sangni yamni[14] sak kidika; adika sauni sangka balna paskaupak dakdi yakpamdang, kaput laih muih as bik watwi isningnakatwas karang, witing kidika.”

²⁰Kaunah man, parasma bitik dutaman Papang, man laih lā yamyang as barangni man; man amanglataman, muih as ais amput malni kau kidika bitik. Yamtang talki, amput panis diataman, kidika muihni balna, kat yang yulki balna bitik man tingma yakat ānayang.

²¹Dawakat, Anatot ahalni balna, laihnin wawalna, dawakat yapapakwadai Papang ayangni kau dutik yulbaunik awas, daunik want-awas yang kat.

²²Papang parasni nuhni bitik duwa kidika yaklauwi aput diyulwi: “Manna yanamna kidika manalaihki ki: wawahma balna kidika laih kalbaunin yakat dadauwarang, dawakat walamabis yayal dawak ahal kidika laih yuh kau dadauwarang.

²³As bik yaklauwas karang, kat mani balna kaiwi manna, yanamna kidika manalaihnik mani, Anatot ahalni balna, manna mamatna yakat yuh kidika kaiwi.”