Read Mayangna Jeremías 39 Bible Online

Jeremías 39 - Mayangna bible

Jeremías 39

¹Judá kingni Sedequías, witing king kana kurih tiaskauarungka bayakwak waiku salap laihwa yakat, Babilon kingni Nebokatnesar, witing kalbauyang muihni balna duwa bitik duwi Jerusalén niningyakat kiuna, dawak awaihdakna.

²Sedequías king kana kurih salap minitkau as kaupak waiku arungka laihna kaupak, ma tiaskauarungka laihwa yakat waihla kidika tawan nuhni yakat kawi duduna,

³dawakat Babilon kingni ahalni kalbauyang balna taninatuna balna kidika dūr nuhni palni yakat panina duduna dai. Kidika balna laih Nergal-sarezer, Samgar-nebo, Sarsequim, witing kidika laih tunan nuhni as dai, dawak ūk kidika laih Nergal-sarezer, kidika bik laih tunan muihni as dai.

⁴King Sedequías dawak witing ahalni kalbauyang balna kidika di kalahwa kidika tatalna, dawak kalahwi kikirana. Pukta kalalahna dipulu dadahna pāni dūrni munah bahang kidika dūrni awaihdadakna kidika daklana walsah munah kalalahna, dawak Jordán niningkau langni yakat uina.

⁵Kaunah Caldeo ahalni kalbauyang balna kidika uiwi uina dawak Sedequías yakat lalaihna Jericó langni yakat. Laihwi balakwi king Nebokatnesar yakat duwi uina, witing laih Hamat sauni yakat sakdai Ribla yakat. Kidika yakat Nebokatnesar lā yamna: Sedequías walanibis balna kidika witing muhni tani yakat laihwi dininamak dadakna, dawak Judá sauni kau tunan muihni balna bik ina.

⁷Dawak Sedequías yakat laih minikpa yayakna dawakat tingni sisitna Babilon yakat duwi kiuna atnin.

⁸Caldeo balna yaklauwi king uni kidika kuh kau bubusna, dawak tawan nuhni kau ū balna kidika bitik, dawak Jerusalén daklana balna dai kidika bitik babahna.

⁹Witni yakat, king uni kau kalbauyang balna taninatuna palni Nabuzaradán witing tawan nuhni kau muih balna wawatna bangdai kidika bitik dawak witing yakat wiryaklalana balna bitik duwi kiuna Babilon yakat; witni kat tawan muihni bitik duwi kiuna.

¹⁰Judá sauni yakat bulah dana dai muih miniknakunni balna kamanah, di dis balna kidika, dawak kidika mani wain yamak diana dai, dawak sau di dahna balna bik.

¹¹Babilon kingni Nebokatnesar yaklauwi kalbauyang balna taninatuna Nabuzaradán yakat kalyulna amput yamwarang kidika Jeremías yakat:

¹²“Man duta maintalah, kaunah dutni laih kalyamwinih, witing ais yulwa kidika bitik kalatah.”

¹³Kaput laih Nabuzaradán dawi Nabusazbán, dawak Nergal-sarezer, witingna tunan nunuhni bu kidika, kaput bik Babilon kingni tunan muihni duwa balna bitik,

¹⁴Jeremías kidika kalbauyang balna ūnina watak kaupak yayakna dawak maintalnin papakna dai Safán mani, Ahicam walanibis Gedalías yakat. Kaput laih Jeremías kidika tawan yakat watna dai.

¹⁵Jeremías kidika baisa silak yak sakdai yakat, Papang witingyakat kiwi kalyulna:

¹⁶“Yawa etíope muihni Ebed-melec yakat kalyultah: ‘Papang parasni nuhni bitik duwa kidika, Israel Papangni witing aput yulwi: yang yulna yang yakat yamki adika tawanni nuhni akat, dutni niningyakat, yamni laih awaski. Adika dini balna kalahwakat kidika yakat man sak-awamaki.

¹⁷Kaunah yang namatdakki, man kidika muihni balna parasnina yakat buknin yamadutaman kidika. Yang Papangyang kat yultayang.

¹⁸Yang malaihtik yakki ki mainin-awas yulni. Ira lawama, kat yang akat yakulnaman. Yang Papangyang kat yultayang.’ ”