Read Mayangna Jeremías 15 Bible Online

Jeremías 15 - Mayangna bible

Jeremías 15

¹Papang, yayulna: “Moisés dawak Samuel, witingna akat aiwi, muhki akat yaklalauwarang bik, adika tawanni minikun talas awaki. Diyultang kat, yang muhki kaupak kalahwi, mahka uiwang.

²Dawakat mayulwi dakakawarang kat, angkat uininna kidika, yang yultayang kidika diyultah: ‘Yamah kau daunin dikulna kidika laih, yamah kau daunin; kalbauwi daunin kalkulna kidika laih, kalbauwi daunin; yuh kau daunin kalkulna kidika laih, yuh kau daunin; sauni kaupak kangwi yaknin kalkulna kidika laih kangwi yaknin.’

³“Yang, Papang yang kat kaput yultayang: Sihkiki wah satni arungka: war kau ihina karang, sul balna dimumurwarang, yakal balna di kakasna karang, dawak nawah balna dikakaswarang.

⁴Yamting kat nisan balna bitik muihsak dadauwarang, witingna yakat yamki kidika, Judá kingni Manasés, Ezequías walanibis, Jerusalén yakat yamna yulni.

⁵“¿Wais mamakun matalwarang yah Jerusalén? ¿Wais kulnin dalani madakawarang man yakat? ¿Wais kulwi kalbauwarang yah muihma nuhni siknis kidika yulni?

⁶Man yaruhmta danaman, dangbuh danaman. Papang yang kat kaput yultayang. Kaput bahang, yang kulnik laihwatna manah yasuhdana, dawak tingki dulaunayang wah manayang, dawak mabahtik dis yamnayang.

⁷Muihma balna kidika kalating ruhwi disna, sihrsihr kusulana kapat, sau paskau, tawan nuhni balna paskaupak yaknayang, walanibis dis danayang tawanki kidika, bahtik dis danayang, kat sangnika dutni kidika danin awas kulna bahang.

⁸Witingna pasyakat tingmak kauh mahni danayang, kuma kauhnimak karak dawakat. Madah matunak palni yakat daunin kidika dating bukna nanang balna walaninabis wawahma duduwa balna yakat; isningna aiwas kat, minitna yakat kalating bukna, muihsak dawak kaidinin karak.

⁹Nanang balna walaninabis mahni duduwa kidika sangka dadauna, wingninata dis dadana; asalnina karuk dinit yak bubukna, madah yaringni kidika witingna niningna yakat puksani kalna. Buas sangninaka duduwa kidika laih waihninala balna tingnina yakat āting ihiwarang. Papang yang kat, yulki manatayang.”

¹⁰¡Alakaih, yang nanangki, yang akat sangkika yanaman kidika sau akat, muih balna bitik niningna yakat kalbaunin manah yang! Muih as kau bik lalah wayakī yuyulwak diatasyang, dawak bik wayakī yultik dutasyang, kaput kauna muih bitik laih dutni yayuyulwi.

¹¹La yatutuhwa kidika yakat bik kalahwang,[17] Papang, man yakat yamni dima yamtas yang dai kat, kalma dinit yakat buktik yultas yang dai kat waihkila balna ilpnina, witingna kidika dutni yakat bubukna mani dai yakat.

¹²“¿Wais sipyah bahna atnin tingpal niningkauh ayan[18] kidika dawakat bras kidika?

¹³Israel dutni yamna bitik yulni, waihmala yakat kalaki dima yayamni dutaman kidika bitik, minit dis duwi uiwarang ki.

¹⁴Warau mahaki ki waihmala tingni yakat, sau as man talasman pāni yakat, bahang mabuswi didis yamwarang.”

¹⁵Papang, man dibitik amanglataman kidika, ¡ismangkatta yang akat, aiwa tingkisut laihta! ¡Yamwi aiwa kidika birita diyamtah! Witingna niningna yakat baisa kulnam laihwatwinih, yadatang daunik awaski; talah man yulma wauhtayang, muih dutni yayuyulwak.

¹⁶Yulyabautang kat, yang yulma kidika kastayang dai, kidika balna yang alaskina dai ising yakat, kat yang adika man dimayang bahang, Papang parasma bitik.

¹⁷Yang kalpaktas yang dai muih alasna dunin manah kukulwa muihni balna karak; man yadunaman kaupak yang laih alas likyang sangkika adika, kat kulnam anna kidika manah yabūngdanaman bahang.

¹⁸¿Amput dawak, dalani dutayang kidika dahn kalwas yah? ¿Amput dawak muihki yadakna kidika sip yamwasyah? Yang niking yakat, pa kudungni tuhni kau was as talda kapatki.

¹⁹Kaput dawak Papang yaklauwi nangkitlana: “Nawatta yang akat aiwama kat, wattik maduki ki dawak ilp māki. Yul manah yulbaunin kidika data, di rahm kidika manah yulma kat, man kidika yang yulki balna yulma kat. Witingna kidika ki man yakat nawatwi ainin kidika, man lawa witingna yakat yawanam awaski.

²⁰Yang yamki ki man kidika adika tawanni nining yakat daklana as bras kau manah yamna kapat, minit bayaknin dadasni kapat. Wār mayayamwarang, kaunah mamat bayayakwas karang, kat yang man karak yang malaihtik yaknik. Yang, Papang yang kat, yulki matayang.

²¹Muih dudutni parasnina kaupak malaihtik yakki ki, ¡malaihtik yakki, muih kulnin dutni anyang balna parasnina kaupak!”