Read Mayangna Jeremías 19 Bible Online

Jeremías 19 - Mayangna bible

Jeremías 19

¹Papang yayulna: “Yawa sau kau was butnin yamna kidika as bakantah, dawak muihbararak balna as as, dawak sumalyang bararakni as as yultang aiwang.

²Usnit kat Ben-hinom sauni langni yak yawah Tiestos dūrni[24] muhnit yakat dawak yakat sumaltah yang yul mayulki kidika.

³Diyultah: ‘Judá kingni, dawak Jerusalén muihni balna dakanauh Papang parasni nuhni bitik duwa kidika yulni balna; Israel Papangni: Di dis danin wahni sihki ki adika pāni akat, dawak muih bitik dakakawarang kidika adika yulni witingna mutu kapat kakalwarang.

⁴Kat Israel balna yaruhmwi dadana, dawak adika pāni sau taldas as kapat yayamna, kidika yakat walapni bubusna dawan dauh balna yakat, dawak kidika daniwan dauh balna kidika witingna tatalwas dai, dawak muihnina bararak balna tatalwasdai dawak Judá kingni balna bik tatalwasdai, dawak muih pini balna dai yakauh ānina utuhna.

⁵Baisa minityakat sakripais busnin pāni yayamna walaninabis kidika busna atnin Baal yakat, kidika dini yang lawik diyultasyang dawak bik dipaktasyang, yang kulnik yakat bik kultas yang kaput.

⁶Kapat bahang mani balna kaiwarang adika pāni baisa Tofet papakwas karang dawak bik. Ben-hinom sauni lani atwas karang, kauna yuyulna karang ihina sauni langni. Yang, Papangyang kat yultayang.

⁷Adika pāni akat bahtik disyamki Judá dawak Jerusalén karak yamnin kukulwa kidika. Yamting kat waihnila balna yaklauwi minit bayayakwarang, dawak ihiwarang, dawak muihnina balna kidika yakal, nawah balna kakasna karang.

⁸Adika tawanni nuhni kauhmak wanilang as yamki, bilninalaunin kapat as. Muih bitik yakat bayayakwarang kidika talwi muihsak dadauwarang, bitik bahtik dis danayang kidika.

⁹Yamtingkat muih balna kidika silp walaninabis yakauna kaswarang, dawakat biri biri kalkakaswarang, mani balna dutni kidika yulni, bahang kidika laih waihninala balna yaklauwi diyayamna karang, diawaihdakwi, witingna tawannina nuhni yakat.’

¹⁰“Adika yulma usnitkat, was butnin dini sau kau yamna dai kidika ruhmta bahma, man karak bangkidika muhnina tani yakat,

¹¹dawak diyulta: ‘Dawan parasni nuhni bitik duwa kidika yulwi: Adika tawanni nuhni adika bahtik dis yamki, sihm was butnin dini sau kau yamna kat sahwa kapat, bahang kidika laih watwi laihwi yamnin dini awaski. Muih dadauna balna kidika Tofet yakat nuna karang, kat pa ūk dis bahang nuna atnin.

¹²Aput yamki adika tawanni nunuhni dawak muihni balna niningna yakat. Tofet ampat kat kapat witingna bik kaput diyamki. Yang, Papang yang kat yultayang.

¹³Jerusalén ūni balna, Judá kingni balna ūnina, dawakat ūnina tuna kau walapni bubuswa dai kidika, kisang kau di balna yakat, dawakat dawan dauh balna kau minitdis wain diayawa dai kidik; dutni dikulna lani as karang, sihm Tofet kapat.’ ”

¹⁴Adika usnit kat. Jeremías nawatwi kaina dai Tofet kaupak, kidika pāni yakat Papang yaklauwi sihna dai witing ayangni kau yulbauna atnin, dawak Papang uni watakni yakat yaklauwi yulna muih balna bitik yakat:

¹⁵“Papang parasni nuhni bitik duwa kidika, Israel Papangni, bahang aput yulwi: ‘Adika tawanni nuhni dawakat yaihnit kau tawan balna bitik yakat wah sihkiki, dawak kidika bitik laih isningna paknayang, kat tapanina dadasni yulki dakawas dadana bahang.’ ”