Read Mayangna Jeremías 25 Bible Online

Jeremías 25 - Mayangna bible

Jeremías 25

¹Josías walanibis Joacim, Judá kingni witing king kana kurih arungka kat, Papang yul sihna Jeremías yakat, Judá tawanni bitik yulni. Kidika yakat Babilonia kingni Nebokatnesar, king kana kurih as dai.

²Prapit Jeremías yaklauwi, Papang yulni kidika, Judá tawanni balna bitik, dawakat Jerusalén muihni balna bitik yakat diyulna. Aput diyulna:

³“Amón walanibis, Josías, Judá yakat king kana kurih salap minit kau bās kaupak, warmani kat, yuldarang kat, kurih muih as luih minitkau bās, Papang yang akat yulyabauna, dawak yang manna yakat wat wat manayulna yang, kauna dakas danamana.

⁴Papang yaklauwi wat wat, dini yamyang balna prapit manasihna, kauna manna yulni dakas danamana.

⁵Witingna manayuyulna: ‘Datanauh, kulnamna dutni kidika, dawak dutni yamtamana kidika bik, kaput laih Papang sau manana yakat yalahtanama ban kaput, kidika laih muihmana bararak kaupak manana dai.

⁶Dawan dauh balna yakat usnit uhuiwinih; prinias yayamwinih, ayangni nuhni bik yayamwinih. Papang kulnin daukakalwinih, dawan dauh balna manna yamna mana yakat, ayangni nuhni yamta, dawak, witing yaklauwi dutni as bik sihwas karang.’

⁷Dawak waralaih, Papang yulwi: ‘Manna yulki dakas danamana; kulnik daukalwi, dawan dauh manna yamnamana yakat, ayangni nuhni yamta mana kidika, bahang kidika laih manna alas dutmana.’

⁸“Kidika bahang, Papang parasni nuhni bitik duwa kidika yulwi: ‘Yang ismangna pakting bik dakas danamana bahang,

⁹tingpal niningkauh tawan balna kidika bitik yulting aiwarang, dawak diki yamyang, Babilon kingni Nebokatnesar bik, kaiwi niningna kauh kalbauwang adika sauni muihni balna bitik niningna kauh, dawakat, yaihnit kau nisan balna yakat bik. Bitik bahtik dis yamki. Wirlamukki ban kaput atnin daukalna yakat, yamadangni muihsak daunin yakat.

¹⁰Yamting kat witingna pasyakat watwi dakakawas karang alasna yamwi unbabauwa kidika, dawak muih kalduduwak unbabauwa kidika bik, kiwatak bik binka yamwas karang, awas yaringni bik tatalwas karang.

¹¹Adika sauni bitik bahwi dis yamna karang, Kurih 70, praisni adika nisan balna laih Babilon kingni kalni dinit yakat karang.

¹²Dawak kurih muih as luih bās minitkau salap kidika laihwa kat, Babilon kingni, dawak ninisan, kidika yakat dutni yayamna kidika minit diyulki ki, dawak bahtik dis yamki ki, ban kaput atnin. Yang, Papangyang kat yultayang.

¹³Adika sauni minit yakat kalating bukwarang, yulna yang balna bitik kidika, dawak wauhtaya yakat ulna kidika bik: Jeremías, yang ayangki kau yulna balna bitik kidika nisan balna bitik niningna kauh.

¹⁴Nisan nunuhni balna, dawak king pararasni balna yaklauwi taihwi duduwarang witingna yakat. Kaput minit lautik diaki yayamna kidika yulni.’ ”

¹⁵Papang, Israel Papangni, yayulna: “Talah adika sunitak wain bunghki, kidika laih yang annik manah ki. Duta yawa diatang didiwang nisan balna balna bitik yakat yang lawik masihnayang kidika.

¹⁶Adika didiwarang kat, tiningna yayakwarang, dawak krisi kapat kakalwarang, wār witingna yakat sihki kidika yulni.”

¹⁷Yang sunitak kidika dunayang, Papang tingni kaupak, dawak, Papang sihna nisan balna bitik yakat diating didina.

¹⁸Diating didina, Jerusalén, dawak Judá tawanni nunuhni balna, king balna dawak, tunan muihni balna karak aslah, bahwi dis yamnin, dawak daukalna yakat wirlamuknin, di as yamadangni muihsak daunin, talnin as kapat dutni diyulna kat warmani kat ban kaput uiwa kidika.

¹⁹Sihm kaput bik, Egipto kingni Fero yakat bik kalating dina, muih nunuhni balna dawak tunan muihni balna bitik,

²⁰dawak muih anani ūk ūk duwa balna bitik yakat bangdai kidika, Uz kingni balna bitik, dawak Filistain sauni: Ascalón, Gaza, Ecrón dawak Asdod kaupak kidika;

²¹Edom, Moab, dawak Amón;

²²Tiro dawak Sidón kingni balna bitik; Mediterráneo kumani kau sau balna kingnina bitik kau;

²³Dedán, Tema, dawak Buz sulani balna bitik, dawak tawan balna miniknatangbas dakyang muihni balna bik;

²⁴Arabia kingni balna bitik, kauhmak wanilang kau, āni satni balna yalalahwa kingnina balna bitik,

²⁵Zimri, Elam, dawak Media kingni balna bitik:

²⁶Wadah nining kauh kingni balna bitik, ulis bik, dawak naikau balna bik, as kaupak, ūk yakat. Yuldarang kat sau kingni balna bitik. Witni yakat Babilon[31] kingni diwarang.

²⁷Usnit kat Papang yayulna: “Diyultah, yang laih Papang yang, paraski nuhni dutayang, Israel Papangni manapaktayang dita wasak dautanauh, tamangnayakta sau yakat buktanauh, wat lawas atnamna, mamatna yakat wār sihki kidika yulni.

²⁸Dawak, sunitak kidika duwi dinin yuyulwas karang kat, aput diyultah: ‘Papang parasni nuhni bitik duwa kidika yulwi: Dinamna karangki.

²⁹Kaput kat mahka wah sihki tawan nuhni, yang diki yakna dai kidika minit yak. ¿Manna kultamanh wah dutas awanama? Kidika dutas awanama laih, wār sihkiki, sau muihni balna bitik yakat, yang, Papang paraski nuhni dutayang kat yultayang.’

³⁰“Man, Jeremías, adika yulni balna bitik yultah yang ayangki kau. Aput diyultah: ‘Papang dinit alwana kapat kidika ruhmwi, mayakaupak, pa maisihni dis kat yalahwa kidika kaupak. Sīpni balna niningna yakat sarahwi, wain kalkau atatakwa kapat, sau muihni balna bitik niningna kauh.

³¹Parasni yulwa kidika sau sutni kat kiwi, kat Papang yaklauwi, nisan balna lānina yamwarang bahang, dauyang muihni balna bitik yulwak uiwak lanina yamwarang, muih dudutni balna kidika daunin yakat wirlanin. Papang kaput yulwi.’ ”

³²Papang parasni nuhni bitik duwa kidika aput yulwi: “Di balna dis kalwarang kidika sau muihni balna yakat tilahwi kiwarang ki ūk ūk yakat; wing bauwarang ki yamadangni sau sutni nakas yakat.”

³³Papang yamwak dadauwarang kidik, kidika mani, bukna bangbang karang sau sutni as kaupak, sutni ūk yakat. Muih as bik kakaidas karang witingna yulnina muih as bik dauna balna muihnina kidika dulauwi nuwas karang; sau yakat dana karang diba kapat.

³⁴¡Sarahtanauh, sīp maintalayang balna, sarahtanauh, dalawak! ¡Manna, sīp balna tunan awa duyawamana kidika, sau yak bukta pihrtanauh! Kat inin[32] kidika kiwi kana, dawak manna lawa itamana sīp almuk[33] salani kat inin kapat.

³⁵Sīp maintalyang balna laih kikiras karang, sīp balna tanina tuna kawi uiwa balna kidika laih, kiri yaklanin sip awas karang.

³⁶Sīp maintalyang balna sararahwi, dalawak sararahwi sīp balna tanina tuna kawi duwi uiwa balna kidika, kat Papang yaklauwi, sihrsihr balna kidika bitik disyamna bahang.

³⁷Papang kulnin daukalna, dawak, panina yayamni dai kidika daukalna.

³⁸Layan pāni kaupak kalahwa kapat kalahna, dawak witingna saunina kidika dutni yammukna, kat Papang kulnin daukalna bahang, dawak wār yamadangni as sihna.