Read Mayangna Jeremías 46 Bible Online

Jeremías 46 - Mayangna bible

Jeremías 46

¹Papang yaklauwi prapit Jeremías yakat kalyulna nisan balna yulnina.

²Adika yulni sihna dai, Egipto yulni, dawak Fero Necao Egipto kingni witing kalbaunin ahalni balna duwa kidika yulni, witingna kidika Éufrates wasnikung kau Carquemis kau bangdai yakat, Babilon kingni Nebokatnesar yaklauwi minitna bayakna dai kidika, Judá kingni, Josías walanibis Joacim king kana kurih arungka laihna dai yakat:

³“¡Namatna daknin kidika ridi alahwanauh! ¡Niningnayak ayawa kalbautanauh!

⁴¡Amanaras dangni yakat yalahnin dini kidika ilta sittanauh! ¡Aras kilyang balna ilwanauh! ¡Tunamana paknin pakta kalpartanauh! ¡Langmanasa buhta baitanauh! ¡Ayan prakni kidika awanauh!

⁵“Kaunah ¿ais talayang? Dangsatanauh muihsakdauta. Kalbauyang muihni balna kidika sip-awas dawak kalruruhna; kalahwi kikirana, dangnitna yak wiryaklawi tatalwas. ¡Yamadunin kidika pa bitik yak ki! Yang Papangyang kat yultayang.

⁶¡Parasni kirayang balna kidika sip kikiras ki, kulninna dadasni balna kidika sip kiri yaklalawas ki! Wadah nining kau Éufrates wasni yakat, kalnina bauwak bubukwi.

⁷¿Kidika wais yah Nilo wasni kapat bangwi kilkaiwa kidika, sihm was as parasni murwa kapat?

⁸Kidika laih Egipto, Nilo wasni kapat bangwi kilwi, sihm was parasni murwa kapat. Egipto yulwi: ‘Yang bahng'ilki sau bitik yakat, tawan nunuhni dawak muihni balna bitik ītik dis yamki.’

⁹“¡Aras kau kilyang muihni balna kidika tanitna yakat kawi uiwang! ¡Kar balna tamatna yakat awa yawanauh! ¡Kalbauyang muihni balna kidika mahka awi uiwang: Etiopía dawak Libia muihni kalbauyang balna kidika, witingna tanitna daknin duduwa kidika; Lidia muihni kalbauyang balna las ruhmwi lan kidika!

¹⁰Waradika kuduh Papang parasni nuhni bitik duwa kidika mani, waihnila balna yakat biriwi diyamwarang kidika. Isparah kidika laih dakna karang isninglakwarang kat, muih āni kau wasak dauna karang. Kat Papang parasni nuhni bitik duwa kidika yaklauwi muih mahni ina karang[58] bahang, tingpal niningkauh Éufrates wasni yaihnit yakat.

¹¹“¡Egipto tawanni, yawah Galaad yakat sika walta! ¡Sika mahni dima bik ilp diskarang man yakat, kat man namang yakat laih sika diski!

¹²Nisan balna kidika uman amanglalana man kidika sau yakat buknaman, sarahtaman kidika sau bitik yakat madakakawi; kalbauyang balna kidika biri biri kalbabauwi, kallaihwi sau yakat bukwi piraramwi.”

¹³Papang yaklauwi Jeremías yakat kalyulna, Babilon kingni Nebokatnesar yaklauwi Egipto niningyakat kalbauna kiwakat:

¹⁴“Isningpaktanauh Egipto yakat, Migdol yakat, Menfis yakat, Tafnes yakat bik: ‘¡Ismangnapuk ridi bang awanauh! ¡Isparah kidika yaklauwi yaihmat awaih yakat maīwi!’

¹⁵¿Aisyamwi Apis kidika kirana ya, man tumaruh maisihni dis kidika?[59] ¿Amput dawak sip kalma kau lawa sak-awasman daih? Kat yang Papangyang adika lawik tuklaknayang dai bahang.

¹⁶Kalbauyang muihni balna dutaman kidika kalnina bauwi bubukwi, biri biri yuyulwi: ‘¡Akaupak mahka mawang masauki kau, masauki yakat batahn'namayang yakat! ¡War kalbaunin adika kaupak maīrang!’

¹⁷“Egipto kingni Fero yakat aput dudutni paktanauh: ‘Binka parasni yamwi kaunah mani dis.’

¹⁸Yang, king yang dawak ayangki laih parasni nuhni bitik dutayang, yang sangkika kau yaktik pramis yamtayang: Tabor asangni kidika tanit nuhni kapat asang balna bitik pasyakat, dawak Carmelo asangni kidika kuma minit yakat yaklauna kapat, kaput karang waihla kaiwarang kidika.

¹⁹Ridi alahwanauh pa ūk yakat kiunin Egipto muihni balna, kat Menfis kidika kauhmak wanilang kalna karang bahang, dawak kidika yakat muih as bik sip yalahwa karang.

²⁰Egipto kidika laih turuh yal sirau as kapat ki, tingpal kaupak kanikating as kaiwi kasna atnin.

²¹Witing ahalni kalbauyang balna kidika laih turuh ahalmuk binina salalani kapat ki, kauna witingna bik kalahwi kikirarang sip-awas muhni yaklalauwas karang, kat kidika laih witingna niningna yakat ma as dutni karang bahang, wah dunin awarni bahang.

²²Egipto kidika kirarang sihm bil kapat, kalbauyang balna kidika aiwi ki kau niningna yakat kalbabauwakat, sihm pan dadakwa kapat.

²³¡Witingna asangninapas damasni kidika dadakwarang! Yang Papangyang kat yultayang. Sisin balna kapat tanit mahni dai, muih as bik sip-awas dai kulwi talna atnin.

²⁴Egipto kidika sau yakat bukna karang, tingpal niningkauh tawanni balna tingnina yakat bukna karang.”

²⁵Papang parasni nuhni bitik duwa kidika, Israel Papangni, aput yulwi: “Amón yakat wah kalaki, Tebas daniwan dauh yakat, dawak Egipto yakat bik daniwan dauh dawak kingni balna yakat bik, kaput bik Fero witing yakat kalkukulwa muihni balna yakat bik.

²⁶Yamtingkat, Nebokatnesar waihnila dudutni balna tingnina yakat bukna karang, Babilon kingni dawak tawanni muihni balna kidika bik. Kauna ma as as bayakwak Egipto kidika watwi muih uiwi panina duwi yalalahna karang, muhnilau dai kapat. Yang Papangyang kat yultayang.

²⁷“Yamaduwinih, Jacob tawanni, yang diki yamyang; Israel yamaduwinih. Man dawak walamabis balna bik laihtik yakki, pa naikau maduwi uina sakman kidika. Watta yalahma, kulnam aslah lani kat, ismanglak ki, muih as bik bilmalauwas karang.

²⁸Yang Papang yang kat yultayang: Jacob tawanni yamaduwinih, yang diki yamyang, kat mankarakyang bahang. Nisan balna bitik ītik disyamki ki, kidika balna pasyakat maruhnayang kidika. Kauna man yakat laih maītas awaki; kauna barangni mayamki ki kat kaput atnam bahang, wah matas laih awas awaki.”