Read Mayangna Jeremías 34 Bible Online

Jeremías 34 - Mayangna bible

Jeremías 34

¹Babilon kingni Nebokatnesar, witing kalbauyang muihni balna duwa kidika laih sau akat nisan balna bitik kaupak walwi uduhwi duna dai, witing dinit yakat atakwi duwa kidika, bahang kaput laih Jerusalén niningyakat kalbauna dai kaput bik yaihnit kau tawan nunuhni balna yakat bik kalbabauna dai, Papang kidika Jeremías yakat kiwi kalyulna dai:

²“Yang Papang, Israel Papangni yang, ma sihtayang king Sedequías yakat yawa kalyultah: ‘Papang aput yulwi: yamtingkat Babilon king kidika yaklauwi adika tawanni nuhni akat kaiwi kawi kuh kau busna karang.

³Man laih ira lawas awama witing tingni kaupak; malaihwi witing tingni yakat ma-ahana karang witing muhni yakat maduwi uiwarang usnit kat Babilon yakat madu'kiuna karang.

⁴Kidika bitik, dakah, Sedequías Judá kingni, yang Papangyang kat mayultayang kidika: isparah kau laih dautas awama.

⁵Ismanglak dauma, dauna man yakat walapni bubusna karang man muihma bararak balna sara mani tunan kawi dadauwak bubusna kapat, dawak yuyulwarang: ¡Alakaih papang!, man yulma kakaidarang. Yang Papangyang kat yulki balna kidika matayang.’ ”

⁶Prapit Jeremías adika yulni balna bitik Jerusalén yakat kiwi king sedequías yakat kalyulna.

⁷Kaput laih Babilon muihni kalbauyang balna kidika Jerusalén nining yakat kalbauwa bang dai, Laquis dawak Azeca yakat bik, kidika tawanni nunuhni balna manah pararasni dai Judá yakat, bahang kidika balna manah raudai.

⁸Papang Jerusalén yakat kiuna, king Sedequías kidika pramis as yamna dai Jerusalén muihni warau lāni dinit yakat bang kidika laihwi yakna atnin.

⁹Pranimis kidika laih warau al, yal, duwa kat hibru muihni balna kaupak kidika laih pri yakna atnin, kaput laih witingna wanaihni balna kidika as bik warau lāni yakat atnin awas.

¹⁰Tunan muihni balna bitik dawak muih balna bitik adika pranimis yamni kukulna dai warau balna kidika pri damukna atnin, watwi papakwak dinina yamnina awas.

¹¹Pri lāni diayana usnit kat satuk kukulna, watwi laihwi duwi aina warau lāni kat witingna dinina yayamna atnin.

¹²Kaput laih Papang kidika Jeremías yakat kiwi kalyulna:

¹³“Yang Israel Papangni yang muihma bararak balna karak pramis as yamna yang dai Egipto kaupak warau lāni yakat bangkat yaktik duainayang dai yakat. Dipaknayang

¹⁴kurih tiaskaubu laihwa bitik yakat Hebreo muihni balna kidika pri damukna atnin, witingna bakanwi duduna dai pa dawak kurih tiaskauas dinina yayamna kidika. Kaunah muihmana bararak balna kidika yulki dakakawas dadana dai.

¹⁵Waralaih manna kulnamna kidika satuk wirlanamana dai, dukih yawa kaput yamna mana dai wanaihmana balna kidika warau lāni kaupak yaknin. Kidika pranimis kidika yang muhkit kat yamna mana dai, makat yulnin uni yang ayangki kau yamna yakat.

¹⁶Usnit kat watta kulnamna kidika satuk wirlana mana, dawak ayangki daukalnamana, wanaihmana balna warau lani kaupak diyakmukna mana dai kidika watta laihta duaita ānamana dai dimana yamna atnin.

¹⁷Kaput bahang yang Papangyang kat yultayang: yang yulki dakasdana mana wanaihmana balna kidika pri yaktas danamana, kidika bahang waralaih pri dating kaiwarang ki, war, siknis, yuh kaput laih manna namangna yakat yamwak muihsak dadauna karang sau kingni balna bitik yakat. Yang Papangyang kat yultayang.

¹⁸Judá dawak Jerusalén tunan muihni balna kidika, king uni kau wark yamyang balna, sumalyang nunuhni balna dawakat muih ūk balna bik yang yakat uiwi pramis as yayamna dai: turuh almuk bin as iwi papus titihrna kidika papus munah duwi bayakna. Kaunah usnit kat pranimis kidika dutni yayamna pramis kidika dutni yamna dawak yuyulna yakat yayamwas dadana.

²⁰Kidika bahang yang lawik yamting kat waihninala dudutni balna tingnina yakat bubukna karang, witing muihni nuhni kidika kusma balna dawak nawah balna kakasna karang.

²¹Kaput bik laih yamtingkat Judá kingni Sedequías dawak kalbauyang muihni balna duwa kidika bik waihninala balna tingnina yakat bubukna karang, Babilon kingni kalbauyang muihni balna duwa kidika tingni yakat, kauna witing laih waradika niningnakauh yaklauwa dai kidika dana.

²²Yang lawik paktingkat watwi kiwi kidika tawanni nuhni niningyakat kalbauwarang, kawi duwi kuh kau busna karang. Kaput bik laih Judá tawanni nunuhni ūk balna bik laih kauhmak wanilang kalna karang muih as bik dis karang. Yang Papang yang kat yultayang.”