Read Mayangna Jeremías 26 Bible Online

Jeremías 26 - Mayangna bible

Jeremías 26

¹Tatuna king kana kaupak Joacim, Josías walanibis, Judá yakat, Papang yaklauwi Jeremías yakat kiwi

²aput kalyulna: “Ūki watakni yakat lawa, ais yulnin mayulna yang kidika muih balna aiwak, Judá tawanni nuhni kaupak, makatyulnin ūni kidika dipulu ānin. Yultas danam laih awaski.

³Sip kat yulma dakawi, dutni yayamwa kidika dadawarang, dawak witingna dutni yayamna kidika yulni wah diatas awaki, yang kulnayang kaput.

⁴Diyultah, yang Papang yang kat yultayang: ‘Yulki dakawas, la dianayang kidika kaput yayamwas kat,

⁵yang diki yamyang prapit balna yuyulwa kidika bik dakakawas kat, wat wat sihnayang kidika, manna yulnina dakas danamana,

⁶kaput laih Silo kau yamnayang dai kaput, adika makatyulnin ūni akat bik kalyamki. Adika tawanni nuhni laih sampla as karang sau akat nisan balna bitik yakat.’ ”

⁷Sumalyang balna, prapit balna, dawak tawan muihni balna bik dakakana dai, Jeremías kidika yulni yulwakat, makatyulnin ūni yakat.

⁸Dawan yaklauwi pakna dai kidika yulnin, bitik yulwi dahn dawak, sumalyang balna, prapit balna dawak tawan muihni balna bitik kalpakwi laihwi kalyuyulna: “¡Dauma!

⁹¿Amput Dawan ayangni kau yakta yultamahn, makatyulnin ūni adika Silo kau kalahna kapat kalahwarang timan kidika, dawak adika tawanni nuhni adika daukalpamwak muih bik dis dawarang timahn?” Dawak tawan muihni balna bitik kalududuhna dai Jeremías yaihnit yakat.

¹⁰Judá tunan muihni balna, di kalahwa kidika dakawi, king ūni yakat uina, makatyulnin ūni yakat, kidika kau dūr wisam yakat yalalahna.

¹¹Kaput laih sumalyang balna, prapit balna, yaklauwi diyuyulna tawan tunan muihni balna, dawak tawan muihni balna yakat bik, aput: “Adika alni dauna atnin yakat wirlanin ki, kat adika tawanni nuhni nining yakat yulna bahang. Manna silp tapamana dakanamana.”

¹²Jeremías yaklauwi, tunan muihni balna dawak tawan muihni yakat diyulna: “Papang yaklauwi yasihna witing ayangni kau yulna atnin, dawak makat yulnin uni adika nining yakat yulnin dawakat, adika tawanni nuhni nining yakat bik, manna dakanda kaput.

¹³Kulnamna, dawak yamta mana kidika baisa yamni yamtanauh, Papangman yulni dakanauh, dawak witing yaklauwi wah sihwas karang, yulna kaput.

¹⁴Dawakat yang laih, manna tingmana yakat yang, yang kau amput yayamnin kultamana kaput yamtanauh.

¹⁵Kauna, adika, yamni dakanauh: Manna yaitanama kat, manna, dawak adika tawanni nuhni muihni balna adika dutnina karang, muih dutni yamwas kat inamana yulni; kat rahm kidika laih Papang yaklauwi yasihna, adika dini, bitik laih manayulnik.”

¹⁶Kaput dawak, tunan muihni balna, dawak tawan muihni balna yaklauwi, sumalyang balna, dawak prapit balna yakat diyuyulna: “Adika alni, daunin yakat yaknin laih, dini awas ki, maiyulbauna Mapapangki ayangni kau.”

¹⁷Muih bararak as as yaklauwi diyuyulna, tawan yakat kalududuhna bangdai yakat:

¹⁸“Ezequías, Judá kingni, mani balna dai yakat, Miqueas Moreset kaupak dai kidika yulbauna Papang ayangni kau, Judá tawanni balna bitik yakat, aput yulna: ‘Papang parasni nuhni bitik duwa kidika yulwi: Sayan kidika sau as didahnin pāni sahna kapat kalwarang, Jerusalén kidika, di daukalwak uduhna kapat kalwarang, dawak makat yulnin uni ubulni kau kidika ukung manah bangwarang.’

¹⁹“¿King Ezequías dawak, Judá tawanni balna bitik yaklauwi Miqueas yakat ihina dai katpah? Bitik laih nawatkauh dai: king, Papang yakat yamaduwi kalyulna witingna yakat miniknakunni talnin. Kaput dawak Papang sihwas dana, dutni sihnin yulna dai kidika. ¿Dawak mayang kaput trukdarang yah dutni nuhni kaput kidika?”

²⁰Sihm, prapit Urías, Semaías walanibis, Quiriat-jearim tawanni nuhni kaupak dai kidika, Papang ayangni kau duwi yulna dai, adika tawanni nuhni nining kauh, dawak adika sauni niningkauh bik, Jeremías yulwada kaput.

²¹King Joacim, muih nunuhni balna dawak, tunan muihni balna bik dakakana, witing yulna kidika, dawak king laih mahka inin kulna. Kauna Urías laih amanglawi, yamaduwi, Egipto yakat kiri kiuna.

²²King Joacim yaklauwi Egipto yakat sihna Acbor walanibis Elnatán, dawak ahal ūk bik,

²³dawak Urías laihwi duahaina Egipto kaupak, king Joacim tingni yakat ahawak, sihna iwi dawi pa nuhni kuhrna yakat ruhm'apamnin.

²⁴Ahicam, Safán walanibis, Jeremías ilpni yulna, dawak tawan tingni yakat ahawas dadana ina atnin.