Read Mayangna Jeremías 27 Bible Online

Jeremías 27 - Mayangna bible

Jeremías 27

¹Kurih arungka,[34] Josías walanibis, Sedequías,[35], king kana Judá yakat, dawak Papang yaklauwi Jeremías yakat

²kalyulna: “Wah, dawak turuh almuk arangni kau, pan sitwa dini kidika as yamta, damamak yakat sittah.

³Usnit kat yul sihna, Edom, Moab, Amón, Tiro, dawak Sidón, kidika balna kingnina yakat, yul duwi uiyang balna Jerusalén yakat king Sedequías talna aina bangdai yakarak, kidika yulni sihna dai.

⁴Kingmana balna yakat paktanang yuyulwang, yang Papang paraski nuhni dutayang, Israel Papangni yang kat yultayang:

⁵Paraski nuhni kau sau adika yamnayang, muih dawak didauh balna kidika bitik, wais yakat kalanik kulki kidika kalaki ki.

⁶Bahang yamni ki, yang lawik adika sauni bitik, diki yamyang Nebokatnesar parasni dinit yakat ānayang Babilon kingni yakat, dawak, asangpas kau didauh anyang balna bitik kalanayang.

⁷Nisan balna bitik laih witing dinit yakat karang, walaninabis, manina, dawak saunina kat bik, nisan balna dawak king pararasni balna dinitna yakat karang.

⁸Dawak nisan balna, kidika awaskat king as, Nebokatnesar dinit yakat bukwas karang kat, yang lawik wah kalaki, wār, yuh, yamah dutni, bitik parasni dinit yakat bubukwarang kat. Yang, Papangyang kat yultayang.

⁹“Kaput bahang, manna prapit balna yulnina dakakawinih, amana talyang muihni balna yakat bik, satanas parasni kau di baisa kaikalahwas kau yuyulwa muihni balna yakat bik, dawak manayuyulwa kidika, Babilon kingni dinit yakat buknin awas manayuyulwa kidika.

¹⁰Kidik manayuyulwa kidika laih alas, dawak manna yaktanama kidika laih, saumana kaupak manayakwi, manaduwi uiwarang, dawak yang manaruhmting kat dautanama.

¹¹Dawak angdika ninisan kat, Babilon kingni parasni dinit yakat bubukwarang kat, yang lawik datingkat saunina yakat yalalahwarang watwi, dawak di dadahwarang. Yang, Papangyang kat yultayang.”

¹²Yang, Jeremías, adika wattik yulna yang, Judá kingni Sedequías, dawak baisa minit yakat kalyulna yang: “Babilon kingni, dawak tawanni dinit yakat buktanauh, dawakat sangka awanama.

¹³¿Ais dukih mayanin dini as sakyah dauna atnin, man dawak tawanma bik, wār yulni, yuh dawak yamah dutni kau? Kat Papang yulna, kaput kalkalahwarang angdika sauni Babilon kingni dinit yakat bukwas karang kat.

¹⁴Prapit balna yulnina dakakawinih, Babilon kingni kalni dinit yakat buknin awaski manatwa kidika, kat, manayuyulwa kidika laih alas.

¹⁵Papang yulwi witing yaklauwi, sihwas ki; alas manah yuyulwi, Papang ayangni kau duwi. Kaput laih, Papang yaklauwi manaruhwarang manna, dawak prapit balna adika dini manayuyulna kidika laih dadauwarang.”

¹⁶Sihm, yawanayang, sumalyang balna, dawak tawan bitik yakat, dawak aput diyulnayang: “Adika yulwi Papang: ‘Prapit balna yulnina dakakawinih, manayuyulwi sirihni Babilon kaupak nawatwi duahaiwarang ki, makat yulnin uni dini balna dai kidika. Kidika manayuyulwa kidika laih alas.

¹⁷¡Yulnina dakawinih! Babilon kingni dinit yakat buktanauh, sangka awanama. ¿Ais dukih as sakyah, adika tawanni nuhni daukalwarang kat?

¹⁸Witingna rahm prapit kat, dawak rahm yang yuldibaunayang kat, yang akat yayuyulwang, Papang paraski nuhni dutayang, dadawak Babilon yakat duwi kiunin awaski, makat yulnin uni dini balna baisa bang kidika, Judá kau king uni dawak Jerusalén kau bik bang kidika.’

¹⁹“King Nebokatnesar, Jerusalén kaupak, Joacim walanibis Jeconías, Judá kingni yakwi dukiuna kat Babilon yakat, duwi kiuna muih nunuhni balna, Judá dawi Jerusalén kaupak, ū rahni nunuhni balna laih duwi kiwas dai, was mahnin dini bras kau yamna dai kidika bik dukiwas dai, rahni ūk balna, dawak makat yulnin ūni dini balna bik. Papang parasni nuhni bitik duwa kidika yulwi, makat yulnin ūni dini balna, king ūni Judá dawak Jerusalén kau bik wawatna yulni:

²²‘Babilon yakat duwi uiwarang, dawak yakat wawatna karang, dawak yang mampat wattik duainik kulki kat duaiki adika pāni akat. Yang, Papangyang kat yultayang.’ ”