Read Mayangna Jeremías 33 Bible Online

Jeremías 33 - Mayangna bible

Jeremías 33

¹Jeremías kidika baisa kalbauyang balna wataknina yakat silakkau sakkat, watwi Papang kidika witing yakat kiwi kalyulna:

²“Yang Papangyang sau yamnayang kidika yamtik pāni kat kalanayang, kidika bahang mayultayang:

³yayulta, yang nangmatlaki, di nunuhni taldas dini kidika namangkaki man talasman dini kidika.

⁴Yang Papang, Israel Papangni yang yul as dutayang Jerusalén yulni, dawak Judá uni balna yulnina bik, bahang kidika balna laih daukalmukna karangki. Caldeo balna niningnayakat kalahwi isparah kau kalbabauwarang kidika laih muih dauna manah buhng dawarang. Yang kulnik daukalna yamadangni kidika kau yamtingkat dadauwarang ki, kat yang muhki kidika tawan nuhni kidika yakat talas danayang di dutni mahni yayamna kidika yulni.[48]

⁶Kaunah yang lawik sikninanis kidika yamki muihnina yamni diyamki dawak kulnin aslah lani kidika duwi alasna karang dawak dutni as bik dis karang witingna yakat.

⁷Judá suerniti, dawak Israel suerniti kidika bik satuk yamki, wattik dulautik yamtingkat tatuna dai kapat karang.

⁸Dutni yamna balna kidika bitik klin yamki, yang nikingkauh; dutni yayamna kidika bitik dating disna karang yang nikingkauh yaklalauna dai kidika.

⁹Jerusalén kidika yang niking yakat alasna as karang, risnipik dawak alasnina yaksihni kidika nisan balna bitik. Witingna dakakawak Jerusalén muihni balna minitna yakat duaiki kidika, dawak baraknin satni bitik kalaki kidika, yamaduduwak diyukwarang.”

¹⁰Papang yulwi: “Manna yultamana adika pāni laih kauhmak wanilang kidika yakat muih dawak didauh balna bik diski; Jerusalén tani balna kidika, dawak Judá tawanni nunuhni balna kidika pāni manah ki; muih dawak didauh balna bik diski timana yakat. Bahang manna dakanama watta

¹¹alasna dakawi unbabauwak marid wawahma kidika unbauwi yuyulwakat dakana karang: ‘Papang parasni nuhni bitik duwa yakat tingki kalatanauh, kat Papang kidika laih yamni ki, dawak dalani lani duwa kidika laih ban kaput ki saran dis.’ Mani balna kai'kawak minit dis kalanin dini kidika duahaiwarang. Agha, yang lawik adika muihni balna suerninati satuk yamki, tatuna dai kapat dawarang. Yang, Papangyang kat yultayang.”

¹²Papang parasni nuhni bitik duwa kidika yulwi: “Adika pāni muih didis kidika didauh balna bik, dawakat tawan nunuhni balna yak, kidika balna yakat watwi sihrsihr ukuswi sīp maintalyang balna kidika sīpnina kidika yakat duwi uiwarang.

¹³Tawan nunuhni balna yakat, asangpas yakat bik walang yakat bik, dawak Néguev yakat bik dawak Benjamín sauni yakat bik, kaput bik Judá tawanni nunuhni balna yakat bik watwi talna karang sīp maintalyang balna kidika sīpnina yakat kulwi tatalwakat. Yang, Papangyang kat yultayang.”

¹⁴Papang aput karang ti: “Mani kiwi kawarang blisin pranimis kidika yakat yamna karang, Israel dawak Judá yakat yamnayang dai kidika.

¹⁵Kidika mani kiwi kawakat kalatingkat Devid kidika witing sulani palni as duna karang, bahang witing yaklauwi lā kat barangni kidika ana karang kidika pāni yakat.

¹⁶Kidika mani Judá dawak Jerusalén yakat laihwi yakna karang kaput laih yalalahna karang dutni as bik dis. Adika ayangni kau diyuyulna karang: ‘Mayang minit bayakda kidika laih Papang yakat.’

¹⁷Yang Papangyang kat yultayang: Devid sulani as bik dis awaskarang Israel trunni yakat yalahna atnin,

¹⁸kaput bik sumalyang nunuhni balna Leví sulani balna kidika dis awas karang ki ma bitik yakat sakripais yamnin kidika, plawar minik busna atnin yang ayangki kau dawak kaput bik sakripais ūk balna kidika yang yakat yamna atnin.”

¹⁹Papang Jeremías yakat kiwi kalyulna:

²⁰“Yang Papangyang kat yultayang: sip-awas palni ki pramis as yamna yang kidika yamtas atnik manah dawak pukta balna yakat, yuldarang kat madah pukta kidika awarni kat kiwi kawas atnin kidika.

²¹Sihm kaput laih sip-awas palni karang diki yamyang Devid kau pramis yamnayang kidika yakat kalahwas atnin, dawak witing sulani as bik dis atnin trunni yakat yalahna atnin, kidika awas bik Leví sulani balna sumalyang nunuhni balna niningyakat pramis ki kidika yakat yamtas atnik.

²²Devid sulani balna kidika dawak Leví sulani balna sumalyang nunuhni balna kidika yamtingkat mahni kalahna karang makau kisang kau yala balna kapat, kuma kauhnimak kapat muih as bik kulwi talna atnin sip-awas kidika.”

²³Papang kidika Jeremías yakat kiwi kalyulna:

²⁴“¿Man amanglatas man muih balna yuyulwa kidika Israel dawak Judá kaupak sulani bu yaktik dunayang dai kidika damuknayang atwa kidika? ¡Kidika bahang tawanki yakat dauh kaltatalwi, nisan as kapat kukulwas ki!

²⁵Kat yang Papangyang kat yultayang: Yang pukta dawak madah karak pramis as yamnayang kidika, dawak kaput bik la balna kidika atik danayang makau kisang dawak sau kidika amput tunan kanin kidika bik,

²⁶wat as bik Jacob sulani balna kidika ruhmtik datas awaki, kaput bik Devid sulani balna bik, kidika paskaupak tunan kanin muihni balna yaktayang kidika datas awaki, abraham, Isaac dawak Jacob sulani balna paskaupak. Kat yang lawik witingna yakat miniknakun ditalki dawak yamting kat suerninati kidika satuk kalna karang.”