Read Mayangna Jeremías 49 Bible Online

Jeremías 49 - Mayangna bible

Jeremías 49

¹Papang yul sihna Amón yulni: “¿Israel walanibis balna kidika angkat bangyah? ¿Angkat bangyah muihnina bararak dinina duduwarang muihni balna kidika? ¿Amput dawak dawan dauh Milcom[64] yaklauwi Gad kidika witing dunayah? ¿Amput dawak amonita balna kidika witing tawanni nunuhni balna yakat yalalahwi?

²“Yamniki, yang Papangyang kat yultayang: Mani balna kiwi kawarangki Amonita balna tawannina nuhni Rabá yakat war yulni sararahna karang; dawak bitik laih daukalna karang, dawak muihni balna kidika kuh didahlna karang. Kaput laih Israel kidika watwi witing tawanni nunuhni balna dai kidika laihwi duna karang. Yang Papangyang kat yultayang.

³“¡Hesbón ihtah, kat Hai laih uman daukalpamna! ¡Rabá yayalni balna aidanauh! ¡Prak sani kidika awa data pasmana bautanauh! ¡Mutu kapat pini iranauh, dawak muihmana yakat daktanauh![65] Kat dawan Milcom kidika laih pa ūk yakat laihwi duwi uiwarang ki, sumalniyang nunuhni balna dawak muih nunuhni balna bik.

⁴¿Amput dawak parasma nuhni kidika man manah kapat kaldakamahn? Man parasma kidika dahn kalwi, muih kulnam dutni, ritsni balna uduhnaman yakat rahm kultaman dawak yultaman: ‘¿Wais sipyah niking kauh yakalbaunin?’

⁵Yamni ki, pa bitik yakat sihki ki yamadunin kidika man mamat yakat. Yang Papang paraski nuhni dutayang kidika yultayang. Man kidika silp silp alahwa iranama, dawak muih as bik diskarang watwi manauduhnin.

⁶Kauna usnitkat amonita balna kidika satuk diyamki. Yang Papangyang kat yultayang.”

⁷Papang parasni nuhni bitik duwa kidika yul sihna Edom yulni: “¿Sins lani nuhni kidika disyah Temán yakat? ¿Sinsnina sirihni balna kidika amanglalawaski witingna ais yamninpa? ¿Sins lani tuhni dai kidika dispapamnayah?

⁸¡Dedán muihni balna alahwa iranauh, dawak maldanauh! Kat Esaú tawanni kidika daukalpamki bahang; wah kalanik mani kidika kaiwi kana.

⁹Wain minik kidika babahwa mani kat, wain minik tunan as as bik dadawi; bahang pukta dimalyang balna uiwi kawi duwi uiwi ampus duninna kat kamanah.

¹⁰Kauna yang lawik Esaú tawanni kidika di dis danayang, yakmalda pāni kidika yaknayang bahang sip-awaski waralaih yakmaldinin. Walanibis balna, yaihnitkau muihni balna kidika bitik laih dadauna; muih dis dana, yulna atnin:[66]

¹¹‘Warauma balna kidika datangkat yang maintalki. Dawak tingmamak balna kidika bik.’ ”

¹²Papang yulwi: “Manna wah dunin sunitak kidika dinamna awasdai, kaunah dīnamana, wah dutas laih bayaktas awama, man bik kidika sunitak kaupak dinamki.

¹³Yang, Papangyang kat yang silp ayangki kau yaktik yultayang: Bosra tawanni nuhni kidika kauhmak wanilang kalnakarang, kidika laih sau yak bukna dawak latuhna tanka karang, dawak tawan nunuhni balna ūk bik kaput daukalna karang, ban kaput atnin.”

¹⁴Papang kaupak yang akat yul as kaina; yul as nisan balna yak diyulwi: “¡Kaluduhta Edom niningyakat yawanauh! ¡Ridi alahwanauh kalbaunin!”

¹⁵Yang lawik tawan balna pasyakat tanit dibin mayamki, muih ahal pasyakat tanit dauh makulna karang.

¹⁶Man manah kapat[67] kaldakaman kidika yaklauwi alas mayulwi, kat muih bilninalautaman dai bahang. Kipala sahna walsah yakat yalahdaman, asang tuna balna yakat laih amanglataman. Sihm yakalnuh kapat mayakau uma duma bik, yakaupak mayamting bukma. Yang Papang yang kat yultayang.

¹⁷“Edom daukalwarang kidika laih nuhni palni karangki bahang muihsak dadauwarang ki. Kidika munah muih bayayakwa bitik kidika talwi muihsak dadauwarang wah duna kidika talwi,

¹⁸Sodoma dawi Gomorra kapat karang, dawak yaihnitkau tawan nunuhni balna daukalmukna dai kidika. Muih as bik watwi yakat yalahwas karang ki, dawak yakut bik bayayakwas karang ki. Yang Papangyang kat yultayang.

¹⁹Sirihni aiwaki ki, layan as Jordán damasni kaupak kalahwi sihrsihr batatani yakat kiwa kapat, dawakat kidika yakat diyamtingkat Edom kidika kirarang, dawak kidika yakat angdika muihni yang waltik yakki kidika kabamint kanakarang. ¿Wais sipyah yang apat atnin? ¿Wais sipyah nikingkauh yaklaunin? ¿Angdika sīpni maintalyang muihni muhki yakat yaklaunin sipyah?

²⁰Dakah yang yamnik ridi alahwanayang kidika Edom niningyakat, dawak Temán muihni balna yakat wark as yamnin ridi yamnayang dai kidika: Sīp dibinina bik duwi uiwarang dawak sirhnisihr balna bik daukalna karang.

²¹Edom bukwarang kidika laih parasni palni yulna karang, sau bik isihna karang; sarahwi ilp yulna karang, sarahwa kidika kuma pauni kat dakawa karang.

²²Waihla kidika Bosra niningyakat kiwarang sihm yakalnuh lawani rina kapat, dawak kidika mani Edom muihni kalbauyang balna kidika muih yal muihbin duwak kalyukwa kapat diyukna karang.”

²³Yul sihna Damasco yulni: “Hamat dawak Arfad tawanni nuhni balna kidika asalnina kalahna, kat witingna yakat yul dutni kiuna bahang. Muihsak dadauwi,[68] bahang isningnalak awaski.

²⁴Damasco parasni dis dana, bahang mahka kiri. Muihsak dauwa kidika minit bayakna, dawak dalani bik, sihm muih yal muihbin duwarang kapat.

²⁵Tawan nuhni ayangni nuhni, isninglak,[69] kidika laih ruhmwi dana ki.

²⁶Kidika mani wawahmama balna kidika tapas yakat bubukna karang, kalbauyang muihni balna bitik dadauna karang. Yang, Papang paraski nuhni dutayang kidika yultayang.

²⁷Damasco kau daklana balna yakat kuh paktik dahlki, kidika kuhnipau yaklauwi Ben-adad kingni uni kidika busna karang.”

²⁸Papang yulni sihna Cedar dawak Hazor tunan muihni balna yakat Babilon kingni yaklauwi kalbauwi minitna bayakna dai kidika: “¡Cedar nining yakat yawa kalbautanauh! ¡Ma kilwa niningkauh muihni balna kidika imuktanauh!

²⁹Unina lababanni balna kidika dawak tingninalau balna kidika bik dutanauh, traninapalin dawak di duduwa dini balna bitik. Kianinamil dakyakta aput disarahtnauh: ‘¡Yamadangni lani kidika pa bitik yakat ki!’

³⁰¡Hazor muihni balna alahwa iranauh! ¡Yawa maldanauh! Yang, Papangyang kat yultayang. Babilon kingni Nebokatnesar kidika, manna namangna yakat yaklaunin ridi kalahna.

³¹Yang, Papangyang kat lawik manapaktayang: ¡Kidika tawanni isninglak kidika niningyakat yawa kalbautanauh, witing dūrni bik diski, dawak putnin bik dis, alas sakkidika!

³²¡Kianimil balna dawak, tuniruh balna bitik maltanauh! Kalating ruhna karang pa bitik yakat kidika muihni balna miniknatangbas kakahrwa kidika; pa bitik kau dutni kidika duaitik diaki. Yang, Papangyang kat yultayang.

³³Hazor kidika walang kauhnimak kalnakarang ban kaput atnin, dawak walang kauhnimak sunilu uni duna karang. Muih as bik yakat yalahwas karang, dawakat yakut bik bayakwas karang.”

³⁴Judá yakat Sedequías king kana kat, Papang yaklauwi yul sihna dai Jeremías yakat Elam yulni:

³⁵“Yang, Papang paraski nuhni dutayang kidika yultayang: Elam lasni balna kidika bahki, witing kalbaunin dini tanit yamni duwa kidika.

³⁶Wing sihting kaiwarang sutni arungkapak adika tawanni minit yakat, kaput ruhna atnin pa bitik yakat.

³⁷Elam kidika kalyamtingkat kalyukwarang waihnila balna dudutni niningna yakat, dawak wah bik sihkiki, kulnik daukalna kidika witing nining yakat uluhki ki, dawakat war sihtingkat bitik imukna karang. Yang Papangyang kat yultayang.

³⁸Yang trunki kidika Elam yakat āki, dawak yamtingkat witing kingni dawak tanituna balna bitik dadauna karang. Yang, Papangyang kat yultayang.

³⁹Kauna tanit yakat Elam kidika satuk wirlaki ki. Yang, Papangyang kat yultayang.”