Read Mayangna Jeremías 18 Bible Online

Jeremías 18 - Mayangna bible

Jeremías 18

¹Papang yang akat kaiwi yayulna:

²“Sau kau diyamyang alni ūni yakat lakyawah dawak yakat yul as mayulki.”

³Yang, Jeremías lakwik yawik kalpaknayang sau kau diyamyang muihni kidika diyamwa sak kat.

⁴Sau kau duwi diyamwa sak kidika dutni kalwa kat, watwi yamwa dai sihm sauni yakau, witing amput yamnin kulwa kaput kalwi.

⁵Kaput laih Papang yayulna:

⁶“¿Yang sip awasyang kat pah aput manayamnik manna yakat Israel balna, sau kau diyamyang alni yamwa kaput? Manna laih tingki yakat sihm sau kau diyamyang alni tingni kau sau duwa sak kapat mana. Yang Papang yang kat yultayang.

⁷Minit as kat duttik yakkuhtik kultayang, tuklaknin dawakat bahtik disyamnik nisan as dawak king lani as yakat.

⁸Kaunah kidika nisan dutni kaupak dawi kalahwarang kat wah sihtas yang, sihnik yaknayang dai kidika.

⁹Wattik kultayang laihtik dulautik yamnik dawak kalating baraknin nisan as dawak king lani as.

¹⁰Kaunah kidika nisan dutni yamwi, dawak yultayang kidika dakawas laih di yamni balna sihnin yaknayang dai kidika sihtas awaki.

¹¹“Bahang Judá dawi Jerusalén muihni balna yakat diyultah, yang Papang yang kat yultayang: ‘Manna namangna kauh di as yamtayang; kulta sakyang wah mananik. Ta dutni kidika datanauh; yamtamana balna kidika yamni yamtanauh.’

¹²Witingna yaklauwi mayuyulwarang: ‘¡Dauh taimma diswinih! Yangna yalahkih yanawa kaput yalahtayangna, dawakat isingna dutni yakat usnit uitayangna.’ ”

¹³Kidika bahang, Papang yulwi: “Nisan balna yakat yulta dakanauh, muih as dakana pa di kaput as. ¡Israel tawanni didutni as yamna!

¹⁴¿Ma as as kat Líbano kinipala nunuhni tuna kau kidika mukus disdawi? ¿Was sanni yamni asang balna kaupak kalahwa kidika buhlakwarang katpah?[23]

¹⁵Kaunah tawanki muihni balna laih dinitna kahna yang adika, dawakat walapni buswi diayawi dawan dauh balna yakat. Tanina kaupak didisna lanina umani dai kidika bik, dawak ta as tatalwas dai yakauh uiwi.

¹⁶Kaput yamwi saunina dai kidika kauhmak wanilang yayamna, di as taldas dini kapat as. Muih bitik yakut bayakwi muihsak dauwi tunanina labahn labahn ahawarang.

¹⁷Yang laih, ma kilwa wingni as kapat aiwik Israel kidika kalating ruhwarang; yamting kat yamaduwi kirarang waihnila kaupak. Yang dangkit yak laki, muhki laih diatas awaki, witingna wah duduwarang mani kat.”

¹⁸Muih balna yuyulna: “Di as yamdi Jeremías kidika mayang kaupak dispamdarang. Sumalyang as bik dis awaskarang mai sumalnin, dawak sins duyang muihni balna bik dis awaskarang yul mai sumalnin, prapit bik dis awaskarang Papang yulni balna kidika mayang yak mai sumalnin. Alasni yuldak ipapamwang. Di yulwa balna bitik as bik dakadas mawang.”

¹⁹¡Papang yadakah! ¡Dakah waihkila balna yuyulwa kidika!

²⁰¿Di dutni kau launin yah, di yamni minit kidika? ¡Witingna sauki ū kukuhrna! Ismang aitah man namang yak lawik yultayang witingna ilpnina, man kulnam daukalna kidika witingna kaupak naikau lanam yulni.

²¹¡Kaunah waralaih yamtang kat walaninabis balna dadauwang yuhkau kidi awas kat isparah kau; tingmak kakalwang dawak bik walaninabis disdadawang yalnina balna kidika! ¡Yamah kau alnina balna bitik dadauwang, dawak walaninabis wawahma balna laih kalbauwi dadauwang!

²²Witingna niningna yakat sirihni dimalyang balna uduhna as sihta; ¡sararahwak yamadadangni kidika dakakawang! Kat sau as kukuhrna yalalaihna atnin, dawak takipas yakat yalaihnin dini ūk bik ahana.

²³Kaunah man Papang witingna yainin yayamna kidika bitik amanglata man. ¡Didutni yayamna kidika datang disnin awaski; dawak bik damatkahwinih! ¡Yamtang man namang yak bubukwahng, dawak wah diatah kulnam daukalna kidika kau!