Read Mayangna Jeremías 42 Bible Online

Jeremías 42 - Mayangna bible

Jeremías 42

¹Kalbauyang balna taninatuna balna bitik, kidika pasyakat, Carea walanibis Johanán, Osaías walanibis Azarías[54] dawak muih balna bitik, walabis muihbararak, witing yaihnit yakat uina dai

²prapit Jeremías yakat, dawak kalyuyulna: —Man yakat di as mayuldarang ki; dikah yanatwini: Man Papangma yakat yulta yangna yulkina, bulah wattayangna kidika. Muhnilau laih mahni yangna dai, kaunah waralaih bulah yangna, man talaman.

³Man Papangma yakat yultang angdika tani yakat yawinikna kidika nikingna kawang dawak bik ais yamnikna kidika.

⁴Jeremías yaklauwi nangnitnalawi: —Yamni ki. Papang yakat yulki manna yulmana, manna yayulnamana kaput, dawakat witing ais yayulwarang kidika manna yakat manayulki di as bik maltas.

⁵Kaput laih Jeremías yakat kalyuyulna: —Man Papangma kidika witnis barangni dawak rahm as kawang yangna nikingna yakat, yangna yamtas awanaki kat witing man yakat mapakwak yultaman kidika.

⁶Dukih yanawarang pa, kidika awaskat dukih yanawas karang pa witing yulwarang kidika, kaunah Mapapangki yakat yulni dakanaki, witingyakat waldi mana kidika yamni atnin yulni.

⁷Ma salap bayakwak usnitkat, Papang yaklauwi Jeremías yakat yulkalbauna,

⁸dawak witing yaklauwi diyulna uina atnin Carea walanbis Johanán, kalbauyang taninatuna balna witingna karak bang dai kidika, dawak muih balna bitik, walabis kaupak muihbararak kat,

⁹dawak diyulna: “Papang, Israel Papangni kidika, manna witing yakat yāpakna dai kidika man yulmana kidika kalyulna atnik, bahang witing yulwi:

¹⁰‘Manna adika sauni akat watnin kultamana kat, kalating kat barakwarang; daukaltas awaki, kaunah dahna awaki, dawak bik duttik yaktas awaki, kat dalani yawa bahang wah sihnayang kidika yulni.

¹¹Manna yamaduduwinih Babilon kingni yakat, manna kasak yaman'dutamana kidika. Yaman'duduwinih, yang manna karak yang manalaihtik yakna atnin witing parasni kaupak. Yang Papangyang kat yultayang.

¹²Mamaknakun mana talki, dawak yamtingkat witing bik manna yakat mamaknakun mana talwarang, kaput laih mana dawak saumana yakat yawanama.’

¹³“Kaunah manna adika sauni akat watnin kultas mana kat, dawak Papangmana yakat yulni dakas data

¹⁴aput yultanama: ‘Egipto yakauh mawi yalahnin kuldi, war dis pāni yakat, trumpit bik puhwak dakadas karang, yuh bik daudas karang’,

¹⁵kaput kat manna dakanauh, Judá kau watta mana kidika, Papang parasni nuhni duwa kidika yaklauwi mana yulwa kidika, Israel Papangni: ‘Manna Egipto yakat yalahnin kultamana kat,

¹⁶war dawak yuh kidika mana laihna karang kidika pāni yakat, uba yamadutamana dini kidika dawakat dautanama.

¹⁷Muih bitik Egipto yak kiwi yalahnin kulwa kidika, kidika yakat war kau dauwarang, yuh kau dauwarang, dawak siknis kau dauwarang. Muih as bik sangka yaklawas karang; muih as bik yaklawas karang wah sihki kidika kaupak.’

¹⁸“Papang parasni nuhni bitik duwa kidika, Israel Papangni, aput yulwi: ‘Yang kulnik daukalna kidika Jerusalén muihni balna niningnayakat dahlna kaput, manna namangna yakat bik dahlna karang, Egipto yakat yawanama kat. Dutni kalyulna yakat mana wirlana karang, kidika laih di as yamadangni dawak watwi adika pāni talnin awas tanka.’

¹⁹Manna Judá yak baisa bangmana kidika Papang yaklauwi mana yulwi Egipto yakat kiunin awas. Yamni dakanauh, yang lawik mana yultayang.

²⁰Manna mistik dutni as yamtanama, kat mana lawa yapaknamana Papang yakat yawana atnik, dawak yayulnamana: ‘Mapapangki yakat mayang mayulki kidika kalyultah dawakat yanayulma ais yamnin yulwa kidika, kaput laih yangna yamtanaki.’

²¹Warmani yang lawik mana yulnayang, Papang yaklauwi yayulna kidika mana yulna atnik, kaunah manna yamnin kultas mana.

²²Kaput bahang, yamni dakanauh war, yuh dawak siknis kidika balna kau dautanama, manna kidika pāni yakat mawi yalahdang timana kidika.”