Read Mayangna Jeremías 2 Bible Online

Jeremías 2 - Mayangna bible

Jeremías 2

¹Papang yang kat kaiwi aput yayulna:

²“Jerusalén pāni yakat yawa aput yulta; sarahta yultang kat baisa yamni dakakawarang: ‘¡Papang aput yulwi! Ismang aitah wahma man kat, yulki kat dakaman dai, yalki mayamna yang kat dalani yatalaman dai, kauhmak wanilang pasmunah uskit uinaman, di dahdas sauni yakat.’

³Israel kidika yang diki dai, minik tanit yamni kidika laih witing dai. Muih as witing yakat dutni kalyamwakat yang lawik kidika muihni yakat wah kalatik kasnin dis kalyamtayang dai. Papang yang kidika kaput yultayang.”

⁴Jacob sulani balna, Israel sulani balna, Papang yulni adika dakanauh.

⁵Papang aput diyulwi: “¿Muihmana bararak balna yang kaupak ais dutni talwi naikau kalah'uinayah? Dawan dauh balna usnitna yakat uina dawak witingna kidika satuk bik kakalwas dai.

⁶Yang kau yawalnin kukulwas dai, Egipto kaupak yaknayang kidika, kauhmak wanilang yakat tanina tuna āwanayang, sau buhni dawak wakarhni manah, sau was dis, yamadangni manah manas, sau as kidika yakat muih yalalahwas kidika.

⁷Sauni yamni akat manaduainayang manna adika sauni minik yamni balna yakwa kidika kasna atnamna. Kauna manna aiwa sauki adika dutni yamna mana, yayamtanang kat tikingdulihna adika pāni yang diki dai kidika.

⁸Sumalyang balna kidika yawawalwas dai, yang lawik amput atnin diyulnayang kidika bik tawanki kidika amanglawas dai, tunan muihni balna kidika nikingkauh yaklalauna dai, dawak prapit balna bik Baal ayangni yakwi yuyulna dai, dawan dauh ilp as dis kidika usnit yakat uiwi uina dai.

⁹“Kaput bahang Papang yang aput yultayang: Manna namangna yakat la as yamki dawak kaput bik mamana balna niningna yakat bik.

¹⁰Ma kawak kau sau wirni balna yakat yawa yamni talnauh, dawak Cedar yakat muih ūk sihtanang kat kiwi yamni talwang, kidika dini kalahnapa

¹¹nisan as daninawan dauh dapamwi ūk duwapa. ¡Kidika dawan dauh balna kidik! Kauna yang tawanki laih yang akat yadapamna, yang adika witing alasnina yang dai bik, dawan dauh kidika yulni.

¹²¡Makau kisang kidika man bik muihsak dauta! ¡Yamadutang mayukwang! Yang Papangyang kat yultayang.

¹³“Tawanki muihni balna laih dutni kidika minitlakwi bu yamna: yaruhmwi dadana, was sanni burhwa yamniyang adika, dawakat witingna alas wasnina pāni kukuhrna, kauna kidika pāni laih sip was laihwatwas ki, kat pāni kidika ihrna bahang.

¹⁴“Israel laih warau awas ki; witing warau lani kat batanh dawas ki. ¿Ais yamwi dinina kidika bitik dakyakwi duduwih?

¹⁵¿Ampadawak layan kapat nining yak kalbauwi parasni sarahwih? Pāni kidika laih daukalna; tawanni nunuhni balna kidika laih bubusna, bahang kidika yakat muih as bik diski.

¹⁶Menfis dawi Tafnes muihni balna bik tunama sasahna.[2]

¹⁷Aput man yakat kalahna, yang yaruhmta danaman kidika yulni, yang manna Papangmana ta yakat tamanatuna āwanayang dai.

¹⁸¿Dawak waralaih Egipto yakat yawa Nilo wasni ditanama kidika ais yakmah? ¿Amput dawak Asiria yakat kiwi Eufrates wasni dinin kidika dukihmawi?

¹⁹Man alas dutma kidika yaklauwi wah mawarang, barangni awas man kidika dutni yakat maruhmwarang. Kulta talah dutni dawak tapalhni kidika yaruhmta danaman yulni, dawak ayangki nuhni yamtas danaman kidika bik, yang Papangma yang kau. Yang Papangyang, paraski nuhni dutayang kidika, kaput rahm yultayang.

²⁰“Ma mahni dawi yang niking kauh lawanaman, yang yulki dakasman dai. Dawak yulnaman: ‘Dukih yāwaski dini yamnik.’ Asang ubulni malaluih balna bitik yakat dawak pan nunuhni dinityakat āwa lā bahnaman.

²¹Wain minik tanit yamni kapat talik madahnayang dai. ¡Kauna man dutni yamnaman bahang man kidika waismanpa amangma latasyang![3]

²²Yamni was kau kalsuhma bik, dutni yamna man kidika mikpa kaupak diswas ki, ban sakki. Yang Papangyang kat yultayang.

²³¿Amput man yulma yah: ‘Maisihni yalaihwaski, dawak dawan dauh balna yakat bik ayangnina nuhni yamtas yang’? Talah man amput man daih walang[4] yakat, yamni talah man ais yamnaman kidika bitik, kiamil yal as sirihni pini kiri awaih awaih awakapat man dai;

²⁴biriku limahwas kat, damasni pasyakat kiri wingnita parasni puwa kapat dukih kalawakat. Almuk karak kalpaknin mani kawakat, muih as bik laihwatwas kapat. Almuk kidika walwi kalsuhwaskat uman yakna ki: almuk karak kalpakkih kidika ma bitik yakat ban ki kaput.

²⁵“¡Israel, kalpas manah kiri kalma dalani duwinih, datang kat damatsuru buhlanin awas ki! Kaunah man yulnaman: ‘Dikah sip-awaski; pa ūk muihni balna kidika yakat dalani talayang, bahang witingna karak yawayang.’

²⁶“Muih dimalyang kat di malwak laihwak yakasalda kapat, Israel asalni kalahwarang, kingni balna kaupak, sumalniyang balna, dawak prapit balna bik;

²⁷pan nuhni askau kalyuyulwi: ‘Man laih yang papangki man’, dawak kipala as kau kalyuyulwi: ‘Man laih nanangki man.’ Wawatwak yang muhki yakat laih, muhnina bik dulalauwas ki, dawak dangsasawi. Ban kaunah, niningna yak yamadangni dilaihwak yayuyulwi: ‘¡Aiwa mailaihta yakta!’

²⁸Judá ¿dawan dauh yamnaman dai kidika angkat bangyah? ¡Dawan dauh kidika mahni dutaman tawan nunuhni kapat, bahang witingna sippa malaihwi yaknin dutni kidika kaiwakat!

²⁹¿Ais yulni yang niking kau yultamanah, manna bitik laih yang nikingkauh kulnamna dutni manah kidika? Yang, Papangyang kat yultayang.

³⁰Manna walamanabis balna yakat dauh palni wah diwisna yang, bahang yang yulki laihwas dadana, manna alas lawa, prapit balna yakat layan kapat inamana.

³¹(Warmani sulani balna mana kidika bik, Papang yulni kidika dakanauh.) Israel, ¿yang adika man namang yakat kauhmak wanilang as kapat yang daih? ¿Sau as puksani duwa kapat manah? Tawanki muihni balna ¿amput dawak yultamanah: ‘Mayang laih pri mayang; bahang watdi man yakat mawas karangki’?

³²¿Yal sirau as di kalyamwi pakwa dini balna kidika dinitkahnin sipyah? Kaput kauna, yang tawanki balna laih ma mahni ki dinitna kahna, yang adika.

³³“¡Ampat ta yamni amanglatamahn dalani matatalwa kidika walnam katlaih! ¡Dutni yamnin laih man kidika maestra as man!

³⁴Asna āwaman kidika, muih miniknakunni, di dis balna ānina manah makahna ki, kidika muihni balna di dutni yayamwak laihtas man dai kaunah.

³⁵Kidika bitik pasyakat aput yultaman: ‘Yang dutni yamtasyang uman Papang yang akat kulnin daukalwaski.’ Yamni ki, dutni yamtasyang timan bahang, man lama yamki ki.

³⁶¿Ais yamta kaput sirihni yah, watta ūk karak aslah alahwanamna? Egipto bik yamni awas karang, Asiria mayamna kapat.

³⁷Egipto kaupak nawatta aiwanaman karang asalma nuhni kalahwak, kat yang lawik man yakat makukulwa balna dai kidika diruhmtik danayang bahang, man witingna niningna yakat yamni awama kidika di as bik dutas awamaki.”