Read Mayangna Jeremías 21 Bible Online

Jeremías 21 - Mayangna bible

Jeremías 21

¹King Sedequías yaklauwi sihna, Malquías walanibis Pasur, dawak sumalyang Sofonías, Maasías walanibis kidika, Jeremías yakat kiwi talwi kalyulna atnin: “Plisma Papang yakat kalyulta dakah yangna yulkina, kat Babilon kingni Nebokatnesar kidika nikingna kauh kalbauwi. Sip kat Papang yamwarang di taldas as dini, dawak pakwak Nebokatnesar kidika nawatwi dawi kalahwarang.” Kaput dawak Papang, Jeremías yakat yulkalbauna,

³dawak Jeremías yaklauwi nangnitna lana, king sihna muihni balna yakat: “Sedequías yakat kalyultanauh

⁴Israel Papangni yulwi: ‘Yamting kat kalbautabangmana muihni balna kidika, daklana pining ahni, nawatwi dangsasawarang Babilonia kingni dawak Caldeo muihni balna bik, kaput laih yang lawik adika tawanni nuhni papus yakat uduhki.

⁵Yang palni lawik namangna kau manakalbauki, paraski nuhni kidika yaktik, dawak, kulnik anna nuhni kau, dawak bik yamadangni nuhni karak.

⁶Adika tawanni nuhni muihni balna bitik imukki; ahal dawak didauh balna bitik dadauwarang, yamah dutni kau.

⁷Usnit kat, Judá kingni Sedequías kidika, Nebokatnesar tingni yakat āki, dawak bik waihnila ūk balna bik, kalbauyang muihni balna dawak tanituna muihni balna karak libittik, dawakat tawan nuhni paskau dauwas yaklalana balna kidika yamah, wār dawak yuh kalahna usnitkat. Yang lawik yamtingkat isparah kau ihina karang, minikun talnin lani dis. Yang, Papangyang kat kaput yultayang.

⁸‘Dawak tawan balna yakat bik isningna pakta, yang Papang yang kat yultayang: Diatayang witingna laihwi duna atnin, sangka tani, dawak kidika awaskat daunin tani karang pa.

⁹Angdika muihni adika tawanni nuhni akat watwarangkat wār kau dauwarang ki, kidika awaskat yuh dawak yamah kau bik dauna karang. Kidika awas kat, angdika muihni kalahwi Caldeo balna tawannina nuhni niningkauh kalbauwabang balna tingnina yakat kawarang kat, dauwas karang; kuihwas kidika sangnika laihwi yakwarang.

¹⁰Kat yang lawik dutni daunik kulnayang bahang, adika tawanni nuhni nining yakat, yamni daunik pāni dai yakat. Babilon kingni yakat kalaki, dawak witing yaklauwi kuh kau buswarang. Yang, Papang yang kat kaput yultayang.

¹¹‘Judá kingni uni yakat, king Devid uni yakat, yultah yang yulki kidika: Papang yulni kidika dakah: Lā kat yamtah ma bitik yakat; muih taihwi dinina dakyakyang balna kidika, dak'yaktah, muih miniknakunni balna kaupak, dutni yayamwa kidika yulni, kulnik daukalwak kuhpau as kapat dahlwak muih as bik pinin sip awas karang.

¹³‘Tawan nuhni, langni balna bitik tingma dinit yakat dutaman kidika walang yakat kidara nuhni as kapat, yang Papang yang kat, namang kauh yultayang. Manna yultamana: ¿Wais sipyah maniking kauh kalbaunin? ¿Wais sipyah mamalda pāni akat kaiwi kanin?

¹⁴Yang lawik wah manaki, ampus yamnamana kaput, asangmanapas kidika kuh kau dahlki,[26] dawak kidika kuhnipau yaklauwi yaihnitkau di balna kidika bitik busna karang. Yang, Papangyang kat yultayang.’ ”