Read Mayangna Jeremías 38 Bible Online

Jeremías 38 - Mayangna bible

Jeremías 38

¹Matán walanibis, Sefatías, Pasur walanibis Gedalías, Selemías walanibis Jucal, Malquías walanibis Pasur, witingna dakakana dai Jeremías witing tawan muihni balna yakat adika yulni balna diyulwakat:

²“Papang yulwi: ‘Wais kat tawan nuhni akat watwarangkat dauwarang war yakat, kidika awaskat yuh, dawak siknis kau bik dauna karang. Kauna wais kat kalahwi Caldeo balna tingnina yakat kawarang kat sip karang sangnika laih laihwi yakna atnin.’

³Papang yulna: ‘Adika tawanni nuhni adika, Babilon kingni muihni balna kalbauyang balna tingnina yakat bukna karang. Witing yaklauwi laihwi duna karang, muih as bik sip-awas karang laihwi yaknin.’ ”

⁴Kaput laih tunan muihni balna kidika king yakat kalyuyulna: —Kidika alni ipamnin ki, witing yulni balna kau, kalbauyang muihni balna yakat kulninna sau yakat lakwi, dawak tawan muihni balna bitik yakat. Adika alni laih tawan yamni atnin kidika walwas ki, kauna dutni kidika walwi.

⁵King Sedequías yaklauwi nangnitnalana: —Yamni ki, manna witing yakat ais kalyamnin kultamana kidika kalyamtanauh. Yang manna namangna yakat sip-awasyang.

⁶Kaput laih witingna Jeremías kidika laihwi king walanibis Malquías pāni kuhrna kudungni yakat ahana dai, bahang kidika laih kalbauyang balna wataknina yakat sakdai pāni kuhrna kidika. Wahkau sitwi alahlalakna, pāni kuhrna kidika was disdai, kauna wasmak laih duwasakdai, bahang Jeremías witing kidika yakat kawi kiuna.

⁷Etiopía muihni as ayangni Ebed-melec, witing laih king uni yakat likdai, bahang dakana dai, Jeremías kidika pa kuhrna kudungni yakat ahana kidika. Kidika mani, king laih Benjamín dūrni yakat kal-uduhwi yulbauwa bangdai.

⁸Kaput laih Ebed-melec witing king uni kaupak kalahwi kiwi king yakat kalyulna:

⁹—King, adika ahalni balna Jeremías yakat kalyayamna kidika laih di dutni as ki. Pa kuhrna kudungni yakat ahana, bahang kidika yakat yuh dauwasakki, kat tawan yakat plawar busna dis bahang.

¹⁰Usnit kat king yaklauwi pakna Ebed-melec yakat, muih ahal muihasluih minitkau salap duwi kiwi Jeremías kidika yakna atnin pa kudungni kaupak, dauwas tanit kau.

¹¹Ebed-melec ahalni balna kidika duwi kiuna king uni kau asna puwa pāni yakat, bahang asna utuhni buas duwi wah karak alahwi lalakna pa kudungni kau Jeremías sakyakat,

¹²dawak kalyuyulna: —Asna utuhni balna kidika tingma dinit yakat atah dalani manin awas yulni wah kidika. Jeremías kaput yamna.

¹³Kaput laih ahal balna kidika wah yakat laihwi murwi ihilna. Usnit kat Jeremías kidika kalbauyang balna ūnina watak yakat watna dai.

¹⁴King Sedequías yaklauwi yulna, prapit Jeremías kidika witing muhni yakat duwi kiuna atnin, makatyulnin uni dūrni bās yakat. Bahang yakat king yaklauwi kalyulna: —Yul as mayultik dakaki, bahang dukihyawi barangni lāih yayulna atnam.

¹⁵Jeremías yaklauwi nangnitlana: —Man yulta dakaman kidika mayulki kat, man muih sihtang yaihiwarang; dawakat yul mayulki kat, man dakas awamaki.

¹⁶Kauna malnikau king Sedequías yaklauwi pramis as kalyamna Jeremías yakat: —Papang ayangni kau pramis mayamtayang, witing yaklauwi masangkika mayana kidika, yang muih sihtingkat maihiwas karang ki, dawak bik mainin kukulwa muihni balna tingnina yakat mahatas awakiki.

¹⁷Kaput dawak Jeremías yaklauwi Sedequías yakat kalyulna: —Papang parasni nuhni bitik duwa kidika, Israel Papangni aput yulwi: ‘Man Babilon muihni kalbauyang balna taninatuna nuhni tingnina yakat yawa āwama kat, man dawak walamabis balna bitik sangmaka laihtayakma, dawakat adika tawanni nuhni buswas karang.

¹⁸Kauna witingna tingnina yakat āwas awamakat, Caldeo balna kidika tawan nuhni kidika kawi duduna karang kat, kuh kau bubuswarang ki, dawak man ira lawas awama.’

¹⁹Sedequías yaklauwi nangnitlana: —Yamadutayang Ju muihni balna Caldeo balna karak kalpapakna kidika; witingna tingnina yak bukki kat yawiwiswarang.

²⁰Jeremías yaklauwi nangnitlana: —King man witingna tingnina yak buktas awamaki. King kidika yulni dakah plisma, Papang yulni kidika, yang manyak ma yultikda kidika, man yamni awama ki dawak sangmaka bik laihwi yakna karang ki.

²¹Papang yaklauwi nikingkana di balna kalahwarang kidika, king man witingna yakat buktas awama kat:

²²Judá kingni uni kau yayal bang kidika bitik yayakna karang dawak Babilon muihni kalbauyang balna taninatuna balna yakat diayana karang, dawak yayal balna kidika yuyulwarang: ‘King karak kaltalyang yayamni dai kidika alas kalyuyulna dawak bik minit bayayakna; dawak kalni kidika wasmak yak atakwi kakiuna dawak wiryaklawi bik tatalwas dadana.’

²³Jeremías baisa tanit yak kalyulna king yakat: —Yayal bitik dawak king walamabis balna bitik Caldeo balna tingnina yak ahana karang, dawak king man bik witingna tingnina kaupak lawas awama, kaunah nawatkauh laih Babilon kingni tingni yak bukma, dawak tawan nuhni kidika bik kuh kau bubusna karang.

²⁴Kaput dawak Sedequías yaklauwi Jeremías yakat kalyulna: —Man sangmaka dalani talaman kat, adika yulni muih as kau bik yulwinih.

²⁵Tunan muihni balna kidika witingna amanglalawarang kat man karak yulbautikda kidika, aiwi mayulwi dakakawarang ais man yang akat yayultada kidika, dawak ais yang manyakat mayultikda kidika bik, dawak pramis mayayamwarang sangmaka malaihwi yaknin, man lawa witingna yakat bitik diyulma kat, mayang yulbaudada kidika.

²⁶Kaunah man lawa diyulma, man kalki dinit yakat bukta yulta sakman dai watwi Jonatán uni yakat masihwak daunam awas yulni.

²⁷Dawak rahm kaput laih tunan muihni balna kidika Jeremías yakat kiwi kaltatalna, dawak kalyulwi dakakana, dawak witing yaklauwi yulna king kalyulna dai kaput. Kaput laih di as bik kalyulwas dadana, kat yulbabauna kidika muih as bik dakakawas dana dai bahang.

²⁸Kaput laih Jeremías kidika kalbauyang balna ūnina watak yakat sak atna Jerusalén kidika kawi duduna kat.