Read Mayangna Jeremías 43 Bible Online

Jeremías 43 - Mayangna bible

Jeremías 43

¹Jeremías yaklauwi Papang yulna balna kidika bitik muih balna yakat diyulna usnit kat,

²Osaías walanibis Azarías, Carea walanibis Johanán, dawak muih ahal ūk bik Jeremías yakat parasni kalyuyulna: “¡Man yultaman kidika laih alas manaki! Mayang Mapapangki kidika man yak mayulwas dai, yana yulnam Egipto yakat kiwi yalahwas atnin kidika.

³Kidika laih Nerías walanibis Baruc yaklauwi nikingnakauh yulna man kaput yulna atnam dawakat kaput laih yangna Caldeo balna tingnina yakat buktiningkat yana ina atnin, kidika awaskat Babilon yakat yana duwi kiuna atnin.”

⁴Kaput laih Johanán dawak kalbauyang balna taninatuna, dawak muih balna Judá sauni kau bangdai kidika bitik Papang yulni dakawas dadana.

⁵Nawatkauh laih Johanán dawak kalbauyang balna taninatuna balna, dawak Judá kau muih bubin bangdai kidika ududuhna dai, dawak muih balna kalruruhna dai kidika pa ūk balna yakat, bahang kidika balna watwi nawatwi aina dai panina duwi yalahna atnin:

⁶ahal, yayal, walabis, king walanibis yayal balna, dawak muih ūk balna bitik kalbauyang tunan muihni Nabuzaradán yaklauwi Gedalías yakat kalana dai kidika maintalna atnin, dawak kidika pasyakat Jeremías dawak Baruc bik tuludai.

⁷Papang yulni dakawas dawi, witingna bitik Egipto yakat uina dai, bahang witingna uiwi kakana dai Tafnes tawanni nuhni kat.

⁸Tafnes yakat, Papang yaklauwi Jeremías yakat kiwi kalyulna:

⁹“Kipala nunuhni buas dutah, Judá muihni balna miniknapa yakat, dawakat sau yakat nutah, tawan nuhni kau king uni dūrni kiwikawa yakat.

¹⁰Dawak diyulta: ‘Papang parasni nuhni bitik duwa kidika, Israel Papangni witing yulwi: Yamtingkat diki yamyang Nebokatnesar kidika kaiwarang, Babilon kingni kidika, dawak tronni kidika ātik kalana awaki dawak ūni labanni bik, kipala nunaman minit yakat.

¹¹Witing kaiwarang, dawak Egipto sauni adika daukalpamna karang. Daunin dikulna balna kidika laih dadauwarang; dawak pa ūk yakat duwi kiunin kalkulna kidika laih duwi kiuna karang; dawak kaput bik war yakat daunin kalkulna kidika bik kaput war yakat dauna karang.

¹²Kuhkau busna karang,[55] Egipto muihni balna daninawan dauh uni balna kidika, dawak daniwan dauh balna kidika kuhkau busna awaki, kidika awaskat, laihtik duyawana awaki silak muihni kapat. Egipto sauni kidika klin yamki, sihm sīp maintalyang as witing prakni yakat mata laihna kat klin yamwa kapat, dawak usnitkat kiuna karang mahka, muih as bik di as kalyulnin sip-awas karang.

¹³Heliópolis witing Egipto yakat[56] kipala kau pahrwi naini yamwi ukna balna kidika bitik laih daukalmukki, dawak Egipto daniwan dauh balna kidika bitik kuhkau buski.’ ”