Read Mayangna Jeremías 14 Bible Online

Jeremías 14 - Mayangna bible

Jeremías 14

¹Ma buhni lakwa yulni, Papang, Jeremías yakat kiwi aput kalyulna:

²“Judá, kulnin bukwak kaidi tawanni nunuhni balna kulninna bik bukna, muih balna kidika sau yakat manah ki. Jerusalén parasni sarahwi, dalawak.

³Di duyang muihni balna yaklauwi sisihwi, dinina yamyang balna yakat, was butna atnin; sau kuhrna yakat uiwi, kaunah yayakwaski, suninalun pāni manah nawatwi uiwi, sip yakwas dawi asalnina nuhni duwi tunanina mumukwi.

⁴Yamak muihni balna bik, sip yayakwas ki, dawak tunanina mumukwi, kat was lauwas bahang, dawak sau kidika bitik buhni manah ki.

⁵Didauh balna bik, asangpas yakat, walaninabis kidika ruhmwi dadawi, kat dibasta dis bahang, kasnin.

⁶Asangpas biriniku kidika, kauhmak wanilang paskau ubulni balna yakat kilwi, wing duwi chacal kapat dawak minikpa puksani manah kalwi, kat dibasta kasnin dis bahang.”

⁷¡Papang, dutkina kidika yaklauwi dutni yanayamwak bik, man ayangma nuhni yamnin kidika kau kulta yamtah! Wat manas man kau dutni yamnayangna, man namang yakat dutni yamna yangna.

⁸Israel man yakat tama tahawi, mailaihta yakna atnin ma dutni kidika kaupak, ¿amput dawak adika sauni kaupakman awas kapat yamtaman, awaihyang muihni as pukta aslah watwi payahwi bayakkiwa kapat yamta manh?

⁹¿Amput dawak muih al as kulnin disna kapat manh, kalbauyang muihni as sip tingnisut laihwas kapat? Kaunah Papang, man mapasking yakat sakman, muih bitik amanglalawi man tawanma yangna kidika; ¡mairuhmwi dawinih!

¹⁰Papang yulwi Israel tawanni adika yulni: “Adika tawanni laih dukih kalawi, pini pa ūk, ūk yakat lik-atnin. Kidika bahang yamni kaltalasyang. Waralaih dutni yamna balna kidika isingkatki ki, dawak witingna yakat minit kalyulki ki.”

¹¹Papang yayulna: “Kalki dinit yakat bukwi yulwinih adika tawanni yamni atnin yulni.

¹²Uba di kastas yuh wauhma bik, kalki dinit yakat bukta yultaman bik dakas awaki ki, sakripais mahni busma, dawak di minik minit dis duaima bik, yamni talas awaki. Yang lawik bahtik dis yamki, kalbaunin kau, yuhkau, dawak yamah kau bik.”

¹³Dawak yang lawik nangnitlana yang: “Kaunah, Papang; prapit balna yaklauwi diyuyulwi tawan yakat kalbaunin dis karang ki, yuh diskarang ki, dawakat man lawa adika pāni akat kulnin lani aslah māki ban kaput atnin.”

¹⁴Kaput dawak Papang yaklauwi nangkitlana: “Kaput yang ayangki kau duwi prapit balna yuyulwa kat, witingna alas yuyulwi. Yang lawik sihtas yang, dawak bik yang lawik paktas yang, dawak yulbaunin bik yul dibautasyang. Kidika laih alas, witingna silp yaklauwi walwi yayakwi. Kidika yulni kuduh sumamalwa kidika, kidik pranipit balna.

¹⁵Yang Papang yang kat yultayang, kidika pranipit balna yang ayangki kau duwi yulnin kukulwi, yang lawik sihtasyang bik, dawak kalbaunin bik, diskarang atwi, yuh bik diskarang ki atwi adika sauni akat: Kidika pranipit balna, kalbaunin yakat dadauna karang ki, dawak yuh kau bik.

¹⁶Dawak angdika tawanni witingna tunan duduwa dai kat, kidika balna bik kalbauna yakat dadauna karang, dawak yuh kau bik, yalnina, walaninabis ahal, yayal bitik dadauwarang. Muihnina kidika Jerusalén tawanni pasyakat ruruhmna karang, dawak muih as bik diskarang nuna atnin. Kaput laih dutni yayamna kidika minit lalauwarang.

¹⁷Tawan yakat aput kalyultah: ‘Yang mikwas kalahwang, mikpa kaupak, madah, pukta, laihwatwas; yang tawanki kau dutni yamadangni kidika yulni, witing kalina kidika laih daunin dini.

¹⁸Asangpas yakat alahwayang kat, talayang muih dadauna kidika, kalbauwi dadauna; tawan nuhni pasyakat awayang kat talayang muih yuh dadauwa kidika, prapit dawak sumalyang balna kidika laih, sau ūk kau uiwi, pa tatalwas pāni yakat.’ ”[16]

¹⁹Papang, ¿Judá kidika bitik kau dutni kulnamahn? ¿Sayan tawanni nuhni kidika, masuhdanayah? ¿Amput dawak muihkina yakat daktadah tahata talas data? Tahana yangna dai, baraknin, kaunah di yamni as bik yangna yakat kiwas ki. Muihkina yamni atnik tahana yangna, kaunah mabilki launin manah ki.

²⁰Amanglatasyangna, Papang, dutkina kidika, dawak bik muihkina bararak balna kau bik dutni yayamna kidika; man namang yakat dutni yamna yangna.

²¹¡Man ayangma nuhni yamni kau, mai ruhmwi dawinih; maisihni talwinih tawan nuhni kidika, kat yakat man yalahnam alasnina kidika sak ki! ¡Ismangkattah man yangna karak pramis yamnaman kidika, kidika datang bayaknin awaski!

²²¿Dawan dauh balna pasyakat as sip lik kat pah, yamwak waslaunin? ¿Kisang kidika witing alas yaklauwi kalawak was lauwa katpah? ¡Dikah, yang Papangkina! Man lawa sihtaman, man lawa adika dini balna bitik yamtaman; ¡kidika bahang man yakat tama taldi!