Read Mayangna Jeremías 4 Bible Online

Jeremías 4 - Mayangna bible

Jeremías 4

¹Papang aput yulwi: “Israel, nawatta aiwanam kultaman kat kidika laih yang akat aiwanamki. Tapama kau di dakaman balna kidika naikau yakta, yang kaupak lawas man kat,

²kaput laih yang ayangki kau yakta yultanama, di rahm kidika, la kat dawak barangni karak. Yang ayangki kidika laih nisan balna dinina karang blisin dawak ayangni nuhni yamnin bik.”

³Papang yaklauwi Judá dawak Jerusalén muihni balna yak diyulwi: “Pa di dahwas pāni yakat di dahtanauh; wakal pasyak baisa di dadahwinih.

⁴Judá dawak Jerusalén muihni balna, muihmana kidika Papang sainni dutanauh, dawak amangkilatanauh manna Papangmana yang kapat. Ismangna yakat āta dutanauh pramis markni kidika; manna dutni yamtamana kidika yulni, yang kulnik daukalna kidika kuhpau kapat dahlnin-awas dawak dahlwarang kidika muih as bik sip-awaski pina atnin.

⁵“Jerusalén dawak Judá pāni yak aput yultanauh, trumpit kau puhta aput yultanauh sau bitik yakat, dawak parasni yulta sarahtanauh: ‘¡Mawanang! ¡Aslah kalahna atnin! ¡Tawan nunuhni pararasni yakat!’

⁶Sayan nining yakat plakin kidika dulauta yutanauh; dawak ¡wawatwinih waltanauh yakmaldinin pāni! Kat tingpal niningkaupak duaiki ki, di disdanin kidika dawak daukalnin bik.

⁷Layan kidika pāni kaupak uman kalahna, nisan balna yakat iwi disyamwa kidika lapakwi kiwi; witing sauni kaupak kalahwi kaiwi, sauma kidika daukalnin, tawanma nunuhni balna kidika daukalwi kauhmak wanilang yamna atnin.

⁸Kidika bahang asna utuhni kau awa aidanauh ihtanauh dalawakat, kat Papang kulnin daukalna daihni kidika mayang kaupak yaklawas dana bahang.”

⁹Papang aput yulwi: “Kidika mani kiu'kawarang kat, king balna dawak sau tatuna kayang balna bik yamaduduwak diyukwarang, sumalyang balna parasni yamaduduwarang, dawak prapit balna laih muihsak dadauwarang.”

¹⁰Yang yulnayang: “¡Alakaih Papang, amput Jerusalén muihni balna yakat alas diyulna man! Kulnin aslah lani kidika dianin yulnaman, kauna waradika dutasakman kidika laih kuhbil as dinimak yakat āna sakman.”

¹¹Kidika mani kiu'kawarang kat, Jerusalén muihni balna yak diyulwarang: “Walang kaupak wing daihni puhwi kaiwi, yang tawanki niningyakat. Kidika laih wing sanni awaski plawar minik dawak basni kidika buiwi yakna atnin;

¹²yang wing sihting kaiwarang kidika laih tanit parasni karang ki, bahang waralaih witingna niningna yakat la yamkiki.”

¹³Talnauh, waihla balna kidika mukus kapat aiwi, war kalbaunin kārni balna kidika sihm wing bauwa kapatki, aninaras balna laih yakal sirihni kapatki. ¡Mamikun, mayang laih disnamayang!

¹⁴Jerusalén, kulnam dutni kidika yakpamta, kapat laih kal-laihta yakma. ¿Wat yapak tunama yakat di dutni kidika kulta piramta awaihta lamayah?

¹⁵Dan kaupak, dawak Efraín asangni balna kaupak bik yul dutni kidika kiwi:

¹⁶“Isningna paktanauh nisan balna dawak Jerusalén yakat bik, pa naikaupak waihla[5] kidika kaiwi, sarahwinah aiwi kalbauna atnin Judá tawanni nunuhni niningyakat.

¹⁷Judá tawanni nunuhni kidika awaihwi dadakwarang, sihm pa as kat maintatalwa kapat, kat yang nikingkauh yaklauna bahang. Yang Papangyang kat yultayang.

¹⁸“Man kulnam duta yamna man kidika yulni, aput makalahna; dutni yamnaman yulni minik tapalhni kidika mana, dawak ismang yakat dalani wauhtaman.”

¹⁹¡Dalawak pihrtayang! ¡Ising kidika parasni pihmwi! ¡Kus sak-awasyang, sip-awasyang ap danik! Dakanayang trumpit puhwak, dawak muih war kalbaunin sararahwak bik.

²⁰Yul balna kaiwi kawasakki di daukalwasak kidika yulni, adika sauni bitik laih daukalna ki. Minit as kat ūki labanni balna dai kidika daukalmumukna ki,

²¹¿baisa ma yapak talkiyah plakin dulalauna kidika makau dawak trumpit puhwa kidika bik dakakiyah?

²²“Yang tawanki muihni balna laih sinsnina diski, amangkilalawaski —Papang kaput yulwi—. Walabis la kat awaski, di balna kidika kulwi tatalwas ki. Dutni yamnin kidika laih lan palni ki, kauna yamni yamnin laih amanglalawas ki.”

²³Sau adika talnayang sihm kauhmak walang as kapat panimanah dai; dawak makau kisang yak talingkat yaringni dis dai.

²⁴Asang balna yak talingkat, diyukna, dawak asang ubulni binina bitik laih yamaduduna.

²⁵Talingkat muih as bik dis dai, dawak uhu balna bitik uman kiri yaklalana dai.

²⁶Dipulu dahna pāni yak talingkat kauhmak wanilang kalna dai, dawak tawan nunuhni balna bitik laih daukakalna dai. Papang annin yamadangni kidika yaklauwi kaput yamna dai.

²⁷Papang aput yulwi: “Sau kidika bitik laih busna karang, kaunah daukalnin palni laih daukaltas awaki.

²⁸Sau adika kulnin bukna karang, dawak makau kisang kidika bik sani manah kalwarang. Aput yultayang kauna kidika yulni kultik kalbautas awaki, kaput barangni ānayang, nawattik dangsatas awaki.

²⁹Aras kilyang balna dawak sibang ruhmyang balna sararahwa kidika muih balna bitik kalahwi kiri damasni wirni pakpakyakat yakmamaldi, kidika awaskat kipala nunuhni balna mayakat kikilwi. Tawan nunuhni balna bitik ruhmwidadana, muih as bik diski kidika yakat.

³⁰Man tawan nuhni as daukalnaman kidika, ¿ais yamta asna pauni kidika āwamahn?, ¿ais yamta gol dini kidika alahtaman?, ¿ais yamta mamakpa sani ātamahn? Dauh manahki yamni kalyamma bik, man saima balna kidika maruhmwi dadana, man daunin waltaman.

³¹Dalani duwi sarahwak dakayang, sihm yal as kat walanibis tatuna yakwa kapat; kidika laih Sayan sarahna dai, tingni dulauwi yulwi: ‘¡Alakaih! ¡Muih iyang balna yaihiwi!’ ”