Read Mayangna Jeremías 3 Bible Online

Jeremías 3 - Mayangna bible

Jeremías 3

¹Papang aput yulwi: “Muih al as yalni kaupak dakwi kalahwak, dawak yalni kidika kaldadawak, al ūk karak kalduwi, bahang alni tatuna dai kidika watwi kalduwas karang ki. ¡Bahang muih balna niningna yak di as dutni karang ki! Ban kauna, Israel man laih kaltalyangmana karak kalpakta watta kalduta payahtamana, ¡bahang waralaih, yang akat watta wirlanin kultamahn! Yang, Papangyang kat kaput yultayang.

²“Asang binina balna yakat yamni lakta talah: ¿Angdika pāni yak dutni yamnamanh? Tapas balna yakat yalahta saima balna tanina tahanaman. Sauma pāni maisihni yamnaman ahal mahni karak kalpakta, dawak di dutni yamnaman.

³Kidika bahang, was mani dawak kurih mani bik was lauwas dana. Man laih yal pini asalma dis makulna; ¡Bahang asalma kidika dunamki!

⁴Wisam aput yayultada: ‘Papangki, man kuduh wahma yang kat kaltalyang yamni mayang dai,

⁵¿yang niking yakat ban ismang daukalmayah? ¿Kulnam daukalna kidika ban kaput dumayah?’ Kidika yayultaman pasmunah, dutni balna yamnin sipman kidika laih yamnaman.”

⁶Josías kingkawa mani yakat Papang aput ya yulna: “¿Israel kulnin dutni witing di yamna kidika talna manh? Asang ubulni bitik minitna yak dawak pan nunuhni dinitna yak, saini balna karak kalpakwi dutni yamna.

⁷Yang kulna yang witing dutni yamna balna kidika usnit kat yang akat kaiwarang kulna yang, kaunah kaiwas dana. Dawak wirahni yal Judá barangni awas muihni kidika witing bitik talna adika dini;

⁸dawak Israel kulnin dutni nining yak dutni talik, witing karak daktik alahwanayang, al ūk karak kalpakwi dutni yamna yulni. Kauna Judá, Israel wirahni kulnin dutni kidika talwi yamaduwas dai, bahang witing bik al ūk karak kalpakwi dutni yamna.

⁹Witing nining yak isi palni yamna, dawak sauni kidika yak dutni yamna. Yulki dakawas dawi, kipala dawak pan balna yak minitna yuyulna.

¹⁰Dawak kidika yamna usnit kat, Judá yulki dakawas dai kidika, kulnin bitik yang kau kaiwarang kulnayang, kaunah nawatkauh alas yayulna. Yang Papangyang kat yultayang.”

¹¹Papang aput yayulna: “Israel kulnin dutni kidika dutni kuihwas yamna barangni-awas muihni Judá karak dawak.

¹²Yawa adika yulni yultah tingpal nining yakat tala: ‘Papang aput yulwi: ¡Yang akat nawatta aiwah, Israel kulnam dutni dutaman kidika! Dutni karuk laih madutas awakiki, dawak kulnik daukalna kidika ban dutas awaki ki, kat yang laih dalani lani dutayang bahang. Yang Papangyang kat yultayang.

¹³Dutni yamna man kidika manah amanglatah, man Papangma niningyak kulnam dutni yamna man kidika; dawak pa ūk yakat yawa muih kaltalasman balna kulninna dalani duduwa kidika walnaman pan nunuhni dinit balna yakat dawak yang yulki laih dakasdanaman. Yang Papangyang kat yulta yang.’ ”

¹⁴Papang aput yulwi: “Muih walanibis kulnin dutni duyang balna, nawatta aiwanauh, kat yang kuduh manna damanawan. Tawan nunuhni kaupak muih as, as yaktik duki, dawak sulani balna pasyak laih bu yaktik duki, dawak diating nawatwi Sayan yakat uiwarang.

¹⁵Kabamint balna kidika yang lawik yaktik manaki, angdika dukih yawa yakat, dawak sinsni nuhni kau tamanatuna kana karang.

¹⁶Dawak manna walamanabis mahni yaktanama kat saumana yak, muih as bik watwi Papang pranimis baksni kidika yulni yulwas karang, muih as bik kidika yakat kulwas karang dawak bik isningkatwas karang, kat ilp as dis bahang wisam ūk yamnin bik yamni-awas karang.

¹⁷Kaput laih Jerusalén kidika kalyulwarang, Papang trunni yaihnit yakat; dawak nisan balna bitik kidika pāni yakat kaluduhwi ayangki nuhni yayamna karang, dawak watwi laih witingna isningna dutni yamnin kukulwa yakat dadawak diduwi uiwas karang.

¹⁸“Kidika mani kaiwi kawarang kat, Judá kidika dawak albupak nawatwi tingpal niningkau sauni kaupak nawatwi aiwarang, kidika sauni laih yang lawik manna muihmana bararak balna yakat dianayang dai.

¹⁹“Israel, yang walakibis kapat madukihyana dai dawak sau as mana atnik tumnin-awas sauni kat, adika sauni pas akat tanit pa yamni kidika. Yang kulnayang laih man yayulma yang akat Papang, dawak watta bik yang kaupak naikau alahyawas awama.

²⁰Kauna muih yal as alni minikpa taihyang kapat, manna yang kau yayamna mana. Yang Papangmana yang kat yultayang.

²¹“Walang pasyak dinit as dakawi: ¡Kidika laih Israel balna kakaidi dawak yuyulwi miniknakun ditalna atnin! Ta barangni duduwa dai kaupak dawi kalalahna dawak Papangnina yang adika dinitnakahna.

²²Nawatta yang akat aiwanauh, walabis kulnamna dutni duyang balna; yang lawik kulnamna dutni kaupak yamni manayamki.” “Akat bangyangna, mawaltik aiwayangna, kat man kuduh yangna Papangkina man.

²³Asang ubulni balna tuna yakat kiunin bik ilp as diski dawak asang nunuhni balna yakat kiwi sarahnin bik; Mapapangki yakat manah ki Israel witing laihwi yaknin duwa kidika.

²⁴Dawan dauh asalni kidika yaklauwi yamwak di dis malahna, mayang mamuihki bararak balna yayakna dai kidika, mayang walabis mayang dai kidika mani yakat: bahang kidika kuduh sīp balna, turuh balna dawak walabis ahal dawak yayal bik.

²⁵Bahang ma asalki yakdi kalni dinit bukdanang, maikulnin lani dis, kat walabis mayang dai kaupak dawak warmani kat, mayang dawak mamuihki bararak balna kat mayang dutni yamna mayang Papang nining yakat, witing yulni sip dakadas mayang.”