Read Mayangna Jeremías 12 Bible Online

Jeremías 12 - Mayangna bible

Jeremías 12

¹Papang man karak tuki āki kat, man rahmma dutaman kidika banki; kaput kaunah mayultik dakakih yawi, amput dawak di as as kidika kaput kalahwi. ¿Amput dawak muih dudutni kidika, yamni ban yah? ¿Amput dawak isningnalak yalalahwi malni kau dutni balna kidika?

²Man lawa dahtaman, dawak witingna riknina duduwi, bararakwi, dawak minik yayakwi. Yulnina kau laih, yaihnitna yakat maduduwi, kaunah kulninna pasyakat laih man kaupak naikau ki.

³Man, nawat kauh laih, Papang, amangkilataman; man yatalaman, dawak amanglataman, angdikapa yang kulnik kidika man namangyakat. ¡Kidika muihni balna duyawah, sīp balna inin pāni kau duwi uiwa kapat; mampat inin mani kidika atah!

⁴¿Mampat kat sau adika buhlana karang yah; dawak dibasta balna kidika kusulawarang yah? Didauh balna dawak dilawani duwa balna kidika daulalawi, adika sauni muihni balna dutni yayamna yulni, dawak witingna kukulwi yayamwa balna kidika man talasman.

⁵“Muih kalkau lapakwi uiwa balna niningna yakat irang masuhwakat, ¿amput sip awama yah kalsaranam aras kau kikilwa balna yakat? Sau as dutnidis ismanglak dakaman, ¿kaunah amput yammayah Jordán asangnipas damasni yakat?

⁶Wirahma balna palni karang bik, man wanaihma balna bik, malni kau ma ihina ki, dawak dangmat kau sarahwi mauhusna ki. Witingna yakat muih yamni dikulwinih, yul yayamni kau yakwi yulmababauwarang karang bik.

⁷“Tawanni ruhmtik danayang, yang diki dai kidika dapamnayang waihnila. waihninala balna tingnina yakat ānayang, nisan as dalani talayang dai kidika.

⁸Adika tawanni yang diki dai kidika, waralaih yang niking yakat layan as asangpas kau kapat kalna; ihwi niking yakat, kidika bahang talkihyāwas yasuhki.

⁹Yang tawanki laih uhubin as butuni yamni yaksinh kapatki uhu binina ūk yaklauwi babauwa kapat. ¡Aiwanauh didauh anyang balna bitik, kaluduhta kasnin alasnina dutanauh!

¹⁰Waihla tunan muihni balna manas, wainki yanimak daukakalna, sauki kidika kalnina kau atatakna. Kauhmak wanilang kapat yayamna, sau as yang wantawas yang kidika.

¹¹Kauhmak wanilang yamwi dadana, di dis, dawak yang talayang kaidak. Kabamint sauni bitik kauhmak wanilang kalna, kaunah muih as bik kulwi kalbauwaski.

¹²Kauhmak wanilang kau ubulni bitik kau yakat, tatalna ahal kulninna dutni anyang balna, kat yang Papang isparah as dutayang, adika kabamint sauni sutni kaupak sutni as kat daukalna karang, dawak kulnin aslah lani kidika muih as bik duwas karang.

¹³Plawar minik dahwi, pan ukuning duwa kat babahna; di yayamna kidika bitik dauh kalna. Di minik bahnin dai kidika daukalna yang kulnik daukalnayang yulni.”

¹⁴Papang aput yulwi, tawan dudutni balna yulnina, Israel yaihnitkau bangkidika yulnina, bahang kidika muih dudutni balna yaklauwi Israel sauni kidika daukakalna, Papang yaklauwi diana dai kidika dipahni: “Yang lawik saumana kaupak manadaktik yakki, dawak Judá kidika yakki witingna paskaupak.

¹⁵Kaunah daktik yakki usnit kat, wattik miniknakunni talki, dawak yamting kat watwi saunina yakat aiwarang.

¹⁶Rahm palni laih witingna yaklauwi, tawanki yakat niningna kakana Baal yakat pramis yamnin, kaunah waralaih sip karang tawanki papus yakat ana atnin, rahm palni tawanki Daniwan kau kulwa kidika duduwarang kat, yang ayangki kau yakwi aput yuyulwarang: ‘Papang sangnika kau.’

¹⁷Kaunah angdika nisan as yang yulki dakawas karang kat, daktik yakki rikni kau, dawak bahtik dis yamki. Yang Papangyang kat kaput yultayang.”