Read Mayangna Jeremías 23 Bible Online

Jeremías 23 - Mayangna bible

Jeremías 23

¹Papang yulwi: “¡Alakaih, sumalyang balna yaklauwi dadawak sīpki balna didiswa kidika, dawak pini ruhwa kidika!”

²Papang, Israel Papangni, sumalyang balna, witing tawanni yakat tunan kawi duwi uiwa balna yakat diyulwi: “Manna lawa yamtanang kat, sīpki balna ruhna, yamtanang kat kikirana, dawak maintalas mana. Yamni ki, bahang yang lawik wah mana ki dutni yamnamana yulni. Yang, Papang yang kat yultayang.

³Dawak yang silp lawik, sīpki as balna kidika duaiki, yamting kat sau ūk kau kikirana kidika, uduhtik dawak duaiki sihrsihr yamni yakat, kaput binina manas duna atnin.

⁴Sīp maintalyang balna āting kat maintatalwarang, kaput laih di as bik yamadunin dis karang, as bik diswas karang. Yang, Papang yang kat yultayang.”

⁵Papang aput rahm yulwi: “Ma as kaiwarang, bahang yamting kat Devid sulani as duwarang, king as witing sins nuhni duwi king kawarang, dawak lā kat yamwarang, dawak adika sauni akat barangni karang.

⁶Witing king kawarang mani balna yakat, Judá kidika laihwi yakna karang, dawak Israel bik yalahwarang yamni dutni dis. Bahang witing laih ayangni aput kalyuyulwarang: ‘Papang laih mayawak minit bayakdi.’ ”

⁷Papang rahm yulwi: “Mani balna kaiwarang ki ayangki kau yakta yultas awanama: ‘Papang sangnika kau, Israel balna kidika Egipto kaupak yakna’,

⁸kauna yultanama: ‘Papang sangnika kau, Israel sulani balna yakna, tingpal sauni kaupak, dawak sau ūk balna kau bik pini ruhna dai yakat,’ bik. Dawakat witingna silp saunina yakat yalalahwarang.”

⁹Papang yulna prapit balna yulnina: Tuhni palni kulnik daukalna; muihki bitik yayulwi, wasak dauna as kapat yang, muih as wain yaklauwi minit bayakna kapat Papang yulni, dawak bik yulni maisihni dis kidika minit bik.

¹⁰Adika sauni laih bahngna ki, kalduwi payahnin lani kidika, muihni balna kidika kiri uiwi dutni yamna atnin yulni, dawak witingna parasnina kau la barangni kidika daukakalwi. Kidika bahang Papang yaklauwi adika sauni akat dutni kalyulna, dawak sauni adika buhlana kaput bik laih kauhmak wanilang kau sihrsihr balna dai kidika busyamna.

¹¹Papang rahm aput yulwi: “Prapit balna, dawak sumalyang balna kat bik muih dudutni ki, yang ūkipas kat bik dutni yayamwak talna yang.

¹²Kidika bahang tanina kidika puksani dawak datalni karang: yang yamting kat tutukwak bubukwarang. Dutni yayamna kidika minit dilaihki usnit, witingna minitna yakat dutni duaiki. Yang, Papangyang kat yultayang.

¹³“Yang talnayang, Samaria pranipit balna yayamwak, yang kulnik daukalwa dini kidika yayamwak: Baal yulni sumamalna, dawak kaput yayamwak tawanki Israel ta disna.

¹⁴Yang, Jerusalén pranipit balna bik talnayang, di dutni yayamwak, lā bahwi, alas yulwi di mamalwi, kaput yamwi muih dudutni balna yakat baisa kulninna dulalauwi, kidika yulni sip dutni kaupak muih as bik dawi kalahwas ki. Witingna dawak, tawan nuhni muihni balna kidika yang niking yakat Sodoma dawak Gomorra kapat ki.

¹⁵Kidika bahang, yang Papang paraski nuhni dutayang adika, prapit balna niningna kauh yultayang: Di tapalhni as diating kakaswarang; was puisin āna kidika diating didiwarang, kat Jerusalén pranipit balna munah dutni kidika rawi kiuna sau bitik yakat.”

¹⁶Papang parasni nuhni bitik duwa kidika yulwi: “Israel balna, prapit balna manayuyulwa kidika dakakawinih, kidika laih alas manah yuyulwi, witingna silp kulninna kaupak yayakwi, yang lawik di as bik diyultas yang, yulnin.

¹⁷Yang yulki dauh kukulwa balna yakat diyuyulwi: ‘Di bitik yamni manah kalahwarang.’ Dawak kidika balna, witingna silp isningna kukulwa yakat uiwa balna yakat laih diyuyulwi: ‘Dutni as bik kaiwas karang ki.’ ”

¹⁸Kauna ¿wais amanglawi Papang malni kau di duwa kidika? ¿Wais talnayah dawak bik dakanayah witing yulbauwakat?

¹⁹Papang kulnin annin kidika laih alwana as kapat ki, wing bauwa as kapat, muih dutni balna minitna yakat wauhwa kidika.

²⁰Papang kulnin daukalna kidika laihwatwas karang, witing yamnin kulwa kidika yamwarang kat. Mani balna kaiwarangki, dawak manna kulta talnama, dawak kaput bik amanglatanama adika dini.

²¹“Yang lawik sihtas yang kidika pranipit balna, dawak yulbaunin bik yul dibautasyang dai, kauna witingna kiri kalahwi uiwi yang ayangki kau yulna atnin.

²²Yang di malni kau dutayang kidika amanglalana dai kat laih, yang yulki kidika, tawanki yakat yuyulwitdai, yayamwak tanina dutni kaupak naikau kalalahwitdia, dawak dutni yayamwa kidika bik dadawitdai.”

²³Papang rahm yulwi: “Naikau, kidika awaskat ulis karang bik, yang laih Papang yang.

²⁴¿Wais sipyah, mikpa yang kaupak yakmaldinin? Yang yawik āwingkat bahng'ilwi makau kisang dawak sau kidika bik. Yang, Papang yang kat rahm yultayang.

²⁵“Yang dakanayang kidika pranipit balna alas yuyulwi, yang ayangki kau yakwi, dawak witingna yuyulwi amana kau yang karak yulbabauwi. yulnin, dawakat amana kau yang karak yulbabauwi.

²⁶¿Mampat kat adika pranipit balna, alas yuyulwa kidika, dawak, witingna silp kulninna kaupak yakwi yuyulna kidika dadawarang yah?

²⁷Amana taldi atwi biri biri yuyulwa kidika laih witingna yayamwi, yang tawanki kidika, dinit kahna atnin yang adika, sihm muihnina bararak balna yang adika dinitna kahna dai kapat, dawak Baal usnit yakat uina dai.

²⁸¡Prapit amana as tahwarang kat, yulwang rahm amana as talna, kauna yang yulki duwarang kat, rahm barangni muih balna yakat isningna pakwang! Sip libitdas ki plawar minik dawak basni balna karak. Yang yulki laih kuhpau kapat ki, amar kapatki, kipala karang bik sahwi. Yang, Papang yang kat rahm yultayang.

³⁰“Kaput bahang, prapit balna biri, biri yulki mamalwa balna niningna kauh lawayang. Yang, Papang yang kat yultayang.

³¹Niningna kauh lawayang, kidika prapit balna, yang yulki kapat yakwi yuyulwa kidika, witingna silp kulninna kaupak yayakwi.

³²Niningna kauh lawayang, kidika prapit balna, amana taldi atwi alasyuyulwa kidika, alasnina dawak yuyulwa kidika yakau yayamwak tawanki ta diswi. Yang lawik sihtas yang, dawak bik paktasyang, kaput bahang witingna sip awas ki, tawanki tingnisut laihninna. Yang, Papang yang kat yultayang.

³³“Jeremías, tawan kaupak muih as, prapit karang, sumalyang karang mayulwi dakawarang: ‘¿Papang yaklauwi angdika yamnin mayana[28] yah?’ mayulwi dakakawak diyultah: ‘Papang yulwi truknin dini kidika laih manna, bahang dapamwak bukwarang ki.’

³⁴Prapit as, sumalyang as, kidika awas kat tawan muihni as aput yulwarang ‘Papang yamnin dini’, tarang kat yang lawik wah kalaki, dawak wanaihni balna bitik yakat.

³⁵Muih as kat witing kaltalyang yamni kat kalyulwi dakawarang kat, dawak sipki yulna atnin: ‘¿Papang amput yulna yah? ¿Ais yulna yah?’

³⁶Kauna watwi adika yulni yulnin awas ki, ‘Papang yamnin dini’, wais kidika yulni yulwarang kat, yamting kat kidika yulni witing nining yakat truknin as kalwarang. Manna lawa Papangmana sangka yulni kulnin lani balna kidika daukalnamana, Papangmana parasni nuhni bitik duwa kidika.

³⁷“Jeremías, prapit balna yakat yulta dakah: ‘¿Papang amput yulna yah? ¿Ais yulna yah?’

³⁸Witingna yuyulwarang kat ‘Papang yamnin dini’; atwarang kat aput nangnitnalama: ‘Papang yulwi: Kidika yulni watta kaput yulnamna awaski atnayang kauna, ban yultamana,

³⁹bahang yang lawik dulauki truknin as kapat[29] manna namangna yakat, dawak tawan nuhni mananayang nining yakat bik, kidika tawanni kuduh muihmana bararak balna dai yakat bik dianayang dai, bahang yangkaupak naikau dating bukwarang.

⁴⁰Dawak manna mamatna yakat duaiki, bahang kidika laih bayakkiwas ban karang, dauh kalkulnin lani, asalni yaknin, bahang kidika balna wauhtanama kidika sip manna damatnakahwas karang.’ ”