Read Mayangna Jeremías 29 Bible Online

Jeremías 29 - Mayangna bible

Jeremías 29

¹King Jeconías kidika yakwi duwi uina, king yal kidika bik, bahang usnit kat king uni kau dini yamyang balna,[38] Judá dawak Jerusalén tanituna balna, ting kau di yamyang balna, dawak ayan kau diyamyang balna, yakat prapit Jeremías Jerusalén kaupak wauhtaya disihna, muih bararak balna, laihwi duwi uiwa dai kidika, sumalyang balna, prapit, muih balna Nebokatnesar yakwi duwi kiuna dai kidika Jerusalén kaupak Babilon yakat.

³Adika wauhnitaya sihna dai Safán walanibis Elasa munah, dawak Hilcías walanibis Gemarías bik, kidika balna, Judá kingni Sedequías, Babilon yakat sihna dai king Nebokatnesar muhni yakat kiuna atnin. Wauhtaya kidika aput ulna dai.

⁴“Aput yulwi Papang parasni nuhni bitik duwa kidika, Israel Papangni, yamwakat, bitik kalahwi uina kidika, Jerusalén kaupak Babilon yakat:

⁵‘Umana yamta pamana dutanauh, pan minik yakyang balna dahta, kidika minik kastanauh.

⁶Kalduta walabis yaktanauh ahal dawak yayal bik. Dawak walamanabis balna bik kalduwi walaninabis yayakwang. Kidika pāni yakat kalsahta mahni alahwanauh, bulah laih kalalahwinih.

⁷Diyamtanauh, kidika tawanni nuhni dini manayaktik duyawanayang yakat, dawak yang akat yayultanauh witingna dini bik, kat witingna yamni karang kidika manna bik yamni awanama.

⁸Yang, Papang paraski nuhni dutayang, Israel Papangni, adika ismangna paktayang: Datang kat alas manayulnin awaski, prapit balna, dawak di kaiwi kalahwas kau yulyang balna, manna pasmangna kau yalalahwa kidika; witingna aminwi tatalwa balna kidika[39] yulnina dakakawinih.

⁹Witingna yang ayangki kau yakwi manayuyulwa kidika laih alas. Yang lawik sihtas yang. Yang Papangyang kat yultayang.’

¹⁰“Papang yulwi: ‘Babilon yakat kurih, muih as luih bās minitkau salap laihwak, manna ilpmana yamkiki, dawak pramis yamna yang kaput yamki ki, adika pāni akat wattik mana duainik.

¹¹Yang amanglatayang, ais yamnik kidika manna yakat, namangna yakat yamni yamnik, dutni laih awas ki, witni kat, tamatna yakat tahanin yamni as manaki. Yang, Papangyang kat, yultayang.

¹²Kaput dawak manna yang akat yayultanama, dawak yang akat aiwanama mamatna yultinah, dawak yang manadakaki.

¹³Yawalta, yāyaktanama, kat yawaltanama bahang ismangna bitik kau.

¹⁴Agha, dating kat, manna yawalta yayaktanama, dawak yamting kat suermanati kidika satuk wirlawarang: Manayakki nisan balna bitik paskaupak, dawak pa balna bitik kau manating ruhta yawanamana kaupak bik, dawak mana uduhtik, wattik manaduaiki adika pāni akat. Yang, Papangyang kat yultayang.’

¹⁵“Manna yultamana: ‘Papang yaklauwi prapit mayana Babilon akat.’

¹⁶(Papang yulwi, king as Devid yalahwa pāni dai yakat yalahwa kidika yulni, dawak adika tawanni nuhni muihni balna yulnina bik, manna wanaihmana balna laihwi duwi uiwas balna dai kidika.

¹⁷‘Yang, Papang, paraski nuhni dutayang kat, yultayang: Wār manasihki, yuh, dawak yamah dutni. Manayamna awaki ani damni minik dutlana kapat, uba dutni kat kasnin sip awas kapat.

¹⁸Manauiki, wār, yuh dawak yawah dutni karak. Yamting kat nisan balna bitik manatalwi yamadangni dakakawarang, dawak talnin as kapat manawirlaki, dutni asalni karak, di as yamadangni kapat karang, dawak muihsak dadauwarang, sau muihni bitik, yang lawik manaruhna yang pāni balna yakat.

¹⁹Kat yang lawik ismangna pakting bik yulki dakas danamana bahang, yang diki yamyang prapit balna munah, kidika balna wat, wat manasihnayang, kauna manna dakas danamana. Yang papangyang kat kaput yultayang.

²⁰Yang yulki dakanauh, bitik kau manayamtingkat, Jerusalén kaupak manayakwi manaduwi uina kidika Babilon yakat.’)[40]

²¹“Papang parasni nuhni bitik duwa kidika, Israel Papangni yulwi Acab yulni, Colaías walanibis, dawak, Sedequías, Maasías walanibis yulni bik, kidika balna yul alas manah manayuyulwi Papang ayangni kau: ‘Yamting kat Babilon kingni Nebokatnesar parasni dinit yakat bubukwarang, dawak witing yaklauwi iwarang manna muhmana tani yakat.

²²Kaput laih, Judá muihni balna yakwi Babilon yakat duwi uina balna kidika, muih as kau dutni ilnin karang kat, yuyulwarang: Papang yaklauwi mayamwarang Sedequías dawi Acab kau diyamna kaput, kidika balna Babilon kingni yaklauwi kuh kau busna.

²³Kaput manakalahwarang, Israel kau dutni diyamnamana yulni: Muih yalnina karak dutni yamnamana dawak, yang ayangki kau duta alas yulnamana, yang lawik manapaktasyang yulnin dai kidika. Yang, Papangyang kat yultayang.’ ”

²⁴Papang yaklauwi Jeremías yakat pakna, kalyulna atnin Semaías Nehelam kaupak yakat:

²⁵“Papang parasni nuhni bitik duwa kidika, Israel Papangni yulwi: ‘Man wauhtaya as sihnaman alas ayangma kau, Jerusalén kau tawan bitik yakat, sumalyang Sofonías yakat, Maasías walanibis, dawak sumalyang ūk balna bitik yakat. Wauhtaya yakat aput yulnaman Sofonías yakat.

²⁶Papang yaklauwi sumalyang mahana Joiada pāni yakat, minit talyang nuhni as[41] makatyulnin ūni pasyakat. Muih as sinsni daukalna kat yul pini yulbauwa kidika man yakat kaiwi prapit kapat yulbauwarang kat laihta kalni yakat pan kau sitta dawak ayan wahni kau sitma.

²⁷¿Amput dawak, Jeremías Anatot kaupak yakat biltasmahn, manna namangna yakat prapit kapat yulbauwa kidika?

²⁸Wauhtaya kat bik yanasihna Babilon yakat, aput yulna dai wauhnitaya yakat: manayakwi dukiuna kidika ma mahni bayakwarang ki; ūmana yamta, pamana dutanauh, dawak panmak balna dahta, minik yakwak kastanauh.’ ”

²⁹Sumalyang Sofonías, wauhtaya kidika yulwi talwi kalana Jeremías yakat.

³⁰Kaput dawak Papang, prapit yakat kiwi aput kalyulna:

³¹“Yul disihta, laihwi duwi uina bitik balna yakat, Yang Papang yang kat yultayang: Semaías helam kaupak kidika, yang ayangki kau yuldibauna, kauna kidika yang lawik sihtasyang, dawak alas manayulna rahm kulnamana,

³²yang, Papangyang kat yultayang wah kalaki ki Semaías yakat, dawak sulani balna kau bik. Sulani duwas karang tawanki pasyakat, dawak yang lawik tawanki yakat alasna kalaki kidika, witing laih duwas karang, kat witing yulni kidika, yang yulki niningkau yaklauna bahang. Yang, Papangyang kat yultayang.”