Read Mayangna Jeremías 44 Bible Online

Jeremías 44 - Mayangna bible

Jeremías 44

¹Jeremías yul duna dai kidika Ju muihni balna bitik Egipto kau yalalahwa balna dinina, bahang yalalahwa dai tawan nunuhni balna Migdol, Tafnes, Menfis dawak wadah niningkau sauni yakat bik:

²“Papang parasni nuhni bitik duwa kidika, Israel Papangni, aput yulwi: ‘Manna talnamana wauhnin dini sihtingkat Jerusalén minit yakat bukna dai kidika, dawakat Judá tawanni nunuhni minit yakat bik bukna dai kidika. Waradika laih daukalna, bahang kidika yakat muih as bik yalahwas ki

³manna dutni yamnamana yulni, manna yausnamana dawan dauh yakat mamatna yulnamana kidika yulni, dawak walapni bik busnamana dawan dauh yakat; dawan dauh balna kidika, witingna, dawak manna, kaput bik muihmana bararak balna witingna pasyakat disdai kidika.

⁴Wat wat sihnayang dai prapit balna, manna yakat manayulna atnin kidika dini yamnin-as yulni, kat yang dutni talayang bahang.

⁵Kauna manna yulki dakas danamana. Dutni yamtamana kidika danamna pāni yakat, dawan dauh balna yakat walapni busnamana.

⁶Kaput laih kulnik daukalna kidika dahlna dai, sihm Judá tawanni nuhni dawak Jerusalén tanipas kau dahlna kapat kuhpau. Bitik daukakalna, muih as bik diski warmani kat.

⁷‘Kaput bahang, yang Papang paraski nuhni dutayang kidika, Israel Papangni, yang yultayang: ¿Ais yamta manna silp mamatna yakat di dutni nuhni kidika iltamana? ¿Ais yamta kaput yamtanangkat Judá muihni balna kidika bitik dadauwi, ahal, yayal, walabis dawak wisam batanh dadana kidika bik, kaput laih muih as bik dis kidika?

⁸¿Ais yamta kulnik daukaltamanah, manna yamtamana kau, Egipto daniwan dauh kau walapni bustamana kidika manna aiwa yalahnamana pāni akat? Yamtamana kidika kau yaklauwi mana daukalna ki, dawak bik dutni manakulna karang sau nisan balna bitik pasyakat.

⁹¿Damatnakahna yah manna muihmana bararak balna dutni yamna balna dai kidika bitik, Judá kingni balna dawak yalnina balna bik dutni yayamna dai kidika, kaput bik manna dawak yalmana bik dutni yamna mana dai kidika Judá sauni, dawak Jerusalén sauni nuhni tanipas balna yakat bik?

¹⁰Warmani kat kulnamna kidika satuk wirlatasmana, yama dutas mana, kaput bik lā mananayang dai kidika manna yakat dawak muihmana bararak balna dai yakat bik, kidika lani sip yulnayang yakat yamtas mana.

¹¹‘Kidika bang yang Papang, paraski nuhni dutayang kidika, Israel Papangni, yang mana yultayang: Di dutni kidika manna namangna yakat duainik kulnayang dawak Judá muihni balna kidika bitik dismukna atnik.

¹²Yamtingkat Judá kau wawatna balna dai kidika dawak Egipto kau uiwi yalalahna kidika bitik laih dismukna karang. Bitik, walabis kaupak muih bararak kat dadauna karang, war kau, yuh kau, dawak la dituhna karang bahang kidika laih talwi muihsak dadauwarang.

¹³Wah diana awaki Egipto kau bang kidika yakat, sihm Jerusalén kau wah dianayang kaput, war, yuh, siknis.

¹⁴Judá muihni balna bulah Egipto akat aiwi yalalahna kidika as bik kiri yaklalawas karang. Judá yak watwi nawatwi kaiwi yalahnin kukulwarang bik sip awas karang, kaunah sip kat as as laih aiwarang.’ ”

¹⁵Kaput dawak, witingna yalnina balna dawan dauh yak walapni bubuswak amanglalawa dai kidika, dawak yayal ūk bik yakat bang dai kidika, bahawak mahni dai, kaput bik Ju muihni balna wadah niningyakat yalalahwa balna dai kidika Egipto sauni yakat, witingna bitik yaklauwi Jeremías yakat kalyuyulna:

¹⁶—Man Papang kaupak yul duaita mayanaman kidika yakat rahm kuldas karang.

¹⁷Nawatkauh laih, ban yamta awanaki yangna yamnin kulnayangna kidika. Walapni bustayangna ban karang dawak wain bik uitik kalatayangna ban karang dawan dauh makau kisang kingni yal yakat yang amput yamtik aiwayangna kaput warmani kat, sara mani kau muihkina bararak balna dawak ma kingki balna, dawak Judá tawanni nunuhni balna tunan muihni balna bik yayamna dai kaput Jerusalén tani pasyakat. Tanit mani yakat kasnin dini mahni duda dai dawak di dutni as bik kaiwas dai;

¹⁸kaunah makau kisang Kingni yal yakat walapni bustayangna dawak wain bik kalatas danayangna, di bitik diskalnamayang, mawanaihki balna yuh dadauwi kidika awaskat war yakat dadauwi.

¹⁹Yayal kidika baisa minitlakwi yuyulna: —Yangna plawar bustayangna dai, bahang kidika laih makau kisang Kingni yal ayangni kau bustayangna dai, kaput bik walapni bustayangna dai dawak wain bik duyawayangna dai, bahang kidika yamtayangna bitik kidika alkina balna kulninna lani dai. Bahang yangna ban kaput yamta awanaki.

²⁰Kaput dawak Jeremías yaklauwi nangnitnalana ahal dawak yayal bik witingyakat kaput nangnitlalana dai kidika yulni:

²¹—¿Manna kultamana laih Papang amanglawas dai kultamanah, kidika awas kat dinitkahna kultamanah, manna dawak muihmana bararak balna, kingmana balna tatuna muihni balna dawak tawan muihni balna bitik, walapni bustamana dai kidika dawan dauh balna yakat, Judá tawanni nunuhni dawak Jerusalén tanipas balna yakat bik?

²²Kaunah Papang laih baisa adika tikini baisa trukwasdana manna dutni yamtamana dai kidika, witing kasak kulnin daukalwa dai. Kidika bahang warmani manna saumana kidika daukalna dawak sip awaski yakat muih yalahna atnin; kidika laih lā tuhna as ki dawak kaput bik yamadunin lani bik ki.

²³Manna namangna yak dutni kaina kidika laih dawan dauh yakat walapni busnamana bahang, kaput laih Papang niningyakat dutni yamna manas, witing lani balna dakasdanamana, dawak yulwa kaput bik yamtas danamana.

²⁴Kaput baisa minit yakat Jeremías yulna muih balna bitik yakat, dawak kau tanit kidika yayal balna yakat yulna: —Dakanauh Papang yul sihna kidika manna bitik, Judá muihni balna Egipto yakat yalahtamana kidika.

²⁵Papang parasni nuhni bitik duwa kidika, Israel Papangni yulwi: ‘Yayal mana kidika[57] tamanapas kau yultamana dawak tingmana warkni bik yamtamana. Manna yultamana, pramis yamnamana walapni busnin dawak wain duwi kiunin makau kisang Kingni yal yakat, dawak kaput bik pramanamis kat yamnin yulnamana. ¡Yamni ki, pramis yamnamana yakat warkni yamtanauh!

²⁶Kaunah manna bitik dakanauh, Judá muihni balna Egipto yakat yalahdamana kidika, yang Papang yang kat manayultayang kidika yang ayangki kau yaktik pramis yamtayang Judá muihni balna as bik ayangki yakwi yuyulwas karang Egipto sauni akat, aput: Papang sangnika kau.

²⁷Kat yang talasak-awaki manna yakat dutni mana sihnik kaunah yamni laih awaski. Judá muihni balna Egipto akat yalalahwa balna bitik kidika dadauna karang war kau dawak yuh kau.

²⁸As as manah yaklalana karang war kaupak dawak nawatwi uiwarang Egipto kaupak Judá yakat. Kaput laih Judá kau wawatwa bitik kidika Egipto yakat uiwi yalalahna, talnama angdika yulni yakat kalahna karangpa, yang yulki kidika awaskat witingna yuyulna kidika pa.

²⁹Yang Papangyang, adika sainni manna yak manatayang yulnayang balna yakat kalahwarang, adika sauni akat wah kalaki kidika:

³⁰Yanglawik Egipto kingni Ofra yakat kalaki kidika manna waihmanala dutni palni kidika yak, Judá kingni Sedequías kau kalyamnayang kapat, Babilon kingni Nebokatnesar waihnila dutni tingni yakat anayang dai kidika kaput.’