Read Mayangna Jeremías 36 Bible Online

Jeremías 36 - Mayangna bible

Jeremías 36

¹Judá kingni, Josías walanibis, Joacim witing king kawi kurih arungka laihna yakat, Papang kidika Jeremías yakat kiwi kalyulna:

²“Ulnin wauhnitaya tulna kidika as duta, dawak ultah yang Judá dawak Israel yulni mayulnayang balna bitik, dawak nisan balna ūk kidika bik, Josías mani balna dai yakat yulbaunayang dai kaupak warmani kat.

³Sip kat Judá witing dakawi kulnin wirlawarang yang wauhnin dutni sihki kidika yulni, bahang kaput laih dutni yamwa kidika dawarang, bahang yang dutni balna yamna kidika dating diswarang.”

⁴Jeremías yaklauwi kalyulna Nerías walanibis Baruc yakat kiuna atnin, dawak Papang yulna balna dai kidika bitik yulwak ulna Baruc yaklauwi ulnin wauhnitaya tulna yakat.

⁵Usnit kat Jeremías yaklauwi Baruc yakat ais amput yamnin kidika balna kalyulna: “Talah, yang amput yang kidika, sip-awasyang Papang uni yakat yawinik.

⁶Bahang man yawah, dikaswas atnin mani kaiwa kidika yakat, dawak wauhtaya tulna yakat mayulting man ulnaman kidika yulta talah, kaput laih muih balna bitik Judá tawanni nuhni akat aina adika Papang yul yulwa kidika dakakana karang.

⁷Sip kat Papang kalni dinit yakat bukwi yuyulwarang, dawak dutni yayamwa kidika bik dadawarang, kat Papang kulnin daukalwi adika tawanni nining yakat yulna kidika laih yamadangni ki.”

⁸Baruc witing yamna dai, prapit Jeremías kalyulna balna bitik: makatyulnin uni yakat kiwi wauhtaya tulna dai kidika yulwi talna, Papang yulni dai kidika.

⁹Judá kingni, Josías, Joacim king kawak kurih singka laihwak waiku tiaskauarungka kana yakat yulna dai Jerusalén muihni balna dawak Judá tawanni nunuhni balna ūk kaupak aina yakat bik, Papang muhni yakat dikaswas atnin.

¹⁰Baruc kidika makat yulnin ūni wattakni nuhni yakat kiwa dai dūr wisam nining yakat, Safán walanibis yul ulyang Gemarías rumni kaupak, yulwi talwa dai muih balna bitik muhnina yakat, wauhtaya tulna dai kidika bahang kidika yakat Jeremías yulni balna kidika ulna bang dai.

¹¹Safán mani, Gemarías walanibis Micaías, witing Papang kaupak yul sihna kat Baruc yulwi talna kidika bitik dakana,

¹²king uni yakat kiwi yul ulyang rumni kau tunan muihni balna bitik kaluduhna bang dai yakat: yul ulyang Elisama; Semaías walanibis Delaía; Acbor walanibis Elnatán; Safán walanibis Gemarías; Hananías walanibis Sedequías, tunan muihni ūk ūk bik bangdai.

¹³Micaías yaklauwi diyulna, Baruc tawan muhni yakat yaklauwi wauhtaya tulna yulwi talna yulni balna bitik.

¹⁴Tunan muihni balna yaklauwi sisihna Cusi buhni, Selemías mani, Netanías walanibis Jehudí kidika kiwi Baruc yakat kalyulnin wauhtaya tulna muih muhnina yakat yulwi talna kidika sihna atnin. Kaput laih Baruc wauhnitaya tulna kidika duwi niningna yakat kiuna,

¹⁵dawak witingna yaklauwi kalyuyulna: —Yalahda tulna kidika yultatala mayatah. Baruc yulwi talna,

¹⁶dakakana minitni yakat muihsak dauwi biri biri kaltalwi yuyulna:[49] —Adika yulni balna bitik king yakat kalyulnin.

¹⁷Usnit kat Baruc yakat kalyuyulna: —Maiyultah amput ulna manh adika.[50]

¹⁸Baruc yaklauwi nangnitnalana: —Jeremías yaklauwi yayulna dawak yang ulnayang wauhtaya tulna yakat.

¹⁹Kaput laih Baruc yakat kalyuyulna: —¡Kaput kat man dawi Jeremías karak yawa maldanauh, muih as bik amanglanin awas angkat raumana pa!

²⁰Tunan nunuhni balna kidika yul ulyang Elisama rumni yakat wauhtaya tulna dai kidika datutusna dai, dawak king yakat uina kalyulna atnin adika dini balna bitik.

²¹King yaklauwi Jehudí yakat sihna yul ulyang Elisama rumni yakat wauhtaya tulna kidika dukiuna atnin, dawak Jehudí dukiuna, king muhni yakat dawak tunan nunuhni balna muhnina yakat bitik yulwi talna dai.

²²Kidika wainiku yakat kidika, waiku tiaskauarungka dai bahang king witing waslakwak rumni kawa yakat kana sakdai, bahang witing muhni yakat kuh tuturni dahlwa sakdai.

²³Jehudí witing yulwi talwi bayakwak pis arungka, king yaklauwi wauhnitaya kidika kuhbil kau dakwi kuh tuturni pasyakat ruhm'āna. Kaput laih wauhnitaya tulna kidika bitik busna.

²⁴King dawakat tunan muihni nunuhni balna kidika yulwi talwak dakawi yamaduduwasdai dawak bik didalawasdai.

²⁵Elnatán, Delaía dawak Gemarías witingna king yakat kalyuyulna wauhtaya tulna kidika busnin awas, kauna witing yulnina dakawas dai,

²⁶nawatkauh laih king walanibis tatuna Jerameel, dawak Azriel walanibis Seraías yakat, Abdeel walanibis Selemías balna yakat dipakna prapit Jeremías dawak Baruc yakat laihna atnin. Kaunah Papang yaklauwi malmukna dai.

²⁷King yaklauwi wauhtaya tulna kidika busna usnitkat, Jeremías yaklauwi yulwak Baruc ulna dai kidika; Papang yaklauwi Jeremías yakat kiwi kalyulna:

²⁸“Wauhtaya tulna ūk duta ultah muhnilau ais ulna bangdai kidika bitik, Judá kingni Joacim yaklauwi busna kidika.

²⁹Dawak aput kalyultah: ‘Papang aput yulwi: Man wauhtaya tulna dai kidika busna man dawak Jeremías yakat bilna man Babilon kingni akat kaiwi adika sauni daukalpamwi muih dawak didauh balna bitik iwi dis yamwarangti yulni balna ulna dai kidika.

³⁰Yamni ki, yang Papangyang kat mayultayang man yakat Judá kingni Joacim, man sulama balna dutas awama Devid trunni yakat yalahnin kidika. Man muihma nuhni kidika madaihni yakat yakna karang madah yakat, pukta yakat laih sanni yakat mayakna karang,

³¹man dawak sulama balna, tāmatuna nunuhni balna bik wah diaki dutni yayamna yulni. Yamtingkat manna mamatna yakat, Jerusalén muihni balna minitna yakat dawak Judá yakat bik wah balna kaiwarang yulni balna yulnayang dai kidika, kidika yakat manna rahm kultas mana dai.’ ”

³²Kaput laih Jeremías wauhtaya tulna as duwi Baruc yakat kalana, yul kalyulwak ulyang muihni yakat, kaput laih Jeremías kalyulna balna bitik ulna dai, yuldarangkat sihm kapat, wauhtaya tatuna kau ulna balna bangkat king Joacim buspamna dai kidika. Jeremías yaklauwi minityak baisa lakna dai yul ūk balna bik.