Read Mayangna Jeremías 37 Bible Online

Jeremías 37 - Mayangna bible

Jeremías 37

¹Babilon kingni Nebokatnesar yaklauwi Judá yakat king ana dai Josías walanibis Sedequías yakat, kidika laih Joacim walanibis Jeconías pāni yakat.

²Kaunah Sedequías, dawak tunan muihni balna, kaput bik tawan muihni balna bik Papang yulni Jeremías munah sihwa kidika kukulwas dai.

³King Sedequías yaklauwi sihna Selemías walanibis Jucal, dawak Maasías walanibis sumalyang nuhni Sofonías, prapit Jeremías yakat aput kalyulna atnin: “Yang yulkina mamatyultah Mapapangki yakat.”

⁴Jeremías kidika baisa lalaihwas likdai bahang sip dai tawan pasyakat lik atnin.

⁵Fero ahalni kalbauyang balna uman Egipto kaupak kalalahna dai. Caldeo muihni balna Jerusalén niningyakat kalbabauwa kidika dakakana, bahang kidika kaupak dawi kalalahna.

⁶Kaput laih Papang Jeremías yakat kiwi pakna yulna atnin

⁷witing ayangni kau sihna muihni balna: “Judá kingni yakat kalyultanauh yang akat yayulwi dakanin muih sihna kidika, Fero ahalni balna kalbauyang ta yakat kalahwi aiwa dai kidika tingninasut laihna atnin, Egipto yak nawatwi uina.

⁸Caldeo muihni balna kidika nawatwi aiwarangki Jerusalén yakat kalbauna atnin, kawi duduwarang dawak kuh kau bubusna karang.

⁹Yang Papangyang kat manayultayang: Manna kukulwinih Caldeo balna kidika mahka nawatwi uiwarang, kat kaput awas karang bahang.

¹⁰Kalbauyang muihni Caldeo balna kidika bitik manna lawa minit bayaktanama dawak bulah bin wawatwarang, dihina balna kidika yaklalauwi tawan nuhni kidika kuh kau bubusna karang.”

¹¹Caldeo muihni balna Jerusalén niningyakat kalbauwa bangkauna nawatwi alahuina kidika laih witingna dakakana Fero muihni balna kidika yakat uiwi atwak,

¹²Jeremías kidika tawan nuhni kaupak kalahwi Benjamín sauni yakat kiuna di pahni balna sahyayakwa kidika warkni yamna atnin[51] witing sauni muihni balna pasyakat.

¹³Kaunah Benjamín dūrni yakat kiwi kawak Ananías mani, Selemías walanibis Irías kidika sakdai, witing kidika tawan maintalyang taninatuna as dai, Jeremías yakat laihwatwi kalyulna: —¡Man Caldeo balna pasyakat lāwama yah!

¹⁴Jeremías yaklauwi nangnitlana: —¡Rahm awaski, yang Caldeo balna pasyakat āwas awaki ki! Kaunah Irías dakawas dana kaput laih laihwi tunan nunuhni balna yakat duwi kiuna.

¹⁵Adika balna Jeremías niningyakat parasni ahanna papakna bauwi dawi silak ānin Jonatán yul balna ulyang uni yakat, bahang kidika uni laih silak uni yayamna dai.

¹⁶Jeremías kidika ū dinit kau puksani yakat duwi uina dai, bahang kidika yakat laih ma mahni sakdai.

¹⁷King Sedequías yaklauwi pakna Jeremías kidika king uni yakat duwi kiuna atnin, Jeremías kidika king muhnit yakat duwi uina kat, witing yaklauwi malni kau kalyulwi dakana: —¿Papang yulni as dutamahn? Jeremías yaklauwi nangnitlana: —Agha, bahang adika ki: Man laih Babilon kingni tingni yakat bukma ki.

¹⁸Kaput bik laih Jeremías yaklauwi king Sedequías yakat kalyulwi dakana: —¿Man namangyakat ais dutni yamna yang, kidika awaskat tāmatuna nunuhni balna niningna yakat, kidika awaskat tawan niningyakat bik, manna silak yahanamana kidika?

¹⁹¿Angkat bangyah kidika pranipit balna Babilon kingni kaiwi kalbauwas karangki atwa dai kidika, man namangyakat dawak tawan niningyakat bik?

²⁰King waralaih dakah yang yultayang kidika yatah yamki kidika: Datangkat watwi Jonatán yul ulyang muihni ūni yakat yadu'uinin awaski, kidika awaskat yang yakat dauki.

²¹Kaput laih king Sedequías yulna dai Jeremías kidika kalbauyang balna wataknina yakat silak ana atnin dawak ma bitik yakat plawar busna kalana atnin busyang balna kaupak. Adika dini kaput yayamna dai plawar busna kidika diswas mani dai yakat kidika tawan nuhni pasyakat. Kaput laih Jeremías kidika kalbauyang balna wataknina yakat watna dai.