Read Mayangna Jeremías 17 Bible Online

Jeremías 17 - Mayangna bible

Jeremías 17

¹“Judá dutni yamnaman kidika, ayan tiswi dakwa dini yakau ulna sakki, putma minik kipala yakat dawak bik walapni bustaman pāni kau tamni yakat bik.

²Walamabis balna isningnakatwarang walapni busnin pāni balna kidika, dawak bik king yalahnin Papang dini yakna pan nunuhni yaihnit kau dai kidika dawak asang ubulni tuna kau dai kidika yakat

³dawak asang nunuhni balna tuna kau bik. Dutni yamnaman kidika yulni, yamting kat, dima yayamni balna kidika mamalwarang asang ububulni balna maisihnidis kultaman balna yakat, kaput laih man sau bitik yakat kaput kalahna karang.

⁴Data alahwanamki[19] sau manayang kidika kaupak, di pahni as manayang dai kidika, dawak waihmala balna waraunina mayamki ki, sau as man talasman pāni yakat, kat kulnik daukalna kidika laih kuhpau kapat dahlna, bahang mabusna karang.”

⁵Papang yulwi: “Dutni palni karang, kidik muihni witing kulnin kaupak yāyakpamwa kidika, dawak muih ahal yakauh kulnin āwi duwi dawak kidika balna yakat ilp walwa kidika.

⁶Kidika laih sihm kauhmak wanilang kau pan bikikisni ukuswa kapat karang, muih as bik maintalwas kapat: kipala walsah yakat barakwi, dawak sauni kidika bik kuma manah yakat, muih as bik sip yalahwas yakat.

⁷“Kaunah yamni palni karang, angdik alni yang kau kulwa kidika, dawak kulnin yang yakat dawa kidika.

⁸Pan as was kung yakat dahna kapat karang, rikni balna kidika was parasni yakat uhr'āwa kapat, dawak ma daihwak bik yamaduwaski, udungni kidika sangni yamni duwi. Was buhlakwak bik kulnin abahlwaski, minik yakwa kidika dawas ki.

⁹“Alas yulnin dawak dutni[20] yamnin kidika ūk diski, muih al kulnin yakat sakkapat. ¿Wais sipyah amanglanin?

¹⁰Yang, Papangyang, muih isning kidika laihtik talayang, dawak kukulwa balna kidika bitik talayang; dawak diatayang witingna praisni kat, kaput bik wark ampus kalahna praisni kat.”

¹¹Muihni as kat dutni munah witing di duyang kalwa kidika laih, sihm wamba di lawani duyang ūk sumani kat kawi duwa kapatki. Witing muihni yamni parasni yakauna dini balna kidika damukwarang ki, dawak witni kat witing kidika mutu as karang ki.

¹²Mayang mamikit yulnin ūni kidika laih king yalahnin as alasnina nuhni kapat ki, tanit mani kaupak mayakat ilna ki.

¹³Papang, man yakat kuduh, Israel tahanin. Maruhmwi dadawa bitik kidika asalnina kalahwarang. Man kaupak naikau kalah'uiwa bitik laih pini disna karang, sau yahamni minit yakat muih ayangni as ulna kapat, man maruhmwi dadawa kidika yulni, was tuna buhrwa sanni yamniman kidika.

¹⁴Muihki yamni yayakta Papang, kaput laih yamni alahwaki; yalaihta yakta man, kaput yalaihwi yakna awaki, yang man yakat manah ayangma nuhni yamtayang.

¹⁵Muih yayulwi: “¿Angkat dawi Papang yulni dai kidika? ¡Warminitni kalahwang yulna kaput!”

¹⁶Dawakat kaput kaunah, yang wat wat yultasyang, man lawa dutni as sihta witingna niningna yakat,[21] dawakat dukihyawas ki witingna yakat dutni as kaiwarang kidika. Man yamni amanglataman yang yulnayang kidika, man sakman kat yulnayang.

¹⁷Yang niking yakat yamadangni as kalwinih, man laih yakmaldinin pāni yamni as man, ma dutni balna mani yakat.

¹⁸Dangkit yakat yauiwi aiwa balna yakat niningna ārah, kaunah yang akat laih awaski; witingna muihsak dadauwang, kaunah yang akat laih awaski. Witingna minitna yakat datang kaidinin kidika kaiwang, bahta dis diyamta wat wat ki.

¹⁹Papang yayulna: “Yawa tawan dūrni yakat lawah, kidika yakat, kalahwi, kawi, ahawa kidika Judá kingni balna; dawakat usnit kat Jerusalén dūrni balna yakat bik kaput yamtah.

²⁰Muih balna yakat diyulta: ‘King balna dawak, Judá tawanni bitik, Jerusalén muihni balna bitik, kidika dūrni munah kakawa kidika, Papang yulni adika dakakawang.

²¹Papang yulwi: Yakurupdinin mani,[22] dawak manna sangmanaka yamni atnin yulni, di trukwi duwi uiwinih, dawak bik Jerusalén dūrni munah ahawinih.

²²Yakurupdinin mani yakat di as bik trukwi yayakwinih ūmana kaupak, dawak kidika mani di as bik yayamwinih. Yakurupdinin mani kidika laih yang akat yatanauh, muihmana bararak balna kau yamnin diyulnayang dai kaput.

²³Kaunah witingna yulki dakawi yamwas dadana, nawatkauh kulninna dadasni yayamna dawak bik yul parasni balna kidika bik dakawas dadana.

²⁴‘Yang, Papangyang kat aput yultayang: Yulki adika dakanauh, yakurupdinin mani yakat di as bik trukta duyawanamna awaski, tawanni nuhni dūrni yakat; kidika mani kidik yang akat yatanauh, dawak di as bik yayamwinih.

²⁵Kaput yamtanama kat, Devid yalahwa pāni yakat king balna ban yalahwarang, dawak adika tawanni nuhni dūrni munah kakawarang, kār aras kau sitwi mumurwa yakau, dawak aras kau bik, tunan nunuhni balna kidika bik minikna dadana karang, Judá muihni balna, dawak Jerusalén muihni balna bik. Dawakat Jerusalén pāni kidik muih yalalahwa ban karang.

²⁶Judá muihni balna kidika aiwarang, Jerusalén yaihnit kau yalalahwa balna bangkidika kaupak, dawak Benjamín sauni kaupak bik, walang kaupak bik, Néguev wanilang, dawakat asangnipas kaupak. Makat yulnin ūni yakat didauh balna duahaiwarang sakripais busnin, minit dis kalanin di minik balna, walapni busnin, dawak kidika balna kidik minit dis tingki lani as yayamna karang.

²⁷Kaunah manna yulki dakasdata, yakurupdinin mani yang akat yatas data, dawak kidika, mani Jerusalén dūrni munah di trukwi ānin awaski atnayang kidika, trukta ātanama kat, tawan nuhni dūrni kidika kuhpau kau buski, kaput laih buswi dis yamwarang Jerusalén kau king uni balna kidika, dawak muih as bik sip piwas karang.’ ”