Read Mayangna Jeremías 5 Bible Online

Jeremías 5 - Mayangna bible

Jeremías 5

¹Papang yaklauwi yulwi: “Jerusalén tanipas balna yakat awaihtanauh, yamni talnauh, muih kalududuhwa pāni balna yakat bik waltanauh, muih as talnamapa lā kat yamwa muihni kidika, alas yulwas kidika. Walta yaktanama kat, Jerusalén dutni yamna balna kidika dating diswarang.

²Muih buas Papang ayangni kau yakwi yuyulwi kauna alas manah ki.”

³Papang, man waltaman kidika laih muih as alas yulwas muihni kidika. Wah kalanaman, kauna kaldalawasdai; kaldaukalpamnaman kauna lan kalahwas dana. Dutni kipala kapat tanit dadasni kalna, ta yamni yakat nawatwi ainin kukulwas dadana.

⁴Yang kulnayang: Muih miniknakunni manah mutu kapat ki, kat witingna amanglalawaski ais Papang dukih kalawa kidika, dawak Papangni yaklauwi yamnin pakwa kidika balna bik.

⁵Muih nunuhni balna yakat yawik yuldibauki. Yang, amanglatayang, witingna amanglalawarang Papang ais dukih kalawa kidika, dawakat ais yamnin pakwa kidika bik. Kauna bitik laih Papang niningkauh yaklalauna dai, dawak bik yulwa kidika yamkih diawas dai.

⁶Kaput bahang asangpas kaupak layan kalahwi dihimukwarang, kauhmak wanilang kaupak nawah kalahwi dihiwarang, nawah bulni kalahwi tawannina nuhni yaihnit kat dilaihna karang, dawak kalalahwarang kat laihwi kaswi iswi bibisna karang; kat dutni uba mahni yayamna bahang, dawak bik niningkauh yaklalauna bahang.

⁷Papang yaklauwi yulna: “¿Amput man dutma balna bitik dating diswarang yah? Man walamabis balna yaruhmwi dadana dawak dawan dauh balna ayangni kau yakwi yuyulna kidika. Kasninna mahni palni duainayang, kauna yang niking kauh barangni awas dai, dawak mahni kalpakwi lā babahna.

⁸Aras almuk banit yaknin kidika aras yal bin-dunin mani kana kat minit anwa kapat yayamwi, wanaihni yalni yakat talwi.

⁹¿Adika yayamna kidika yulni wah dianik awas yah? ¿Tawan as kaput kidika minit kalanik awas yah?

¹⁰¡Waihninala balna kidika kawi, wainnina yamak kidika daukakalwarang, bitik palni daukakalwas karang bik! ¡Tingni balna kidika iswi babahna karang, kat yang wainki yamak-awas bahang!

¹¹¡Israel dawak Judá karak malnikau dutni yayayamna! Yang Papang yang kat yultayang.”

¹²Israel dawi Judá karak Papang diski atwi yuyulna: “Papang kidika balna talwas ki. Di dutni asbik kalahwas karangki, yuh bik dawak kalbaunin bik dis mawarangki.”

¹³Prapit balna laih wing manah ki, Papang yulni balna kidika witingna karak awas ki. Yamni ki, adika Papang yaklauwi yayulna, Papang parasni nuhni bitik duwa kidika: “Adika yulni yuyulwa kidika witingna yakat kalahwarang: Yang yulki kidika kalatingkat witing tinpas yakat kuhpau kapat karang, dawak tawan kidika kuh sahna kapat karang, dawak kidika kuhnipau kidik yaklauwi dibuswarang.”

¹⁵Papang aput rahm yamnin kulwi: “Israel, man namang yakat duaiki tawan as pa naikaupak kaiwa kidika, tawan as parasni, dawak tawan muih barak. Man witing tuni yulbauwa kidika talas man, yuyulwa kidika bik amanglatas man.

¹⁶Witingna bitik laih kalbauyang muihni balna kulninna dadasni ki, dawak kalbaunin dini duduwa kidika laih daunin dini.

¹⁷Di dahtang minik kalalahwa balna kidika witingna kakaswarang, plamawar busna kidika kakaswarang, dawak baisa man walamabis balna kidika bik kakaswarang. Sīpma balna, tumaruh balna kakaswarang, wainma dawak ani minik damni kidika bik. Kalbaunin dini duduwa kidika kau tawanma nunuhni balna yamni parasni yamnaman yakat barangni rahm kultaman kidika bahwi dis yamna karang.”

¹⁸Papang aput rahm yulwi: “Kidika mani, kaput karang kauna yang bitik laih daukaltas awaki.

¹⁹Mayulwi dakakawarang kat: ‘¿Ais yamwi Papang adika aput maiyamwadah?’ Man lawa nangnitlama: ‘Papang yakat ruhmwi dadana kaput, witing saunina kat dawan dauh pa ūk kaupak kidika yakat dini yayamna, kaput laih muih saunina yakat kiwi muih ūk balna yakat dinina yayamna karang.’

²⁰“Israel sauni yakat isning paktanauh dawak Judá yakat kalyultanauh:

²¹‘Adika dakah, tawan mutu, mamakpa dutaman kauna talasman, tapama dutaman kauna dakasman.

²²Yang, Papangyang kat yultayang: ¿Manna yang kau yamakidutas manah? ¿Yang muhki tani yakat manayukwasyah? Yang lawik kuma kauhnimak kidika ānayang, yakat kaiwi watna atnin, baisa kuma kidika bayaknin awas. Kuma lalamwa balna kidika parasni yulna ki kauna parasni diski, bayakna atnin.

²³Manna ismangna kidika dutni annin manah duta mana; yaruhmta data yawanamana.

²⁴Kulta bik talas, yulnin bik yultas mana dai: Mayang rispik kuldang mayang Mapapangki yakat, mani kat was mayawi, wasma yakat bik dawak kurih mani yakat bik, mani balna kidika apakwi mayawi diminik balna bahnin mani kidika.

²⁵Kauna manna dutmana kidika yaklauwi di balna kidika satuk wirlana, bahang kidika dini yamni balna kidika manna sip dutas awanama.

²⁶Kat yang tawanki balna yakat muih ahal bangbang ki, malni kau yayamwi uhbinina iyang balna kapat, laihnin dini tapas yakat ahawi laihna atnin ūk balna yakat.

²⁷Uninapas kidika di malna dini manah bunghki, uhbinina laihwi ūnina yakat puwi bahngwa kapat. Kaput yamwi parasnina nuhni duduna, dawak di mahni duduna,

²⁸dawak muihnina salalani ki, di yamni kakaswi. Witingna dutnina kidika sarani diski; warau kidika nining yakat lāni kat yayamwas ki, muih miniknakunni balna rahmnina diayawas ki.

²⁹¿Adika yulni wah dianik awas yah? ¿Muih kapapat kidika minit dianik awas yah? Yang, Papang yang kat yultayang,

³⁰‘Di as yamadangni dutni kalahwa sakki adika sauni akat.

³¹Prapit balna yuyulwa kidika laih alas manah ki; sumalyang nunuhni balna kidika witingna dukih yakat lā ahawi, ¡yang tawanki kidika kaput dukih kalawi! Kauna, ¿ais yamtanamayah mani witni yakat?’ ”