Read Mayangna Jeremías 31 Bible Online

Jeremías 31 - Mayangna bible

Jeremías 31

¹Papang rahm yulwi: “Kidika mani Israel sulani balna bitik kidika yang Papangnina awaki, dawak witingna kidika yang tawanki karang.”

²Papang yulwi: “Kauhmak wanilang yakat kulnik dalani ditalnayang, tawan, daunin kaupak yaklalawa kidika. Israel yakurupdinin pāni as walwa dai kidika,

³yang witing yakat lāih alahwanayang[42] nai kaupak. Yang dalani matalnayang, dalani as ban kaput; kidika bahang dalani matalik tani yamtayang.

⁴Wattik madulauki Israel. Watta aiwama kilingnin dini karak, alasna ubutaman.

⁵Watta wain yamak dahma, Samaria asangni ububulni yakat, dawak wain dadahwa muihni balna kidika alasnina duwarang minik balna yakwak.

⁶Kat mani kaiwarang, makau kilwi maintalwa balna sararahwarang Efraín asangni ubulni balna yakat: ‘Manna aiwanauh, Sayan yakat mawanang, mayang Mapapangki yakat.’ ”

⁷Papang yulwi: “Unbautanauh alasna, Jacob tawanni yulni, nisan balna pasyakat tanit kulna kidika. Yamtang kat dakawang ayangni nuhni yamtamana kidika, dawak aput yultanauh: ‘Papang, witing tawanni laihwi yakna[43] Israel balna buas wawatwa kidika.’

⁸Yamting kat nawatwi aiwarang, tingpal niningkauh sau kidik kaupak, dawak sau bitik kaupak aiwi kalududuhwarang. Witingna karak aiwarang, miniknapa dis, dawak kalnina dakyamna kidika bik, yayal muih duduwa kidika, dawak uman walabis yayakna balna kidika bik; ¡muih mahni palni nawatwi aiwarang!

⁹Aiwarang minitna yulwi kaidīnah. Yang lawik duyawaki was murwa yakat, ta as langni munah, kalnina baunin awas yulni. Kat yang laih Israel Papangni yang, dawak Efraín laih walakibis al barakni.

¹⁰“Sau muihni balna Papang yulni dakanauh, dawak pa naikau balna yakat yultanauh: ‘Papang yaklauwi Israel kidika ruhna, kauna uduhwi maintalwarang ki, sīp maintalyang, sīpni balna maintalwa kapat.’

¹¹Kat Papang yaklauwi Jacob tawanni kidika laihwi yakna, laihwi yakna nisan as tanit parasni kaupak.

¹²“Aiwarang, dawak unbabauwarang alasna Sayan pāni maluih yakat, alasna duduwarang Papang yamni diyamwa kidika yulni: plawar, wain, disala, sīp dawak turuh, yamak as yamni was utuhna kapat karang, dawak watwi diswaskarang parasni kidika.

¹³Sirarau kidika alasna manah sutwi yakikisdarang, ahal wawahma dawak muih bararak bik sihm yakikisdarang. Yang lawik diaki walanina ānin: kakaida kidika alasna yakat wirlaki, dawak alasna kidika tanit nuhni diaki, dalani duduwa kidika karak dawakat.

¹⁴Yamting kat kakaswarang sumalyang balna kidika kasnin tanit yamni kidika, dawak tawanki kidika diki yayamni mahni duwarang. Yang, Papangyang kat yultayang.”

¹⁵Papang yulwi: “Muih dinit as dakana ki, Ramá yakat muih as kaidi tapalhni palni. Kidika laih Raquel walanibis balna yulnina kaidi, dukih kalawas ki walaniana atnin, kat uman dadauna bahang.”

¹⁶Kauna Papang yulwi: “Raquel, baisa kaidinih; baisa mamakwas utuhna, wauhtaman kidika mamat sakkarang: walamabis balna kidika waihla sauni kaupak nawatwi aiwarang. Yang, Papangyang kat yultayang.

¹⁷Tahanam as sakki tamat yakat: walamabis balna kidika saunina yakat aiwarang ki. Yang Papangyang kat yultayang.

¹⁸Dakanayang Efraín tawanni dalani wauhwa kidika tapalhni palni: ‘Yang adika turuh wahma as limahwas kapat yang dai, kauna man lawa yalimahna man; yamtangkat man yakat aiwakuh, kat man laih yang Papangki man.

¹⁹Yang man kaupak islawanayang, kidika bahang wauhtayang; yang dutni yamnayang kidika amanglanayang, dawak barahkimak yakat bautayang;[44] asalni kaldakayang dawak sauyak buktayang wahma yang kat dutni yamna yang yulni.’

²⁰“Efraín tawanni kidika laih, yang niking yakat walakibis as dalani ki; kidika walakibis laih baisa tanit dalani talayang. Biltayang karang bik, witing kidika dikit kahwaski; ising kidika kalitikwi, witing nining yakat dalani nuhni kaldutang. Yang, Papangyang kat yultayang.

²¹“Israel mark yamwi kiwi ta yakat, isi walwi yakna atnin; yamni talah lik atnaman tani kidika. ¡Nawatta aiwah, Israel tawanni nawatta aiwah tawanma nunuhni balna yakat!

²²¿Mampat kat pini aiwa yawa uimayah, walanibis yal pini diswalik kapat? Yang, Papangyang adika, sauni akat di wisam as yamna yang: Yal as kat watwi kulnin laihwa kidika alni kau.”[45]

²³Papang parasni nuhni bitik duyang, Israel Papangni, yulwi: “Yang, Judá muihni balna suerninati satuk wirlaki, dawak witingna saunina yakat nawatwi aiwarang dawak tawannina nunuhni yakat bik, dawak watwi aput yuyulwarang: ‘¡Papang yaklauwi bliskalyamna karang adika asangni maisihni dis akat, lā kat sakkidika!’

²⁴Judá muihni balna dawak tawanni nunuhni balna, di dahyang balna, dawak sīp maintalayang balna sīpnina kidika bitik yakat yalalahwarang.

²⁵Bahang, diating kakaswarang. Didiwarang manas palni, kidika balna disuhna parasnina dis balna yakat.”

²⁶Kidika yakat sahmuhnayang. Dawak amana talna yang kidika yamni dakanayang.

²⁷Papang rahm yulwi: “Ma as kaiwarang, yamting kat muih dawak didauh kidika balna manas karang, Israel dawak Judá yakat bik.

²⁸Dawak, kaput tahata sakyang dai, daktik yaknik, tuklaknik, sau yakat laknik, bahtik dis yamnik, dawak dutni kaldaukalnik, sihm kaput bik laih tahata sak awaki ki, wattik dulautik yamnik, dawak dahna atnik, bik. Yang, Papangyang kat yultayang.

²⁹“Kidika mani yakat watwi yulna awas karang: ‘Papangnina balna laih wain sapahni kakaswi, dawakat walaninabis balna laih ananina yuswi.’

³⁰Amput dawak wais wain minik sapahni kaswa kidika anan daukalna karang. Witingna bitik alas dutnina yulni dadauwarang.”

³¹Papang rahm yulwi: “Ma as kaiwarang ki, pramis wisamni yamki, Israel karak, dawak Judá karak bik.

³²Adika pranimis laih muihnina bararak karak yamnayang kapat laih awas karang, tingnina yakat laih datik Egipto kaupak yaknayang kidika, kat witingna prakimis kat yayamwas dai, yang di dawan yang dai karang bik. Yang, Papangyang kat yultayang.

³³Aput karang pramis yamki kidika Israel karak, kidika mani; Lāki kidik isning yakat āki, dawak kulnin yakat ulki. Yang witingna Papangnina awaki, dawak witingna kidika yang tawanki karang. Yang, Papang yang kat yultayang.

³⁴Baisa dukih kalanin diskarang, kaltalyang yamni, kalwanaih balna karak biri biri kalsumamalwas karang yang akat amangkilanin yulni, kat dibin kaupak nuhni kat amangkilalana karang bahang. Yang lawik dutnina kidika dating diswarang, dawak watbik dutnina kidika isingkattas awaki. Yang, Papangyang kat yultayang.”

³⁵Papang yaklauwi ma kidika āna sakki, yaringni yaknin madah yakat, dawak waiku, yala balna kidika laih pukta yakat yaringni duna atnin, yamwakat kuma kidika limakwi, lalamwa balna bik parasni yulwi, ayangni duwi, Papang parasni nuhni bitik duwa kidika yulwi:

³⁶“Ma askat adika lani balna anayang adika daukalwarang kat, kidika mani Israel kidika yang tawanki awas kalwarang. Yang, Papangyang kat yultayang.

³⁷Ma askat kisang kidika kukulwarang kat ampus pa, dawak sau adika bitik awaihwi talwi rahni ukna kidika yayakwarangkat, kidika mani Israel kidika dukih yāwas awaki di yamna kidika bitik yulni. Yang, Papangyang kat yultayang.”

³⁸Papang rahm yulwi: “Ma as kaiwarangki, tawanki nuhni kidika watwi dulauwi yamna karangki, ma kau kilwi maintalnin pāni Hananeel kaupak sipintang kau dūr kidika yakat.

³⁹Kung kiwi watwa balna kidika laih kiwarang barangni kidika yakaupak, Gareb asangni ubulni kat, dawak usnit kat, wirwi kiwarang Goa nining yakat.

⁴⁰Langni kidika bitik, muih dauwak nunuwa kidika, wan ruruhmwa kidika, dawak pa bitik Cedrón wasni tangniningkauh balna kidika kaupak, sipintang kau aras balna dūrnina kat, ma kilwa niningkauh, yang diki yayakna karang, bahang adika bitik watwi bahwi dis yamna awas karang.”