Read Mayangna Jeremías 22 Bible Online

Jeremías 22 - Mayangna bible

Jeremías 22

¹Papang yayulna: “King uni yakat yawa, adika yulni parasni sarahta yultah.

²Judá kingni muhni yakat, witing Devid yalahwa dai yakat yalahna sak kidika, muih nunuhni balna muhnina yakat, dawak tawan nuhni muihni balna yakat bik: ‘Dakanauh Papang yulwi.

³Adika pāni akat, lā kat atnin, dawak barangni atnin kidika yamtanauh, muih taihwi dinina dakyayakwa balna kidika kaupak laihta dak'yaktanauh, muih miniknakunni kidika muih awas kapat, dawak dutni bik diyayamwinih, muih pa ūk kaupak aiwa muihni balna kidika, dawak warau, tingmak balna bik. Muih dutni as yamwas kidika ihiwinih.

⁴Manayultayang kidika rahm yamtanama kat, king ūk, ūk kalalahwarang, Devid yalahwa pāni dai yakat yalahnin, kidika balna, aras kau, dawak kār aras kau sitwak murwa yakau kilwi uiwi kakawarang, king ūni dūrni munah, muih nunuhni dawak, tawan muihni balna bik minikna dadawak.

⁵Kauna adika manayultayang kidika dakas awanama kat, king uni adika, daukalpamki, Yang Papang yang kat yultayang.’ ”

⁶Kat Papang yulwi, Judá kingni uni yulni: “Man laih yang niking yakat, Galaad asangnipas kapat man, Líbano asangni tuna kapat, kauna ayangki kau yaktik mayultayang kauhmak wanilang as yamki, pa as muih dis pāni kidika kapat.

⁷Man namang yakat muih sihki, kalbaunin dini karuk, mabahwi dis yamnin, suhunma tanit nuhni yamni kidika dakwi kuh yakat ruhmna karang.

⁸“Nisan balna manas laih, usnit kat bayayakwarang, adika tawanni nuhni yaihnit munah, dawak biri, biri yulwi dakakawarang: ‘¿Amput dawak Papang yaklauwi aput kalyamna yah adika tawanni tanit nuhni akat?’

⁹Dawak nangnitna lalawarang: ‘Kat Papang pranimis kidika ruhmwi dadana bahang, witingna Papangnina yamna dai kidika witingna karak, kidika dapamwi, ayangni nuhni yayamna dawan dauh ūk balna yakat.’ ”

¹⁰King Josías yulna kakaidinih, dawak dauna kidika yulni kakaidinih, kauna aidanauh witing walanibis Salum yulni, witing kiwi watwi kainin awas pāni yakat; baisa witing batanh dana sauni adika talwas karang ki. Papang yulwi Salum yulni, Judá kingni Josías walanibis dai kidika, Papangni kaupak usnit kat, witing kidika pāni yakat yalahna dai kidika, dawakat adika pāni kaupak dawi kalahwi kiuna kidika: “Watwi nawatwi kaiwas karang,

¹²duwi uina sauni yakat dauwarang ki, dawak watwi adika sauni witing talwas karang ki.

¹³“¡Alakaih man, dutni munah, dawak lā kat awas munah king uni yamtaman kidika, dawak muih yakat paktang yayamwi, kauna minit lauta diatasman!

¹⁴Yultaman: ‘King ūni nuhni as yamki, dawak pasniningkauh yakat ahni panuhni yamki.’ Dawak winnidar balna bik yakki, suhun kau manah daklatik datik, pauni kahki.

¹⁵¿Man kultamanh, king atnin laih suhun manah awaihdak atnin? Man papangma laih sangnika alasna duna dai; dawak lā kat yamwa dai, barangni, kidika bahang yamni dai.

¹⁶Muih miniknakunni yakat tataihwa balna kidika, rahmnina kidik nanitna dakwa dai, rahmnina diana dai, kidika bahang yamni dai witing. Kaput yamna tanka kidika laih yulwi yang akat amangkilawi. Yang Papang yang kat yultayang.

¹⁷“Kauna man laih kulta kalbautaman, minitkau lata malta dunam kamanah; muih dutni yamwas kidika datang dauwi, dawak taihta man, dawak dini malta dakyaktaman man tawanma yakat.”

¹⁸Papang yulwi, Judá kingni, Josías walanibis Joacim yulni: “Muihas diskarang, witing dauna kidika yulni kaidinin. Dawak muih as bik diskarang kaidi aput yulnin: ‘¡Alakaih, wirahki al! ¡Alakaih wirahki yal! ¡Alakaih Papang! ¡Alakaih king!’

¹⁹Biriku as kapat nununa karang: Jerusalén kaupak murwi ahni yakat yakpapamwarang.”

²⁰“¡Judá, Líbano asangni tuna yakat ilwa sarahta! ¡Damat parasni dulautah Basán asangni balna yakat! ¡Sarahta, Abarim asangni ubulni binina kaupak, dalani talaman balna bitik laih minitna bayakwak sip-awas dadana manah ki!

²¹Yang yulmabauna yang, ma yamni balna dai yakat, kauna yadakakih māwasdai. Man wahmaman kaupak kaput yamna man: ¡Yang dikit kidika dakakih māwasdana!

²²Wing yaklauwi wauhwi dukiuna karang tunan muihni balna dutaman kidika bitik, dawak dalani talaman muihni balna kidika laihwi pa ūk yakat duwi uiwarang. Asalma karak watma, dutni yamnaman balna bitik yulni.

²³Man waradika laih, kulnamlakki, uma yakat, Líbano kaupak suhunni duahaiwi mamana kidika yulni. ¡Kauna dalani kaiwak wauhma, muih yal walanibis duwarang kat dalani wauhwa kapat!”

²⁴Papang yaklauwi Jeconías[27], yakat kalyulna, Judá kingni, Joacim walanibis yakat: “Yang sangkika kau yaktik mayultayang: Man kidika ting ānin tamp kapat man kat tingki palni yakat āna karang bik, kidika kaupak madaktikyakki

²⁵waihmala dudutni balna tingnina yakat mahana atnin, man kidika balna yakat uba yamanina dutaman kidika. Babilonia kingni, Nebokatnesar yakat mahaki, dawak Caldeo balna tingnina yakat bik.

²⁶Maruhm'yakki, man dawak nanangma karak sau as batanh datasmana sauni yakat, dawak yakat albupak dautanama.”

²⁷Kaput laih witingna watwi nawatwi aiwas karang witingna aiwakih diawa sauni yakat.

²⁸¿Jeconías adika, di punin dini as sahbukna kat daukalna kapātyah, di dunin dini muih as bik dukih kalwas kapat? ¿Amput kat, witing dawak walanibis karak sau as tatalwas pāni yakat yakmukwak uinayah?

²⁹¡Sau, sau, sau; Papang yulni dakah!

³⁰Papang yulwi: “Adika alni ayangni ultanauh, ayang uhulwa wauhnitaya yakat, muih al as walanibis dis kapat, dawak bik al as sangnika yakat di yamwak bik dutni manah kalahna kapat. Kat sulani balna as bik Devid yalahna pāni yakat yalalahwas karang ki, Judá minit yakat king kana atnin.”