Read Mayangna Jeremías 35 Bible Online

Jeremías 35 - Mayangna bible

Jeremías 35

¹Judá kingni, Josías walanibis Joacim, mani balna dai yakat, Papang yang akat kaiwi yayulna:

²“Recabita balna panina yakat yawa witingna karak yulbautah. Usnit kat duyawa makat yulnin uni pasyakat dawak wain diatah.”

³Yang Jeremías, Jaazanías yakat waltik yawanayang (Jeremías ūk walanibis, Habasinías mani), dawak wirahnina ahal balna yakat bik, dawak recabita balna panina bitik yakat.

⁴Dawakat makat yulnin uni yakat yawanayang Hanán walanibis balna dawak Igdalías walanibis balna rumnina yakat, bahang witing laih Papang alni as dai. Adika rumni laih makat yulnin uni tunan muihni balna rumnina yaihnit yakat dai, dawak Maasías Salum walanibis rumni minit yakat, bahang witing laih makat yulnin dūrni maintalyang dai.

⁵Recabita balna yakat wain dianayang dai sutak balna kidika bung, dawak diyulnayang: “Wain apis ditanauh.”

⁶Witingna yayuyulna: “Yangna wain ditasyangna kat Recab walanibis Jonadab, muihkina barak dai kidika yaklauwi wain dinin-awas yana yulna dai yangna akat, dawak sulakina balna yakat bik.

⁷Kaput bik laih yana yulna dai ū yamnin awas, di dahnin awas wain yamak bik dunin awas. Witing yaklauwi yanayulna dai ū labanni kau manah āwinikna, kaput laih adika sauni akat ma mahni sangka atnikna yulni yangna pa ūk muihni kapat bangyangna adika.

⁸Yangna muihkina barak Jonadab yana yulna yakat yamtayangna, kidika bahang wain ditasyangna, yalkina balna dawak walakinabis balna bik,

⁹ū bik yamtasyangna āwinikna, wain yamak bik disyangna yamak bik disyangna.

¹⁰Yalahtayangna ū lababanni kau yangna muihkina barak Jonadab yanayulna yakat yamtayangna.

¹¹Kaunah Babilon kingni Nebokatnesar adika sauni akat kaiwi kalbauna kat, Jerusalén akat aiwanayangna Caldeo balna dawak Sirio balna kidika kaupak irik; kidika yulni yangna Jerusalén akat yalahtayangna.”

¹²Kaput laih Papang kidika Jeremías yakat kiwi kalyulna:

¹³“Yang Papang paraski nuhni dutayang dawak Israel Papangniyang, masihtayang Judá dawak Jerusalén muihni balna yakat yawa diyultah: ‘Di lan alahwah dawak yultayang yakat daka yamtah. Yang Papangyang kat yultayang.

¹⁴Recab walanibis Jonadab sulani balna laih witing yulna yakat yayamna wain didiwas dadana, warmani kat didiwas ki, muihnina barak yulna yakat yayamwi. Yang bik manna yakat lā mananayang wat wat, kaunah yulki dakas mana.

¹⁵Manasihnayang manna yakat diki yamyang prapit balna, manayulna atnin: Dutni yamta mana kidika dana atnamna. Dawan dauh balna usnitna uiwinih prinias bik yayamwinih, kaput laih adika sauni muihmana bararak balna yakat dianayang dawak manna yak bik mananayang kidika yakat yalahtanama. Kaunah manna yulki dakasdana mana.

¹⁶Recab walanibis Jonadab sulani balna kidika yakat yul diyulna dai yakat yayamna dai; kaunah Israel tawanni laih yulki dakawas dana.

¹⁷Kidika bahang Papang parasni nuhni bitik dutayang kidika, Israel Papangni yultayang: Yamtingkat Judá dawak Jerusalén muihni balna bitik minitna yakat wauhnin dini kidika bukna karang yulna kaput. Kat yang lawik manayulnayang, kaunah yulki dakasdana mana; kainin manayulnayang kaunah nangkitlatas dana mana.’ ”

¹⁸Baisa minit yakat Jeremías yaklauwi Recabita balna yakat diyulna: “Israel Papangni parasni nuhni bitik duwa kidika yulwi: ‘Manna laih muihmana barak Jonadab yulni dakanamana bahang, yulna yakat talna mana bahang dawak bik witing yulna yakat yamnamana bahang,

¹⁹yang Israel Papangni paraski nuhni dutayang kidika yultayang Jonadab sulani balna as bik dis laih awas karang yang diki yamyang atnin.’ ”