Read Mayangna Jeremías 32 Bible Online

Jeremías 32 - Mayangna bible

Jeremías 32

¹Papang yaklauwi Jeremías yakat yulkalbauna, Sedequías king kana kurih salap dai yakat, dawak Judá yakat, Nebokatnesar king kana kurih salap minitkau tiaskaubās dai.

²Kidika mani dai yakat, Babilon kingni ahalni kalbauyang balna Jerusalén nining yakat kalbauwa bangdai, dawak prapit Jeremías laih king uni maintalyang balna wataknina yakat awi puputna sakdai.

³King Sedequías yaklauwi pakwak lalaihna sakdai, kat Jeremías aput yulna dai kidika yulni: “Papang yulwi: ‘Yamtingkat adika tawanni nuhni Babilon kingni parasni dinityakat bukwarang,

⁴dawak king Sedequías laih Caldeo balna kaupak kiri yaklawas karang, nawatkauh laih Babilon kingni parasni dinit yakat bukwarang, dawak witing muhni yakat kiwi yaklaunin karang ki.

⁵Nebokatnesar yaklauwi Sedequías kidika Babilon yakat duwi kiuna karang, bahang yakat watna karang, wattik witing yulni kidika laihtik talki kat. Manna Caldeo balna niningna kauh kalbautanama bik, di as yamtas awanama. Yang Papang yang kat yultayang.’ ”

⁶Dawak Jeremías yulna: “Papang yang akat kaiwi yayulna:

⁷‘Talah man wahaima Hanameel, kanma Salum walanibis kaiwi mayulwarang ki sau as mabakannin, kalwanaihmana bahang.’

⁸Papang yayulna dai kaput, wahaiki Hanameel kaiwi yatalna watak yakat, dawak yayulna Anatot kau sau as duwa kidika yabakanna atnin, kidika sauni laih, Benjamín sulani balna saunina pasyakat pakdai, kat yang laih rahmki dutayang dai bahang bakannin, dawak yakat watnik, kat kalwanaih balna yang dai bahang. Amanglana yang dai Papang yamwa kidika, kaput,

⁹bahang bakanna yang dai kidika pāni, wahaiki Hanameel kaupak. Kalanayang dai lalah dadasni salap minitkau tiaskaubu, kidika pāni minit laih kaput dai, dawak wauhtaya kidika ulnayang, dawak tamp taihnayang, kaput bik laih muih bu ayangnina uhulna dai.

¹¹Usnit kat ulna wauhnitaya kidika bu dunayang, as laih tamp taihna, kat bakanna bahang, dawak ūk kidika laih kurahni dai,

¹²dawak, Nerías walanibis Baruc yakat kalanayang, Nerías mani wahaini Hanameel muhni tani kat, dawak witnis balna muhnina yakat bik, dawak Ju balna watak kau yalahna bangdai kidika bitik muhnina yak ayangki ulnayang.

¹³Kidika balna bitik muhnina yakat, kalyulna yang Baruc yakat:

¹⁴‘Papang parasni nuhni bitik duwa kidika, Israel Papangni, yulwi: Adika wauhnitaya balna bupak duta apaktah, sau kau sulun yamna payakat, kaput laih nai apakwi duna atnin.

¹⁵Kat, Papang parasni nuhni bitik duwa kidika, Israel Papangni kidika yulwi: Adika sauni akat watwi bakakanwarang, ū, sau dawakat wain yamak bik.’

¹⁶“Bakannayang wauhnitaya kidika Nerías walanibis Baruc yakat kalanayang usnit kat, Papang yakat aput mikit yulnayang:

¹⁷‘Man, Papang parasma nuhni kau yamnaman, kisang dawak sau bik. Man namang yakat sipawas dini kidika diski.

¹⁸Man dalani lani dutaman kidika, sulani tausin balna kau bik niningkataman, kaput kauna ahal yakat wah diataman, papangnina balna dutni yayamna kidika yulni. ¡Papang nuhni, parasna bik nuhni, man ayangma laih, Papang parasni nuhni bitik duyang!

¹⁹Man laih nuhni man yamnam balna yakat, dawak parasma nuhni man yamtaman balna yakat. Man talaman muihni ahal yayamwa kidika bitik, dawak minit diataman amput yayamwa kidika kaput.

²⁰Man, taldas dini balna kidika yamnaman, dawak wayani kau bik yamnaman Egipto yakat, warmani kat bik ban kaput yamtaman, Israel pasyak dawak muihni bitik pasyakat, bahang ayangma laih nuhni kalna.

²¹Man parasma nuhni kau, tawanma Israel kidika Egipto kaupak yaknaman, muih al sip yamwas kidika kau muih bitik yamadangni dakakana.

²²Israel balna yakat adika sauni dianaman, tāwas dawi amak karak was kapat kira kidika, muihnina bararak balna kau bik pramis yamnaman dai.

²³Witingna adika sauni akat kawi panina duduna kauna yulma dakawas dadana, yamnin dianaman bik, yakat yamwas dadana as bik. Kaput bahang sihtang kaina, di dis kalnin, kidika.

²⁴‘Waralaih Caldeo balna sau kuhrwi mukwi ihilna kat, mahka, tawan nuhni nining yakat kalbaunin yayamwi mahka, dawak wār, yuh, yamah dutni yaklauwi yamwak adika tawanni nuhni, nining kauh kalbabauwa balna tingnina yakat bukwarang. Papang, talaman, yulnaman yakat kalahwi.

²⁵Kaput kauna Papang, man lawa yapaknaman kidika sauni bakanna atnik, dawak minit launa atnik witnis bu talwa raukat, adika tawanni nuhni Caldeo balna tingnina yakat bukwarang kauna.’ ”

²⁶Kaput dawak Papang yaklauwi Jeremías yakat nangnitlana:

²⁷“Yang laih Papangyang, sangnika duwa balna bitik Papangnina. Sip awas dini as bik diski yang niking yakat.

²⁸Kaput kat yang mayultayang: yamting kat adika tawanni nuhni, Babilon kingni Nebokatnesar dawak Caldeo balna parasnina dinit yakat bukwarang.

²⁹Caldeo muihni balna tawan nuhni niningkauh kalbauwa bang kidika, kawi kuh kau dadahlna karang; dawak yaihnitkau ū balna kidika mayakat kilwi walapni bubuswa dai kidika Baal kau, yang akat yauswi, dawak dawan dauh balna kau wain diayawa dai kidika, bitik libitwi bubusna karang.

³⁰Tatuna kaupak, Israel tawanni, dawak Judá tawanni kidika niningh yayamna, yang yamni talasyang dini kidika; Israel balna yauhuswa kidika dadawasdai, dawan dauh witingna yaklauwi yayamwa kidika kau. Yang Papangyang kat yultayang.

³¹Dawak, adika tawanni nuhni, mahka dulauwi yayamna mani kaupak, warmani kat, di ūk yayamwas ki, yang kulnik daukalnin manah. Bahang yamting diswarang pini,

³²yauhusna kidika bitik, yulni, dutni yayamna kidika, Israel tawanni, dawak Judá tawanni bik, sihm kingni balna, tatuna nunuhni balna, sumalniyang balna, pranipit balna dawak, Judá, Jerusalén muihni balna bitik.

³³Dangnitna yakat yalalana, muhnina yakat laih awas ki. Kaput kauna sumaltayang kidika datasyang, yulki bik dakawas dadana dawak barangni ānin yamtayang kidika bik duwas dadana.

³⁴Makatyulnin uni, yang kau wirlalana dai kidika bik rispik diayawas dadana, yakat dawan dauh duduwa maisihni dai kidika ihilna.

³⁵Sihm sakripais busnin pāni Baal yakat yamwi kalalana Benhinom langni yakat, walaninabis ahal, yayal busna atnin sakripais Moloc yakat, kaput yamwak Judá dutni yamnin, di as maisihni kidika yamnin paktas yang, dawak kulnik kau bik kultasyang dai.

³⁶“Yang, Papangyang, Israel Papangni, yultayang tawan nuhni adika yulni, man yultaman[46] kidika, Babilon kingni parasni dinit yakat bukwarang, wār, yuh, yamah dutni kidika yulni:

³⁷Uduhki tawan muihni balna bitik, sau bitik kau kalating ruhwi kiuna dai kidika, yapulihwak, kulnik daukalna yamadangni, dawak yamting nawat aiwarang, akat kulninnalak yalalahwarang.

³⁸Witingna kidika yang tawanki karang, dawak yang laih Papangnina awaki.

³⁹Yamting kat kulninna aslah duduwarang, dawak sangninaka bitik kidika yang ayangki yamni yayamwarang, witingna yamni atnin kidika, dawak sulanina balna kau yamni atnin kidika bik.

⁴⁰Witingna karak pramis as ban kaput atnin yamki: pramis diyamki, danik awas yamni yamtayang kidika, dawak dibuhngki ayangki yamni yamnin kidika dukih dianin dawak yang kaupak watwi dawi kalalahwas karang.

⁴¹Yang alasna awaki, yamni yamnin kidika, dawak ising bitik, kulnik bitik rahm, diyamting kat, adika sauni akat yalalahwarang.”

⁴²Papang baisa minit yakat lakwi yulna: “Di dis kalnin nuhni sihnayang kidika adika tawanni akat, kaput sihm sihki ki, di yamni kalanin pramis yamnayang kidika.

⁴³Dawak adika sauni akat, yultaman[47] kidika, kauhmak wanilang kalwarang, muih, dis, didauh balna bik, dawakat Caldeo balna parasnina dinit yakat bukwarang, watwi sau bakakanwarang.

⁴⁴Bakakanwarang dawak, kidika dini wauhtaya kau uhulwarang, tamp tataihwarang, dawak witnis balna bik ayangnina uhulwarang. Adika kalahwarang Benjamín sauni Jerusalén yaihnit awaih kau yakat, dawak Judá tawanni nunuhni balna yakat bik, asangnipas yakat, dawak walang yakat bik, dawakat Néguev tawanni nunuhni bik, kat yang lawik yamting suerninati satuk wirlawarang. Yang Papangyang kat yultayang.”