Read Mayangna Jeremías 28 Bible Online

Jeremías 28 - Mayangna bible

Jeremías 28

¹Sihm, kidika kurihni pasyak, waiku singka yakat, yuldarangkat, Sedequías king kana Judá yakat kurih arungka[36] yakat prapit Hananías, Azur walanibis, Gabaón tawanni kaupak, makat yulnin uni yakat bangkat, Jeremías yakat kalyulna, sumalyang balna, dawak tawan bitik muhni yakat:

²—Papang, parasni nuhni bitik duwa kidika, Israel Papangni aput yulwi: ‘Babilon kingni, muih arangnina kau pan sitnin dini duwa kidika bahpamki, dawak

³kurih bu kat, yamting nawatwi duahaiwarang, makat yulnin ūni dini balna bitik, Babilon yakat duwi kiuna dai kidika king Nebokatnesar.

⁴Dawak sihm yamting kat, adika pāni akat duahaiwarang, Judá kingni Jeconías, Joacim walanibis, dawak muih ūk balna bitik Judá kaupak yakwi Babilon yakat duwi uina dai kidika. Agha, yang bahki ki, Babilon kingni muih arangnina kau pan sitnin duwa kidika. Yang, Papangyang kat yultayang.’

⁵Prapit Jeremías yaklauwi nangnitlana, prapit Hananías yakat, sumalyang balna bitik, tawan bitik makat yulnin ūni kau bangdai kidika muhninatani yakat:

⁶—¡Yamni karang Papang kaput yamwa laih! ¡Yamni karang yamwalaih Papang, yul yultada balna kidika, dawak makat yulnin uni kau dini balna dai kidika duainin, dawak Babilon kau muih duwi uina balna dai kidika bitik nawatwi ainin!

⁷Kauna dakah adika mayultayang man, dawak tawan bitik yakat:

⁸Ma balna bayakna yakat, prapit balna bangdai kidika, baisa man, yang, batanh dadas kau, wār lani kidika yuyulna dai, di dis dawarang, yamah dutni bukwarang, nisan balna minitna yakat, dawak king kakawa pararasni balna minitna yakat bik.

⁹Kauna prapit as yamni lani kalahwarang kidika yulwarang kat, yulni balna kidika rahm kalkulna ki Papang yaklauwi sihna

¹⁰Kaput dawak, Hananías yaklauwi, Jeremías arangni kau pan trukwalikdai kidika yakwi bahna,

¹¹tawan bitik muhnina tani yakat yulwa yakauna: —Papang yulwi: ‘Aput laih, kurih bu bayakwa kat nisan balna dininamak kau pan sitna dai kidika Babilon kingni Nebokatnesar yaklauwi, yang bahki ki.’ Dawak Jeremías mahka kiuna.

¹²Ma as as bayakwak, Hananías yaklauwi Jeremías dinimak yakat pan āna likkat yakwi bahna usnit kat, Papang, prapit Jeremías yakat kiwi aput kalyulna:

¹³“Yawa kalyultah Hananías yakat, yang Papang yang kat yultayang: arangni yakat sitnin panani as bahnaman, pan bahang, kauna yang as yamtik manayang[37] ayan kau.

¹⁴Kat yang, Papang paraski nuhni dutayang, Israel Papangni yang kat yultayang: kidika nisan balna dininamak yakat ayan kau anayang, Babilon kingni Nebokatnesar dini yamna atnin warau kapat. Asangpas kau didauh balna kat bik, witing parasni dinit yakat anayang.”

¹⁵Kaput laih Jeremías kalyulna Hananías yakat: —¡Dakah Hananías! Papang yaklauwi masihwaski, dawak adika tawanni yakat alas kalyultaman.

¹⁶Kidika bahang, Papang yulwi: ‘Masihki ki, agha, kauna madispamki ki sau minit akaupak. Adika kurihni dauma ki, kat man yulnaman balna kidika yulni, tawan kidika nikingkauh dulaunaman.’

¹⁷Dawak, prapit Hananías sihm kidika kurihni waiku tiaskaubu yakat dauna.