Read Mayangna Jeremías 13 Bible Online

Jeremías 13 - Mayangna bible

Jeremías 13

¹Papang yulna: “Yawa bamak sitnin as bakanta, dawakat bamamak sitta, kaunah was suihwinih.”

²Yang bamak sitnin kidika bakannayang, Papang yamnin yāpakna dai kaput, dawak bakimak yakat sitnayang.

³Papang watwi yulyabauwi, yayulna:

⁴“Bamak sitnin bakanta sitna likman kidika duta Eufrates wasni yakat duyawa malpamta, kipala sahna walsah yakat.”

⁵Kaput laih Eufrates wasni yakat yawik malpamna yang, Papang yayulna dai kaput.

⁶Ma mahni bayakwa kat, Papang yayulna: “Yawah Eufrates wasni yakat, dawak duaitah bamak sitnin malpamtah matnayang dai kidika.”

⁷Eufrates wasni yakat yawanayang, sau yakat walnayang, dawak bamak sitnin dai kidika yaknayang, malpamna yang pāni dai yakat tuskat, kaunah uman dutlana dai, watwi dunin sip awas dai.

⁸Kaput dawak, Papang baisa watas yang akat kaina,

⁹dawi yayulna: “Kaput daukalki ki, Judá dawi Jerusalén karak, witingna manah kapat kaldakakawa kidika.

¹⁰Adika tawanni dutni yang yulki dakawi yamnin yuyulwas ki, dawak witingna alas isningna kau kukulwa yakat uiwi. Dawan dauh balna usnitna yakat uiwi, dini yamnin dawi ayangni nuhni yamnin bik, sihm bamak sitnin daukalna kidika kapat, sip yusyamdaski.

¹¹Bamak sitnin yamni mabakimak sitda kapat Israel tawanni kidika dunayang, dawak Judá tawanni kidika bitik yang karak aslah uduhwi dawak kaput yang tawanki atnin, ayangki kidika muih yakat niningnakana atnin, dawakat ayangki nuhni yamnin, alaskina bik atnin. Kaunah yulki dakawas dadana. Yang, Papang yang kat kaput yultayang.

¹²“Dawak bik diyultah: ‘Israel Papangni yulwi: Angdik was punin dini kidika sipki wain punin.’ Israel balna nangmatlalawarang: ‘¿Amangladas katpah was punin angdik, angdik sip kidika wain punin?’

¹³Dawak man lawa nangnitnalama: ‘Papang yulwi: Adika sauni akat yalalahwa balna bitik kau wasak iki; king balna, Devid yalahwa sinini kau yalalahwa balna bitik, sumalyang balna, prapit balna, dawak muih bitik Jerusalén kau yalalahwa balna yakat.

¹⁴Usnit kat sahna awaki was punin dini kapat, biri biri, papangni dawak, walanibis bitik kapapat. Miniknakun talas awaki dalani ditalas bahtik dis yamki. Yang, Papang yang kat yultayang.’ ”

¹⁵¡Israel balna, Papang yulbauna! Manna manah kapat kaldakakawinih, yamni dakanauh.

¹⁶Papangmana yakat ayangni nuhni yamtanauh, baisa witing puksani kidika kalawak kaiwas tanit kauh, dawak kalmana bautanama asang dudutni puksani yakat; baisa witing yaklauwi puksani yakat wirlawas tanit kauh, puksani tikini, manna yaringni tahatamana pāni dai yakat.

¹⁷Manna yul dakas awanama kat, malni kau aidaki manna manah kapat kaldakamana kidika yulni, mikpa kaupak mikwas kidika kirarang, kat Papangki sīpni balna kidika silak kau duwi uiwa bahang.

¹⁸“King yakat kalyultah, dawakat yalni yakat bik: ‘King yalahnin kaupak lakwanauh, dawak sau yakat yalahtanauh, kat tunamana kaupak bukna king paknin yaksinh paktamana dai kidika.’

¹⁹Néguev tawanni nuhni dai kidika, awaihdaklalana; muih as bik sip bayakwaski. Judá muihni balna bitik laihwi duwi uina.

²⁰Mamaknapa dulauta talnauh, waihmanala kidika amput kaiwih tingpal nining kaupak. ¿Angkat sakyah sīpki uduhna as witing yakat kulnik rahm kalkulnayang dai kidika, dawak kidika sīpni uduhna yaklauwi man manah kapat madulauwadai kidika?

²¹“¿Jerusalén, ais yulna yah, man lawa sumalna man muihni balna yaklauwi mamat yakat kabamintma kakawarang kat? Dalani kaiwarang man yakat, sihm yal muih duwarang kapat.[15]

²²Dawak yulta dakama amput dawak aput kalahwi, man amanglanam ki, dutni yamnaman yulni kaput kalahwi; ¡kidika bahang wahma dudutna, minit bayak dutni mayayamna!

²³¿Sip yah sani kidika kaupak satuk kalahnin? ¿Sip yah nawah unitak kau sani likna kidika tapwi yaknin? Manna bik sihm kaput laih, dutni manah amanglata mana bahang sip yamni yamtas mana.

²⁴Kidika bahang manna manaruhmki ki, sihm, sihrsihr kusulana kat, kauhmak wanilang kaupak wing kaiwi wauhwi duwi kiwa kapat.

²⁵Kidika kaput makulna sakki muhnilau kaupak Israel, yang kaput mamat manikki. Yang, Papang yang kat kaput yultayang. Man damatkahna yang kidika, dawak dawan dauh balna yakat kulnam kalkulna man.

²⁶Yang bik lawik wahma kidika bitik dutki, dawak asalma kalahwarang.

²⁷Uba dukih mawa kidika talnayang, dawak muih ūk karak bik alangwanaman kidika, dawak asalma yamtaman di dutni, matikingdulihni yamtaman, asang ububulni akat, dawak asangpas yakat bik. ¡Alakaih man, Jerusalén! ¿Ma ampus kat dutni yamtaman kidika ban yamma yah?”