Read Mayangna Jeremías 20 Bible Online

Jeremías 20 - Mayangna bible

Jeremías 20

¹Imer walanibis Pasur kidika sumalyang dai, dawak bik, Papang uni pasyakat awaihwi talyang dai, dawak Jeremías yulwak kaldakana adika yulni,

²dawak muih sihna, laihwi bauwi dawi pan yakat uiwi sitna atnin, Benjamín dūrni nuhni, Papang ūni yaihnit kau yakat.

³Ma as bayakwak usnit kat sihwak ululuhna Jeremías kidika, dawak Jeremías kalyulna: “Papang yaklauwi ayangma Pasur kidika dapamwi ūk mana Magor-misabib.[25]

⁴Kat Papang yulwi: ‘Mawirlaki muihsak nuhni dauna atnam, man alas muihma yakat, dawak man kaltalyang yamni muihni balna niningna yakat bik; man mamakpa yakat kaltalyang yamni mana kidika waihmanala balna isninaparah kau dadauna karang. Judá muihni balna bitik Babilon kingni yakat āki; dawak yakwi Babilon yakat duwi kiwarang, kidika awaskat kuhbil kau iwarang.

⁵Waihmanala balna tingnina yakat āki ki manna ritsmana balna dutamana kidika adika tawanni nuhni akat, dimana yayamni balna kidika, dawak Judá kingni ritsni balna kidika bitik, kaput laih Babilon yakat duwi uina atnin.

⁶Dawak man Pasur, mayakwi Babilon yakat maduwi uina karang, dawak wanaihma balna bitik. Yakat dautangkat manunuwarang, dawak kaltalyang yamni dutaman muihni balna bitik, kat witingna laih alas yulni manah yuyulwadai bahang.’ ”

⁷Papang, man alas yayulnaman, dawak dating alas yayulnaman; man laih tanit parasniman dai, bahang mikit bayaknaman. Ma bitik yakat muih nikingkakari, muih bitik sarahni yatatalwi.

⁸Yulbautayang balna kidika laih niningh yultayang, kalbaunin dawak bahwi dis yamnin kalahwa balna kidika, taihwatwas ban yauswi sarahni yāyayamwi, man yulma sumaltayang kidika yulni.

⁹Yulki karang kat: “Wattik Papang yakat kultas awaki, witing ayangni kau bik yaktik yultas awaki”, tikini kat man yulma kidika muihki pasyakat kuhpau as kal yabusyamwi, wakalki kat ruputwi. Laihwatnik kultayang kauna sip-awasyang.

¹⁰Sipyang dakanik muih kidika ap yuyulwak: “¡Yamadangni lani kidika pa bitik yakat ki!” Yuyulwi: “¡Aiwanauh, aiwanang yulni yakdanang!” Kaltalyang yamni balna dutayang kidika bik tahahawi dutni yamting talnin. Yuyulwi: “Dawak alas kalyuyulwarang bik pah; kaput laih minit bayakdi biri kalyamdarang witing yakat.”

¹¹Kauna Papang, yang karak man, kalbauyang muihni minit bayayakwas as kapat; dangkit yakat ya-uiwi aiwa kidika bubukwarang, sip mikit bayayakwas karang; sip awas dawak asalnina kalalahwarang, bahang kidika laih dinitnakahwas ban karang.

¹²Papang parasma bitik, man lā kat kidika laihta talaman, muih kulnin paskau kidika bik talaman, nikingkatang talkuh, amput wah diataman muihni balna yakat, kat yang yakat dutni kalahwa balna kidika man tingma yakat ānayang.

¹³¡Unbautanauh Papang yakat, ayangni nuhni yamtanauh! Kat witing laih muih as kulnin bukna kidika waihnila tingni yakat, witing yaklauwi laihwi yakwi.

¹⁴¡Dutni palni ki, batanh danayang mani kidika! ¡Nanangki ma yaringni yana mani kidika yamni kulna awas ki!

¹⁵¡Dutni palni ki, kidika muihni papangki yakat alasna kalyakna kidika, walanibis al as batanh dana kat kalyulwi alasna kalyakna kidika!

¹⁶¡Kidika alni laih, tawan nunuhni balna Papang yaklauwi bahwi disyamna kapat ki, ban kaput atnin! ¡Mapiris yakat dakawang dalawak sarahwa kidika, dawak matunak yakat laih wār kaiwak yuyulwak dakawa kidika,

¹⁷kat Papang laih yamwak nanangki bānipas yakat dautas yang dai! kaput awasdai katlaih witing kidika yang sauki ū atnin dai, dawakat bik batahndatas awitikdai.

¹⁸¿Aput dawak nanangki bānipas kaupak, dalani wauhnin manah alahwanayang, dawak yang sangkika kidika asalni manah ban kaput dauna atnin?