Read Mayangna Jeremías 16 Bible Online

Jeremías 16 - Mayangna bible

Jeremías 16

¹Papang, yang akat kaiwi yayulna:

²“Yal duwinih, walabis bik duwinih adika sauni akat.

³Kat yang Papang yang, di kalahwarang kidika mayulki ki adika sauni akat walabis batahn dadawarang balna yakat, dawak papangnina balna yakat bik.

⁴Dadauwarang yamah dutni kau, dawak muih as bik kakaidas karang witingna yulnina, laihwi bik nunuwas karang: sauyak manah karang diba kapat. Wār dawak yuh kau dadauwarang, dawak muihnina kidika yakal dawak nawah balna kakaswarang.”

⁵Papang yayulna: “Upas yakat kawinih, kidika ūni yakat muih dauna kat; kaidinih, dawak witing nining yakat dalani kulwinih, kat adika tawanni kaupak kulnik aslah lani kidika yakpamna yang, dalani lani dawak minikun talnin lāni bik. Yang, Papang yang kat yultayang.

⁶Nunuhni bik, dibinina bik dadauwarang adika sauni akat; muih as bik laihwi nuwas karang, dawak bik kaidas karang, muih as bik dalani wauhwi, muihni yakat dakwi, tunan bik kuhrwas karang.

⁷Muih as bik kasnin alasnina as bik yamwas karang, muih dauna wanaihnina balna kidika alasna diyamnin, papangni dawak nanangni dauna karang bik.

⁸“Dawak bik ūpas yakat kawinih, kidika ūni yakat kasnin alasnina yamwa bangkat, witingna karak yalahta di kaswinih dawak bik diwinih.

⁹Kat yang, Papang paraski nuhni dutayang, Israel Papangni yang kat yultayang: Yang yamting kat dahn kalwarang adika sauni akat alasna yayamwa kidika, dawak muih kalduduwak unbabauwa kidika bik. Adika kalahna karang witingna manina palni yakat, dawakat manna talnama.

¹⁰“Adika yulni tawan yakat isningna pakna kat, mayulwi dakakawarang: ‘¿Amput dawak Papang yangna nikingna kauh dutni nuhni yulna yah? ¿Ais dutni yamna mayahng Papang niningkauh?’

¹¹Man nangnitnalama: ‘Papang rahm aput yulna: Adika laih muihmana bararak balna yadawi dawan dauh usnitna yakat uina dai bahang, ayangni nuhni yamna atnin; yang laih yaruhmwi dadana dawak yang lawik yamnin diyulnayang dai kidika yamwas dadana.

¹²Dawak manna laih kau dutni yamna mana, muihmana bararak balna karak dawakat, manna bitik kau silp ismangna dutni yakat yawanamana, dawak yulki dakas dana mana.

¹³Kidika bahang adika sauni kaupak manayakmuki ki, yawanama sau ūk kau manna talasmana, muihmana bararak balna bik tatalwas dai yakat, kidika yakat pukta madah dawan dauh yakat dini yamtanama, manna yakat mamaknakun mana talas awaki.’

¹⁴“Kaunah mani kaiwarangki —yang, Papang yang kat yultayang— ayangki kau yaktik yultas awaki: ‘Papang sangnika kau, Israel kidika Egipto kaupak yakna.’

¹⁵kauna yuyulwarang: ‘Papang sangnika kau Israel balna kidika yakna, sau tingpal niningkauh yakaupak, dawak sau ūk balna kaupak bik, yakat pini rana dai yakat.’ Yang yamtingkat manna saumana yakat aiwanama, muihmana bararak balna kau sau dianayang dai yakat.

¹⁶“Dipamyang mahni kalating aiwarang —yang, Papang yang kat yultayang— Israel balna yakat pamwi laihna atnin. Usnit kat asangpas yakat kawi di iyang muihni balna sihting aiwarang ki, ina atnin, dawakat yakna atnin asangpas bitik kau, dawak asang ubulni kau yaka bik, dawak, ki nunuhni sahna walsah kau kakana yaka bik.

¹⁷Yamtamana kidika bitik talayang; as bik malni awaski yang kaupak, dutni yamtamana kidika bik sip maltasmana yang mikpa kaupak.

¹⁸Tatuna laih diyamting kat minit kidika watbu lamwi lalauna karang dutni yayamna kidika yulni, kat sauki yakat dutni yayamna, dawan dauh, dauyang kidika kau, dawak sau dianayang kidika bitik yakat yang talayang dutni yayamna, dukih yawas dini kidika yayamna.”

¹⁹Papang yang nakitdakyang dawak parasni, maldayang pāni ma yamadangni balna yakat; nisan balna kidika man yakat aiwarang, sau sutni kaupak aiwi mayuyulwarang: “Dawan dauh balna, yus dis, sip awas kidika mapapangkina balna duduna dai di pahni kidika.

²⁰¿Sip yah muih al kidika witing alas dawan dauh as yamwi dunin? ¡Kaput kat kidika balna, dawan dauh kidika laih rahm awaski!”

²¹“Kaput bahang wat aslah, paraski bitik niningnakaki; kaput laih amangkilalana karang, yang ayangki laih Papang.